Кыкысь – öти?..

Архангельск обласьтса да Ненеч кытшса губернаторъяслысь удж вöчысьяс Александр Цыбульский да Юрий Бездудный ода-кора 13 лунö Нарьян-Марын кырымалiсны тайö кык субъектсö öтувтöм йылысь меморандум (асланыс видзöдлас йылысь кабала).

Кор Александр Витальевич веськöдлiс яран кытшöн, сiйö вöлi татшöм öтлаасьöмыслы паныд. Но муртса «пуксис» паськыдджык улöсö, кинас и кокнас пондiс эскöдны, мый татшöм сöльнитчöмыс быдöнлы сöмын бур вылö.

Збыльысь-ö быдöнлы?..

Со мый, экспертъяс серти, вичмас öтлаасьöм бöртиыс НАО-лы:

–сiйö дугдас лоны Россияса торъя субъектöн, сiдзкö, асланыс регионса власьт пыдди Архангельск обласьтса Собраниеын пондас пукавны сöмын кык представитель;

–бырасны асланыс индöд-шуöмъяс, мый серти öнöдз сэн олiсны;

–бур специалистъяс дорын бурдöдчыны позяс сöмын Архангельскын, но сэнi и öнi нин оз тырмыны ни больничаыс, ни врачыс;

–суседъяс моз тшöтш тырасны лöп-ёгöн;

–öдвакö кутасны пыдди пуктыны сэтчöс вужвойтырсö, а, сiдзкö, и чинаяслы веськодь лоасны налöн мытшöдъясыс…

А мый вичмас Архангельск обласьтлы? Сьöм! Тайö обласьтас олö миллион сайö морт, Ненеч кытшын – муртса 44 сюрсысь унджык. Обласьтсаыдлöн тöлысся удждоныс пö матö 36 сюрс шайт, а кытшсаыдлöн – 80 сюрс гöгöр. А йитчöм бöрад бюджетыд лоас öти, сiдзкö, выль кытшöн веськöдлысьыдлы позяс сiйöс юклыны ас кöсйöм сертиыс…

Дерт, öтлаасьöм водзвылад кыкнанлаас лоö нуöдöма референдум, мед олысь йöзыс висьталасны, кöсйöны-ö найö дзикöдз вылö йитчыны-клеитчыны.

Кывсьö, Ненеч кытшын пö 70 прöчент олысьыс талы паныд, а тайö сöмын комын сюрс гöгöр морт… Архангельскад, тöдöмысь, став миллион сайöыс лоас та дор.

И öтувтчöмыс кö артмас, вермас лоны, коркö тадзи жö «ньылыштасны» и миянлысь озыр Коми Республиканымöс.

Анжелика Елфимова.

Кыкысь – öти?..

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх