Татшöмыс во комын абу вöлöма

Ытва заводитчöмсянь Коми Республикаса юралысьлысь удж вöчысь Владимир Уйба волiс нин Луздор да Кулöмдiн районъясса, а сiдзжö юркарбердса ойдöм посёлокъясö. Воддза воясö Владимир Уйба уджавлöма нин виччысьтöм лоöмторъясысь ускöттьö бырöданiнъясын, торйöн кö, Саяно-Шушенскöй ГЭС-ын авария, Краснодар крайса Крымск карын да Иркутск обласьтын ойдлöмъяс бöрын.

–Комиын ваыс, дерт, оз сэтшöм öдйö сод, кыдзи Крымскын да Иркутскын. Но и танi ытваыс йöзыслы уна жö лёксö вайö, – висьталiс сiйö май 18 лунö Комиын Россияса МЧС-лöн управлениеöн веськöдлысь Алексей Пархомовичкöд аддзысьлiгöн. – Олöма йöзлöн кывъяс серти, татшöм ыджыд ваыс комын во нин абу вöлöма. Ме ветлi öткымын районö да видзöдлi, кыдзи котыртöмаöсь сэнi ытва дырйи уджсö.

Алексей Пархомович пасйис, республикаса лунвыв да шöр районъясын пö ваыс усьны нин кутiс, а войвылын уджалöны МЧС-лöн регионса управлениеысь куим котыр.

–Войвыв районъясö мунiсны и менам вежысьяс, – шуис сiйö. – Ми сюся видзöдам, медым некутшöм ускöттьö сэнi эз ло.

Комиын Россияса МЧС-лöн управлениеысь юöр серти, Сыктывкар дортi ыджыд ваыс мунöма нин, а Печора ойдöма Мылдiнсянь Ненеч кытшкöд суйöрöдз. Ёна ойдöмаöсь Усинск, Изьва, Чилимдiн районъяс. Сэнi уджалöны МЧС-лöн котыръяс, Сыктывкарысь да Воркутаысь спасательяс.

Чилимдiн да Усинск районъясын лöсьöдöма торъя пунктъяс, кытчö позяс овмöдлыны ойдлöминысь петкöдöм йöзöс.

Республикаса квайт районын öнi ытва улö веськалöма 330 керка, нелямын мортлы ковмöма эновтны оланiнсö. «Чрезвычайнöй ситуацияынöсь» Кулöмдiн, Чилимдiн да Удора районъяс. Сикт-посёлокъясö вайöма тырмымöн лекарство, сёян-юан да мукöд коланатор.

Татшöмыс во комын абу вöлöма

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх