Öтуввез пыр козин – «Кык бать»

Талун, кор миян республикаын, кыдзи и Россия пасьталаын, культура учреждениеяс пöдсаöсь, Коми Республикаса вужвойтырлöн шылада-драмаа театр дасьтö уна сикас интернет-проект.

Медым искусство радейтысьяс эз гажтöмтчыны, сiдз шусяна самоизоляция дырйи театрын зiльысьяс уджалöны гортсяньыс. Налысь видеояссö позьö видзöдны театрлöн сайтын, а сiдзжö «ВКонтактеын», «Одноклассникиын», «Инстаграмын». Позьö аддзыны komiteatr ним улын.

Самоизоляция кадö медводдза татшöм проектöн лоис «Квартирник». Тайö концертсö шуöма вöлi петкöдлыны март помын Ставмирса театр лунö, но сэки эз нин позь чукöртны видзöдысьясöс. И Комиын тайö «Квартирниксö» лои петкöдлöма öтуввез пыр. Том артистъяс юксисны радейтчöм йылысь мöвпъясöн, лыддисны кывбуръяс, Семён Горчаков ловъя шылад улö сьылiс роч да комиöдöм важся романсъяс (вуджöдiс Анжелика Елфимова).

«Квартирниккöд» йитчöма и «Little big» группалöн «Uno» сьыланкыв вылö серамбана пародия. Театрысь том артистъяс асьныс моднöй лофт-стильын выльмöдiсны репетируйтчан жыр, медым сэнi позис петкöдлыны неыджыд концертъяс. Кыдзи вöчисны ремонтсö, аддзанныд видеопародияас.

Искусство радейтысьяслы торъя видеоурокъяс козьналö Коми Республикаса народнöй артист Александр Ветошкин. Сiдз, сiйö тöдмöдö видзöдысьясöс сигудöкöн, кор да мыйысь сiйöс вöчлiсны, кыдзи колö сыöн ворсны. Мöд видеоурокын артист велöдö вöчны баддьысь чипсан. Таысь кындзи Александр гижис кык шмонитана сьыланкыв, кодъясöс сиис самоизоляциялы. Та йылысь жö – Анна Поповалöн да Семён Горчаковлöн серамбана сьыланкывъяс. Самоизоляциялы сиöма и «Карантин» комиа-роча öтувъя видео, кöнi снимайтчисны вужвойтырлöн шылада-драмаа театрысь 21 уджалысь (быдöн гортсяньыс). Тайö аслыспöлöс эстафетасö коми театр примитiс Москваса артистъяссянь. Видеояссö видзöдöма нин уна сюрс морт.

Челядь йылысь огö жö вунöдöй. Коми Республикаса народнöй артистка Алёна Сметанина лыддис Николай Щукинлысь нöдкывъяс да корис мöдöдны вочакывъяссö «ВКонтактеын» театрлöн пошта кудйö. Литература юкöнöн веськöдлысь Евгения Удалова лыддьö Геннадий Юшковлысь кöч йылысь мойдъяс, а Тимур Смирнов да Ангелина Шахова артистъяс – Сöлö баблысь мойдъяс. Коми гижöдъясöн тшöтш тöдмöдöны Семён Горчаков, Валериан Канев, Илья Карманов.

Унатор дасьтiс театр и Победа лун кежлö, сы лыдын «Курыд паметь» проект. Артистъяс лыддьöны Степан Раевскийлысь татшöм жö нима небöгысь висьтъяс. Степан Семёнович – войнаса ветеран, гижысь, журналист. Война йылысь сылöн гижöдъясыс сьöлöмö йиджанаöсь.

Май помöдз öтуввезйын театрлöн лист бокъясын лоö йöзöдöма видео-висьтъяс. Позьö нин кывзыны «Победа лун» (лыддьö РФ-са искусствоясын заслуженнöй уджалысь, Коми Республикаса народнöй артистка Светлана Горчакова), «Сержант Сенькин олöмысь öти лун» (лыддьö артист Роман Поличенко), «Связь! Связь!» (Коми Республикаса госпремияа лауреат Андрей Засухин), «Танкистъяс» (Коми Республикаса заслуженнöй артист Андрей Епанешников). Та дырйи хроника видео отсöгöн артмисны аслыссяма
фильмъяс.

Мöд проект – «Победа асылö». Нималана коми поэтъяс Серафим Поповлысь, Альберт Ванеевлысь, Виктор Кушмановлысь война йылысь кывбуръяссö видео вылö лыддисны Коми Республикаса народнöй артистка Алёна Сметанина, Коми Республикаса заслуженнöй артистка Елена Чувьюрова, артистъяс Андрей Засухин, Ангелина Шахова, Тимур Смирнов, Валериан Канев, Данил Чудов.

Коймöд видеопроект – «Кувлытöм полклöн» радъясын», кöнi йитöма рöдвуж-фронтöвикъяс йылысь артистъяслысь казьтылöмъяс да коми авторъяслысь война йылысь сьыланкывъяс. Асланыс дедъяс йылысь висьтасисны театрысь художествоа веськöдлысь Светлана Горчакова, народнöй артистъяс Алёна Сметанина, Валентина Соколова, заслуженнöй артистка Зоя Осипова, артистъяс Сергей Туркин, Владимир Уляшев, Роман Поличенко, Ангелина Шахова.

Сьöлöм вöрзьöдöны сьыланкывъяс: «Синявиноса нюр» да «Турияс бöрдöны» (шыладыс Марк Новосёловлöн, кывъясыс Василий Лодыгинлöн), «Ловъяяслы» да «Воис ыджыд война вылысь морт» (шыладыс Владимир Горчаковлöн, кывъясыс Альберт Ванеевлöн), «Важ фотояс» (шыладыс Михаил Оверинлöн, кывъясыс Валерий Вьюхинлöн, комиöдiс Альберт Ванеев), а сiдзжö коми кыв вылын нималана «День Победы» (вуджöдлiс Владимир Тимин). «Вермöм лун», кодöс сьылiсны театрса артистъяс, видео вылö вуджöдöмöн юргис «Гимн Победы» ставроссияса конкурсын.

Победа лун кежлö театр вöчис аслас видзöдысьяслы козин: Youtube-ын да театрлöн öтуввезйын лист бокъясын позьö мынтысьтöг видзöдны Нина Куратовалöн повесьт серти «Кык бать» спектакль.

Театрлöн инстаграмын йöзöдöма интереснöй фотояс, а сiдзжö самоизоляция дырйи снимайтöм видеояс: артистъясöн «Смуглянка» йöктöм, Вермöм лун кежлö театрса студентъяслысь петкöдчöмъяс. Казьтыштам, вужвойтырлöн шылада-драмаа театрсянь Москваын Щукин нима театральнöй институтын велöдчöны квайт морт.

*  *  *

Водзö на виччысьöй выль проектъяс. Миян театрысь артистъяс оз сетны тiянлы гажтöмтчыны! Паныдасям öтуввезйын!

 Евгения Савина.

Öтуввез пыр козин – «Кык бать»

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх