Май 15 лунö «Коми войтырса» нырщикъяс видео пыр йитчылiсны öтмунöмлöн кар-районса юкöнъясын водзмöстчысьяскöд. Шöр сёрниыс вöлi республикаса олысьяслысь дзоньвидзалун видзöмын талунъя серпас йылысь.
Минздравкöд öтувъя видеоселекторсö нуöдны коланлунсö тöдчöдiсны «Коми войтырса» нырщикъяс апрель 29 лунö Коми Республикаса юралысьлысь удж вöчыськöд «гöгрöс пызан» сайын паныдасьлiгöн. Регионса веськöдлысь сэки ошкис тайö вöзйöмсö да шуис тшöтш пырöдчыны видеосöвещаниелöн уджö.
Чукöртчöмаяс водзын кывкутіс Коми Республикаын йöзлысь дзоньвидзалун видзöм кузя министрлысь удж вöчысь Борис Александров. Владимир Уйба вочавидзис исполкомсаöс майшöдлана юалöмъяс вылö.
Öтмунöмлöн Кулöмдiнса представительствоö пырысь Иван Касев пасйис, мый районын тэрыб отсöг сетан машинаяс дзикöдз нин важмöмаöсь. «Збыль, республикаын колö выльмöдны оз сöмын санитарнöй машинаяс, но и велöдчанiнъяслысь автобусъяс», – сетiс сöглас Владимир Викторович. И мытшöдсö бырöдны эськö позис ас странаын машинаяс вöчöм кузя федеральнöй программа весьтö, пасйис республикаöн веськöдлысь.
Печораысь Герасим Каневöс майшöдлö, кор нин пö вежасны районса бурдöдчанiнын жугалöм томограф.
«Ми тыр-бура гöгöрвоам, мый кызвын бурдöдчанiнас оборудованиеыс талун шогмытöм. Та понда дзик пыр шуим ньöбны республикалы нёль выль томограф. Вöчöны найöс Питерса «Электрон» заводын. Тайö ас муын вöчöм зэв бур техника. Öти татшöм аппарат вичмас Печоралы. Öнi корсям бурдöдчан техникасö ньöбöм могысь сьöм, та кузя шыöдчöм ыстöма нин Россияса правительствоö», – юöртic Владимир Уйба.
Исполкомлöн чукöртчылöм дырйи сёрнитiсны и ылi сикт-грездсаöс бурдöдöм, врачьясöн могмöдöм, ытва дырйи санавиациялöн уджалöм, бурдöдчанiнъяс лэптöм-дзоньталöм йылысь.
Сыктывдiн районса представительствоысь Олег Лажанев висьтасис сьöкыда висьысьясöс лекарствоöн могмöдöмын мытшöдъяс да дзоньвидзалун видзан юкöнын оптимизацияöн вывтiасьöм йылысь. Владимир Уйба пасйис, мый сійö талы дзик паныд, та понда Комиын дугöдчисны оптимизируйтöмын «водзмöстчöмысь». Торйöн кö, регионöн веськöдлысь гарыштiс Усвавомса больнича йылысь, кодöс кöсйöны вöлi пöдлавны нин, но Владимир Уйбалöн тшöктöм серти бурдöдчанiн кутас уджавны и водзö.
«Сэнi, кöнi талун абу фельдшер ни врач, колö бытьöн ловзьöдны дзоньвидзалун видзан тэчас. Коми Республиканым вель ыджыд, но «сё керка вылö – öти фельдшер» шуöмыс танi оз лöсяв. Сикт-грезд öта-мöдсьыс некымын дас километр ылнаынöсь да, та понда весиг сёысь этшаджык керкаа овмöдчанiнлы колö асланыс бурдöдысь. Та вылын и мöдам уджавны», – кывкöрталiс Владимир Уйба.
* * *
«Коми войтыр» öтмунöм аттьöалö Коми Республикаын национальнöй политикаса министр Галина Габушеваöс исполкомлысь чукöртчылöм котыртны-нуöдны отсалöмысь