Куим арöсöдз – тöлысьнас 5 сюрс шайт

Апрель-май-июньын ичöт кагаа семьяяслы шуöма сетны содтöд сьöма отсöг. Та йылысь висьталiс Россияса президент Владимир Путин.

Дзолюклы куим арöс тыртöдзыс бать-мамыслы вештасны 5 сюрс шайтöн тöлысь. Такöд йитöдын юалöмъяс вылö вочавидзö Комиын Россияса Пенсия фондлöн управлениеысь пресс-служба.

–Кодъяслы шуöма сетны татшöм отсöгсö?

–Быд семьялы, кöнi эм куим арöсöдз кага.

–Дзолюклы кö тырис нин куим арöсыс, вичмас оз сьöмыс?

–Вичмас, куим арöсыс кö тырас 2020 вося июнь 30 лунöдз (тайö лунсö тшöтш артыштöмöн).

–Сьöмсö урчитöма сетны быд кагалы?

–Да. Семьяын кö куим арöсысь ичöтджык öти быдтас – кутасны мынтыны тöлысьнас 5 сюрс шайт, кык кö – 10 сюрс шайт.

–Сетасны-ö сьöмсö семьялы, кодлöн абу мам капитал вылö правоыс?

–Да. Россияса президентлöн 2020 вося май 11 лунся 317 номера индöд серти тайö сьöмсö мынтасны мам капитал вылö видзöдтöг.

–Ми Россияса граждана, но олам мöд странаын. Вермам-ö босьтны ичöт каганым вылö тöлысьнас 5 сюрс шайтсö?

–Жаль, но он вермöй. Сьöмсö мынтöны сöмын Россия Федерацияын олысьяслы.

Тi кö олiнныд мöд странаын, но бöр локтiнныд Россияö, сьöмсö босьтöм могысь колöны документъяс, кöнi пасйöма öнiя оланiннытö.

–Каганым чужас июнь помын. Вермам-ö босьтны 5 сюрс шайтсö тайö тöлыссьыс?

–Да. Оланпасъяс серти, сьöм босьтöм вылö правоыс сетсьö 2020 вося июль 1 лунöдз. Каганыд кö чужас июнь 30 лунö, тiянлы вештасны 5 сюрс шайтсö. А чужас кö лунöн сёрöнджык (июль 1 лунö), мам капиталсö босьтанныд, а содтöдсö – он.

–Менам кагалы куим арöсыс тырас майын. Мынтасны меным сьöмсö кык тöлысьысь али сöмын апрельсьыс?

–Мынтасны кык тöлысьысь. Содтöд сьöмсö урчитöма куим арöсöдз кагалы, тшöтш и сiйö тöлыссьыс, кор сылы тырас куим арöсыс.

–Кутшöм кудйысь мынтöны?

–Федеральнöй бюджетысь.

–Содтöд сьöмсö урчитiгöн видзöдöны-ö, судзсяна али судзсьытöма олö семьяыс?

–Оз. Сетöны быд семьялы, кöнi эмöсь куим арöсöдз челядь. Та дырйи оз видзöдны, уджалöны-ö бать-мамыс, ыджыд-ö налöн нажöткаыс, босьтöны-ö пенсия да мукöд сикас пособие.

–Кыдзи гижны содтöд сьöм босьтöм могысь шыöдчöмсö?

–Шыöдчöмсö колö гижны тавося октябрь 1 лунöдз «Госуслуги» порталса «личнöй кабинетö» (https://www.gosuslugi.ru/395593/1), а сiдзжö Пенсия фондлöн официальнöй сайтö (https://www.es.pfrf.ru/#services-f).

Сэнi колö пасйыны шыöдчысьлысь СНИЛС номерсö да банкын тшöтсö, кытчö вуджöдасны сьöмсö. Та кындзи некутшöм мукöд документ оз корны. Ковмас кö мыйкö стöчмöдны, Россияса Пенсия фондын уджалысьяс асьныс тайöс вöчасны.

Шыöдчыны позьö и Пенсия фондлöн кар-районса юкöнъясö. Но коронавируса вуджан висьöм паськалöм вöсна öнi сэтчö позьö веськавны сöмын водзвыв гижöдчöмöн.

–Вермасны-ö опекунъяс шыöдчыны содтöд сьöм босьтöм могысь?

–Да, вермасны. Но та могысь налы аслыныс колö волыны Пенсия фондлöн кар-районса юкöнö.

–Бать кöть мам вермас шыöдчыны содтöд сьöмысла?

–Мам капитал босьтысьяслöн семьяысь шыöдчыны колö сылы, кодлы сетöма сертификатсö.

Кагаыс кö öтка да семьяыслöн мам капитал вылö правоыс абу, шыöдчыны вермас кагалöн чужöм йылысь свидетельствоын пасйöм мамыс кöть батьыс. Кыкнанныс кö шыöдчасны, сьöмсö сетасны сылы, кодi вöчис тайöс водзджык.

–Верма-ö ме шыöдчыны Пенсия фондö прописка вылö видзöдтöг?

–Да, верманныд. Сьöмсö сетöны оланiн вылö видзöдтöг. Тiянлы позьö шыöдчыны кöть кутшöм кар-районын Пенсия фондлöн юкöнö. Шыöдчыны вермас и бать-мамлöн сiдз шусяна представитель.

–Кытчöдз урчитöма вит сюрс шайта содтöд сьöмла шыöдчан кадсö?

–Шыöдчыны колö «Госуслуги» порталö, Пенсия фондлöн официальнöй сайтö да ПФР-лöн кар-районса юкöнъясö 2020 вося октябрь 1 лунöдз. Семьялöн кö эм содтöд сьöм вылö правоыс, сiйöс сетасны куимнан тöлыссьыс (апрель-май-июньысь).

