Паметьтö кадыс оз вен

Лэбöны вояс, но Великöй Отечественнöй войналöн йöлöгаыс оз кус  да олö йöз сьöлöмын, вежöрын. Мортлысь паметьсö венны кадыс оз вермы.

Войнаыс и миян семьяын пас колис – тыш-косьын усис менам дядь Василий Алексеевич Палев.

Чужлöма сiйö 1926 воö Удора районса Путшкымдiн сиктын. Алексей Григорьевичлöн да Екатерина Михайловналöн семьяын быдмöмаöсь квайт ныв да öти пи – Василий. Чойясыс ёна радейтлöмаöсь сiйöс шмонитны кужöмсьыс да уджачлунсьыс.

Война заводитчигöн Василийлы вöлöма дас вит арöс. Батьсö босьтöмаöсь служитны, но фронт вылö абу мöдöдöмаöсь, Вожаёльö охранаö индöмаöсь. Семьяын ыджыднас да пыкöднас кольöма Василий. Сэки öд уджалiсны ставöн – и челядь, и верстьö.

1943 вося октябрь тöлысся öти асылö война вылö мунöма и Василий. Медым сiйöс босьтасны фронт вылö, 17 арöса зонка содтöма арлыд дорас öти во.

Ичöтджык чойыс, Тамара Алексеевна Чисталёва, казьтывлiс: «Сiйö асылас миян гортын уна йöз чукöрмис. Колльöдiм фронт вылö Васянымöс. Мамным да ми, квайт чой, войбыд синнымöс эг куньлöй, ырзöмöн бöрдiм. Висьтавлiсны, мамлöн бöрдöмыс пö миянсянь некымын керка сайöдз кылöма.  Ву кузя сöнiк нин кывтö вöлi. Мамным пиыс бöрся Важгортöдз на ветлiс, а миянöс воккöд юыс торйöдiс».

Квайт тöлысь Василий велöдчöма Вöлöгда дорса Грязовец карын. Курсъяс помалöм бöрас 1944 вося апрельсянь тышкасьöма вöрöгкöд Ленинградса фронт вылын  265-öд стрелкöвöй дивизияса 951-öд полкын. Та йылысь сiйö комиöн гижöма вöлi письмöын.  А сэсся полксö вуджöдöмаöсь Карелияса фронт вылö. Кык тöлысь чöж дасьтысьöмаöсь фашистъясöс зыригкежлö. Тыш-косьыс заводитчöма  1944 вося июнь 9 лунö.

Та йылысь казьтылö Алексей Трегоев, кодкöд Василий öтлаын служитöма да ёртасьлöма: «Сутки чöж кыссис тышыс. Вöрыс сотчö вöлi артиллериялöн помтöг лыйсьöмысь. Унаöн пöгибнитiсны. Мöд лунас немечьяслысь оборонасö орöдiм, и фашистъяс кутiсны бöрыньтчыны. Тайö вöлi миян ыджыд вермöм».

Сöветскöй армия водзö вöтлöма фашистъясöс ас му вылысь, 1944 вося июнь 20 лунö мездöма Выборг кар. А июнь 23 лунö Василий усьöма тышын. Сылысь нимсö пасйöма Коми Республикаса Паметь небöглöн мöд томын: Палев Василий Алексеевич, чужлöма Путшкымдiнын 1926 воö. Армияö босьтöмаöсь 1943 вося ноябрь 5 лунö, рядöвöй. Служитöма 951-öд стрелкöвöй полкын, 265-öд стрелкöвöй дивизияын. Усьöма тышын 1944 вося июнь 23 лунö. Гуалöма Карельскöй перешеекын.

Унаысь мамöй, Агния Алексеевна Жучева, шогпырысь шулывлiс: «Тöдны эськö, кöнi дзебöмаöсь Василий вокнымöс, да  ветлыны сылöн гу вылö…». Но корсьнысö некыдз эз артмы.

Мунiсны олöмысь Василийлöн бать-мамыс, Раиса, Клавдия, Лидия, Лариса да Тамара чойясыс. Менам мамлы 89 арöс нин. Ен мед сетас сылы дзоньвидзалун!

А 2017 вося май 8 лунö öтуввезса электроннöй базаысь ме аддзи, кöнi дзебöмаöсь Василий дядьöс. Радöйла и шогöйла бöрддзи: медбöрын верма висьтавны мамлы, кöнi вокыслöн гуыс, медым ветлыны сэтчö да улöдз копыртчывны.

Сiйö жö воас августын Анастасия нылöйкöд  ветлiм Ленинград обласьтса Выборг районысь Кузьминское посёлокö, волiм 55-öд номера братскöй гу вылö. Нуим сэтчö дядьлöн чужанiнсьыс мутор, улöдз копыртчылiм, казьтыштiм.

И лов вылын спокойджык лоис: дядьнымöс, Василий Алексеевич Палевöс, помнитöны и Выборг районын, бура дöзьöритöны гусö. И тöда: Кузьминскоекöд орчча Житково посёлокса школаын велöдчысьяс пиысь кодкö  «Кувлытöм полкын» мунiгöн нуас и Василий Палевлысь снимоксö.

Лидия Храмович.

Паметьтö кадыс оз вен

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх