Кольöм вежонö аддзысьлігöн Коми Республикаса юралысьлысь удж вöчысь Владимир Уйба да «Монди Сыктывкарса ЛПК»-ысь генеральнöй директор Клаус Пеллер видлалісны регионса правительстволöн предприятиекöд öтувъя удж-ёртасьöмын медшöр нырвизьяс.
Талун «Монди Сыктывкарса ЛПК» регионын кöртымалö медся уна вöр – 5,08 миллион кубометр, либö кöртымö босьтöм став участоксьыс 42,5 прöчентсö. Та дырйи компания тырвыйö збыльмöдö вöр овмöсöн вöдитчигöн урчитöм став тöжд-могсö, тшöтш и пöрöдчöм бöрын выльысь быдтö-пуктö «веж зарнисö», а сідзжö электроника отсöгöн маркируйтö пу-кражсö – тадзи пасъялö, мый сійöс пöрöдöма-заптöма оланпас торкавтöг.
Комбинатлöн ТЭЦ могмöдö регионын колана мындаысь 17 прöчент би-электроэнергиянас. ТЭЦ-сö выльмöдöм кузя уджтас вылö Mondi котыр видзöма нин 100 миллионысь унджык евро инвестиция.
Коми Республикаса правительствокöд социальнöя ёртасьöм йылысь сёрнитчöм серти «Монди Сыктывкарса ЛПК» быд во вичмöдö сьöм туйяс дзоньталöм-нюжöдöм, сиктса (Кöрткерöс, Кулöмдін, Сыктыв, Сыктывдін, Койгорт, Луздор, Удора) да юркарса Эжва районъяслы отсалöм, регионын спорт да социальнöй юкöн сöвмöдöм вылö. 2020 воын та могысь компания лишöдас 550 миллион шайт.
Таво «Монди Сыктывкарса ЛПК» отсöгöн республикаын ньöбисны COVID-19 коронавируса инфекциялы паныд водзсасьöмкöд йитöдын лолавны отсалан аппаратъяс да весалан сорас-маскаяс. Комбинат сідзжö сетіс Эжва районын «Вита» санаторий-профилакторийлысь стрöйбасö обсерватор улö.
Клаус Пеллерлöн висьталöм серти, странаын да республикаын эпидемия вöсна сьöкыдлунъяс вылö видзöдтöг предприятие вичмöдас таво кежлö урчитöм мында инвестиция.
Аддзысьлöмсö сигöртігöн Коми Республикаса юралысьлысь удж вöчысь Владимир Уйба да «Монди Сыктывкарса ЛПК»-ысь генеральнöй директор Клаус Пеллер тöдчöдісны, мый правительство да предприятие костын öтувъя удж-ёртасьöмыс водзö кутас сöвмыны.