–Дыр-ö ковмас виччысьны сьöмсö?

–Апрельсянь июньöдз быд кага вылö сьöмсö вештöны тöлысьнас öтчыд. Шыöдчöмсö кö вöлi сетöма 2020 вося июнь 30 лунысь сёрöнджык, сьöмсö вештасны öтпырйö.

–Менам куим арöсöдз кык челядь. Колö-ö меным гижны шыöдчöмсö быдöн вылö торйöн?

–Оз. Тiян кö куим арöсöдз кык либö унджык челядь, гижны колö сöмын öти шыöдчöм.

–Кагалы кö куим арöсыс тырас апрельсянь июньöдз кадколастын, сетасны-ö и быд тöлысся содтöд сьöмсö, и öтчыдысь вештансö?

–Да, сетасны. Кагалы кö куим арöсыс тырис апрельын, семьяыслы вештасны апрельысь 5 сюрс шайт, а сiдзжö июнь 1 лун бöрын öтчыдысь сетан 10 сюрс.

Куим арöсыс кö тырас майын, бать-мамыслы сетасны 5 сюрссö апрельысь да майысь (ставсö 10 сюрс шайт), а сiдзжö июнь 1 лун бöрын öтчыдысь сетан 10 сюрс шайт.

Дзолюклы куим арöсыс кö тырас июньын, то семьяыслы сетасны 5 сюрс шайта содтöд сьöмсö апрельысь, майысь да июньысь (ставсö 15 сюрс шайт), а сiдзжö июнь 1 лун бöрын öтчыдысь сетан 10 сюрс шайт.

–Кыдзи позяс тöдмавны, урчитiсны-ö меным сетны содтöд сьöмсö?

–Шыöдчöмсö кö вöлi сетöма Пенсия фондлöн сайтса либö «Госуслуги» порталса «личнöй кабинетö», вочакывсö йöзöдасны сэнi жö.

Медым тайö юöрыс воис тiянöдз, видзöдлöй, мед «личнöй кабинетаныд» тi вöлiнныд гижöдчöмаöсь юöртöм вылас. Та могысь колö пырны сэтчö, бöрйыны «Профиль пользователя» да пасйыны «Хочу получать уведомления о ходе предоставления запрошенных услуг» öшиньö «галочка».

А шыöдчöма кö вöлi Пенсия фондлöн кар-районса юкöнö, оланпасын урчитöм кадö сьöмсö вуджöдасны юöрттöг. Сэк жö мортыс, мед тöдмавны тайöс, ачыс вермас волыны Пенсия фондлöн юкöнö либö телефон пыр та йылысь юавны.

Шуöмаöсь кö, мый содтöд сьöмсö оз сетны, шыöдчысьыслы юöртасны та йылысь торъя письмöын да гижасны, мыйла оз сетны.

–Мый колö кутны тöд вылын шыöдчöмсö гижигöн?

–Тöд вылын колö кутны, мый тайö отсöгсö сетöны Россияса гражданалы. Мукöд странаса гражданалы сьöмсö оз мынтыны. Оз вештыны и Россияса гражданалы, кодъяс олöны суйöр сайын.

Быть колö индыны банкын шыöдчысьлысь тшöтсö. Мукöдлöн тшöт вылö сьöмсö оз вуджöдны. Пасйöма кö вöлi мöд мортлысь тшöтсö, колö выльысь гижны шыöдчöмсö.

Содтöд сьöмсö оз мынтыны:

–бать-мамлысь правосö мырддьöмаяслы;

–кагаыс кö, код вылö урчитöма мынтыны отсöгсö, кулас;

–шыöдчöмас кö индöма ылöдчана юöръяс.

–Шыöдчöм серти кö меным шуöмаöсь мынтыны сьöмсö, кыдзи ме сiйöс верма босьтны?

–Сьöмсö вуджöдöны сöмын шыöдчöмын индöм банкса тшöт вылö. Коронавируса вуджан висьöм паськалöмкöд йитöдын пошта пыр оз мöдöдны.

Йöв юан дзоньвидза лоан

Видз-му овмöс министерство вöзйö дон босьттöг юктöдны республикаын вöчöм йöлöн ичöт классъясын велöдчысьясöс.

Выльлунö республикаса юралысьлысь удж вöчысь Владимир Уйбакöд аддзысьлiгöн регионса правительствоöн веськöдлысьöс вежысь, видз-му овмöсса министр Анатолий Князев висьталiс сылы, став кар-районса школаясысь 1-4 классъясын велöдчысьяслы пö вöзъям сетны вежоннас куимысь 0,2 литр йöв.

–Россияса öткымын регионын збыльмöдöны нин татшöм уджтассö. Миян республикаын ичöтджык арлыда велöдчысьяслы йöвсö позяс вöчны Сыктывкарын либö некымын районса гырысь предприятиеясын, – пасйис сiйö. – Ошканныд кö тайö вöзйöмсö, йöзöс велöдан ведомствокöд ми помöдз дасьтам уджтассö да мöдöдам донъявны сiйöс сьöм овмöс министерствоö. И выль велöдчан восянь позяс нин босьтчыны збыльмöдны проектсö.

Владимир Уйбалöн видзöдлас серти, уджтасыс тöлка, öд йöлыс бур боксянь тöдчö кагалöн дзоньвидзалун вылö да отсалö сöвмыны быдмысь мортлы.

–Колö мöвпыштлыны и проектсö паськöдöм йылысь: медводз могмöдны йöвнас 1-4 классъясын велöдчысьясöс, а сэсся вочасöн и гырысьджык ныв-зонлы вичмöдны, – шуис Владимир Уйба.

Куим арöсöдз – тöлысьнас 5 сюрс шайт

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх