Кольӧм вежонӧ регионса Госсӧветын сёрнитчӧмаӧсь, мый таво гожӧм урчитасны юркарын места, кӧні лоӧ кыпӧдӧма Коми Республикаса вужвойтырлӧн шылада-драмаа театрлы выль да бур стрӧйба.
Доддьыс вӧрзис?
«Коми му» газет гижліс нин, кутшӧм «лэчкӧ» шедісны тайӧ театрсьыс артистъяс. Мӧдӧд во нин найӧ оз вермыны уджавны асланыс стрӧйбаын, надзор служба сійӧс пӧдлаліс да.
«Коми войтырлӧн» XII съезд вылын, коді вӧлі тавося февральын, пасйисны резолюцияас, мый юркарын быть колӧ кыпӧдны шылада-драмаа театрлы выль стрӧйба. Кольӧм каднас вӧлі-ӧ та кузя мыйкӧ вӧчӧма — шы ни тӧв.
Но со май шӧрын «Коми войтыр» ӧтмунӧмӧн веськӧдлысь Алексей Габов республикаса юралысьлысь удж вӧчысь Владимир Уйбакӧд видеоконференция дырйи казьтыштіс тайӧ гӧрӧд йывсьыс. И та бӧрын юралысьлӧн администрацияӧн веськӧдлысь Дмитрий Самоваров пыр жӧ волӧма видзӧдлыны театрлысь шогмытӧм стрӧйбасӧ. А сэсся нин, кыдзи пасйи, Госсӧветын чукӧртчылісны депутатъяс, общественнӧй котыръясын водзмӧстчысьяс, юркарса главнӧй архитектор Владимир Рунг, чина йӧз. Дерт жӧ, вӧліны и вужвойтырлӧн шылада-драмаа театрӧн веськӧдлысь Светлана Белорусова да художествоа веськӧдлысь Светлана Горчакова.
Театрӧн веськӧдлысь вӧзйис некымын ин, кӧні позьӧ кыпӧдны выль стрӧйбасӧ. Пасйис, мый быть колӧ стрӧитны кар шӧрын, а оз кӧнкӧ бокын.
Сыктывкарысь главнӧй архитектор Владимир Рунглӧн кывъяс серти, театр кыпӧдны местасӧ бӧрйӧмыс — кывкутана удж. Ковмас быд боксянь ставсӧ туявны, мед сэсся бӧрыннас некутшӧм мытшӧд оз падмӧд.
Госсӧветӧн веськӧдлысьӧс вежысь Валентина Жиделева пасйис, мый кӧть и ӧні пандемия вӧсна кадыс зэв сьӧкыд, век жӧ театр кыпӧдӧмысь оз ков ӧтдортчыны. И чукӧртчӧмаяс воисны ӧти кывйӧ, мый регионса минимущество да юркарса администрация июнь 1 лунӧдз видзӧдласны, кытчӧ позяс лэптыны выль стрӧйбасӧ. Но быть колӧ кар шӧрӧ.
Культураса министр Сергей Емельяновлӧн висьталӧм серти, кор урчитасны местасӧ, кутасны дасьтыны проект-смета документ. А Госсӧветысь депутатъяс октябрын арся сессия дырйиныс вӧчасны та вылӧ сьӧм вичмӧдӧм кузя кывкӧртӧд.
Сідзжӧ Сергей Емельянов эскӧдіс, мый локтан театральнӧй сезонӧ вужвойтырлӧн шылада-драмаа театрысь артистъяс кутасны ворсны республикаса искусствояс гимназиялӧн сцена вылын. Матысса кадӧ кырымаласны та йылысь сёрнитчӧм.
«Лача кутам, оз пӧръявны»
Ми юалім вужвойтырлӧн шылада-драмаа театрӧн художествоа веськӧдлысь Светлана Горчаковалысь, эм-ӧ налӧн бур вылӧ лачаыс.
—Зэв ыджыд аттьӧ «Коми войтыр» ӧтмунӧмӧн веськӧдлысь Алексей Габовлы, коді эз повзьы шыӧдчыны театр стрӧитӧм йылысь юалӧмӧн Владимир Уйба дорӧ видеоконференция дырйи. Мӧд лунас нин театрӧ воліс Дмитрий Самоваров да ас синнас видзӧдліс, мый тані вӧчсьӧ. Светлана Ивановналӧн кывъяс серти, сійӧ весьӧпӧрӧма.
—«Вӧрзис» и миян министр, чукӧртчылам пӧ. А таӧдз нинӧм эз вӧч, ведомствосяньыс пыр гижисны сідз шусяна отпискаяс, уджыс пӧ мунӧ. А кутшӧм удж муніс?! Мися, колӧ чукӧртчывны ставлы, кодъяслы абу веськодь Коми муным, коми йӧзыс. И со чукӧртчылім май 19 лунӧ. Сӧвещанньӧ дырйи архитекторлы да карса администрацияӧн веськӧдлысьлы тшӧктісны куим вежонӧн корсьны места. Веськыда шуа, кадсӧ оз ков кыскыны, а ко-лӧ ставсӧ ӧдйӧ вӧчны. Код тӧдас, гашкӧ, бара ставсӧ вунӧдасны, кӧдзаласны, — висьталӧ Светлана Гениевна.
—Светлана Гениевна, министр кӧсйысьӧма театрлы, мый локтан сезонӧ кутанныд петкӧдчыны искусствояс гимназияын. Таысь нимкодь?
—Дерт, гимназиялӧн залыс миянлы лӧсялӧ. Сэні ми гоз-мӧдысь петкӧдчылім нин. Но ас тшӧт весьтӧ кӧртымавны ог вермӧй, вывті дона да — ӧти петкӧдчӧмысь колӧ мынтыны 35 сюрс шайт. Чайта, миян некутшӧм театр ӧти спектакльӧн та мындасӧ оз вермы нажӧвитны. Гашкӧ, Филипп Киркоров и вермас, но ог ми. Та вӧсна Сергей Емельянов сёрнитчӧма регионысь ве-лӧдӧм кузя министр Наталья Якимовакӧд, мед вежоннас кык лун миянӧс лэдзасны тайӧ сцена вылас. А кӧртымалӧм вылас сьӧмсӧ вичмӧдасны бюджетысь. Тадзисӧ эськӧ бур. Сэсся ӧд миян артистъяс ветлывлӧны гастрольӧн сиктъясӧ. И тадзи уджавны миянлы ковмас во нёль, кытчӧдз оз кыпав выль театрыс.
—А репетицияястӧ кӧні кутанныд нуӧдны?
—Асланым сцена вылын. Колӧ эськӧ, мед министр корас профсоюзлысь гоз-мӧд прӧст жыр содтӧд. Миян ӧд репетиция залыс, сэтчӧ кайны содйыс киссьӧма да, тшӧтш пӧдса. Колӧ дзоньтавны, да оз жӧ кӧсйыны. Вӧзйӧ, мед ми репетируйтчам культура колледжын, но ог кӧсйӧй. Ӧти-кӧ, сэні жырйыс ичӧт. А театрын, кыдзи тӧданныд, эм оркестр, балет, вокал да драма. Мӧд-кӧ, сэтчӧ-татчӧ гызмасьны абу жӧ бур. Видзӧдлам…
Екатерина МАКАРОВА.