Россияса Оланподулӧ вежсьӧмъяс вӧсна гӧлӧсуйтны вӧлі шуӧма апрель 22 лунӧ, но коронавируса вуджан висьӧм падмӧдіс, да ковмис вуджӧдны референдум нуӧдан кадсӧ.
Март помын странаса Шӧр бӧрйысян комиссия дугӧдліс гӧлӧсуйтӧм кежлӧ лӧсьӧдчан уджсӧ. Кольӧм четвергӧ Центризбирком аслас сайтын йӧзӧдіс юӧр, кӧть пӧ гӧлӧсуйтан лунсӧ абу на урчитӧма, но медым лоны сы кежлӧ тырвыйӧ дасьӧн, колӧ бӧр босьтчыны лӧсьӧдчан уджас.
—Олӧмыс бергӧдчӧ аслас нырвизьӧ, и тайӧс тӧд вылын кутӧмӧн Центризбиркомлы колӧ юклыны гӧлӧсуйтігкежлӧ став коланасӧ вӧчӧм могысь сьӧм, — пасйисны комиссияса пресс-службаын. — Ӧнісянь сідзжӧ и суйӧрсайса делӧяс да оборона министерствояс вермасны вичмӧдны мукӧд странаын бӧрйысян участокъяс котыртӧм вылӧ сьӧм.
Шӧр бӧрйысян комиссияса секретарь Майя Гришина пасйис, ЦИК пӧ эз дугӧдлы йӧзлы референдум йылысь юӧртан уджсӧ, а ӧні колӧ, мед комиссиялӧн лоис позянлун и сьӧмӧн вӧдитчыны.
Госдумаса веськӧдлысьӧс вежысь Игорь Лебедевлӧн кывъяс серти, Конституцияӧ вежсьӧмъяс пыртӧм йылысь референдумсӧ, вермас лоны, шуасны нуӧдны июнь 24 лунӧ.
—Госдумаысь депутатъяслӧн чайтӧм серти, Победалӧн парад лоас июнь 24 лунӧ. Тайӧ жӧ лунас котыртасны и референдумсӧ, — шуис сійӧ «Новости» агентствоса корреспондентлы.
РБК агентстволы оборона министерствоын сідзжӧ висьталӧмаӧсь, мый парадсӧ нуӧдасны июнь помын.
Парадсӧ да референдумсӧ ӧти лунӧ нуӧдӧмыс кивыв сыӧн, мый июнь 24 лунсӧ (сійӧ веськалӧ середаӧ) позяс йӧзӧдны шойччан лунӧн. Конституцияӧ вежсьӧмъяс пыртӧм йылысь оланпасын индӧма тайӧ шойччан лунсьыс вештысьны уджаланысь моз.
* * *
Тайӧ гижӧдыс вӧлі дась нин, кор Россияса президент Владимир Путин шуис нуӧдны Победалысь парадсӧ июнь 24 лунӧ.