Таво кӧсйи аслам неыджыд юбилейтор кежлӧ козин вӧчны — медводдзаысь нуӧдлыны ачымӧс Турцияӧ шойччыны. Отельсӧ нин аддзи да бронируйті весиг. Но, кыдз шуласны, мортыс чайтӧ, а Енмыс вӧчӧ… Пеж коронавирусыд ставсӧ тай со торкис.
А ӧні со правительствоӧн веськӧдлысь Михаил Мишустин и дзикӧдз кӧсйӧ тупкыны суйӧртӧ. Нинӧмла пӧ сэтчӧ шлывъявны да быд пӧрӧссӧ сэтысь кӧвъявны. А то пӧ шойччаланныд быдсяма «куршавельясас» да ваяланныд мый оз ковсӧ. А миянлы пӧ сэсся тані «чунясь» да врачьяслы вичмӧд тіянӧс бурдӧдӧмысь содтӧд сьӧм.
Но тайӧ на мый! Со МИД-лӧн официальнӧй представитель Мария Захарова шуӧ, дзикӧдз пӧ вельмӧмаӧсь миян йӧзыс — ставныс пондісны лэбавны самолётӧн. Водзті пӧ татшӧмторйыд сӧмын озыръяслы вӧлі лӧсялӧ! А ӧні со кодлы абу дыш, сійӧ и журъялӧ сынӧдса кӧрт лэбачнад. Мукӧдыслӧн пӧ весиг прамӧй паськӧм вылас сьӧмыс абу, а сэтчӧ жӧ сюйсьӧны. Да ӧд оз пӧ грездсянь грездӧ лэбны, а суйӧр сайӧ шойччыны ырыштчӧмаӧсь! Асланыс пӧ кызь вося ипотеканыс на мынтытӧм, а импортнӧй гожла мӧдӧдчӧны. Слабог пӧ, кӧть коронавирусыд тайӧ «йӧй» олӧмсьыс мездіс, да ӧні суйӧр саяд петавны кутасны сӧмын найӧ, кодъяслӧн та вылӧ збыльысь позян- луныс эм.
Тэа-меа, дона лыддьысьысь, дерт, тайӧ лыдас огӧ пырӧй. А куим тӧлысь гортад нажӧткатӧг пукалӧм бӧрад сэтчӧ ӧні прӧстӧй йӧзсьыс ӧдвакӧ кодкӧ нӧшта вермас пырны.
Йӧзыслӧн шойччӧм вылӧ во чӧжӧн чуктӧдыштӧм став сьӧмыс бырис тшыг кулӧмлы водзсасигӧн.
А кодлӧн век жӧ сьӧмторйыд сюрыштас, налы, дерт, ковмас оз нин донтӧм Турция-Египетын, а донасьыс-дона Сочи-Крымын гожйӧдчыны. Чинаяс та вылӧ и радӧсь: ассьыным пӧ туризмнымӧс, сідзкӧ, кыпӧдыштасны!
Италияын, мед йӧзыс асланыс странаын шойччасны, быд олысьлы вичмӧдасны 500 евроӧн (миян ног кӧ, 39 сюрс шайт гӧгӧр). Словенияын та могысь быдӧнлы кӧсйӧны сетны 200 евроӧн.
А миян со шуисны сӧмын 3-16 арӧса челядьлы тёльснитыштны 10 сюрсӧн да ичӧтджык кагаяслы 5 сюрсӧн. И эз шойччыны сетны тайӧ сьӧмсӧ, а мед кыссӧ бать-мамныс оз нюжӧдны.
А тадзитӧ ӧдвакӧ миян асланым туризмыд кыпалас, «миян» саридзьяс дорын лыда лоас таво гожӧм шойччысьыд да.
Анжелика Елфимова.