Кулӧмдiн районын бура тӧдӧны Анатолий Павлович Медведевӧс. Сiйӧ ыджыд пай пуктiс Эжва йылын видз-му овмӧс сӧвмӧдӧмӧ.
Чужӧма сiйӧ Башкирияса Уркасс сиктын. Челядьдырсяньыс тӧдлӧма войналысь курыд кӧрсӧ. Мӧрччылӧма и сьӧкыдлуныс, и тшыгъялӧмыс. Сёйлӧмаӧсь тшӧтш пу кырсь да бобӧнянь, кӧм-пась абутӧмла челядь абу ставӧн вермӧмаӧсь ветлыны школаӧ. Но буретш сьӧкыд олӧмыс сетӧма вын, да йӧзыс кутчысьӧмаӧсь, ловнас абу усьӧмаӧсь, сьӧлӧмнас абу чорзьӧмаӧсь.
Башкирияса видз-му овмӧс институт помалӧм бӧрын Анатолий Павлович веськалӧма Коми муӧ. Сэки гырысь ӧтувъя овмӧсъясӧн веськӧдлысьяс веськыда шыӧдчывлӧмаӧсь велӧдчанiнъясӧ, да диплома том специалистъясӧс ыстылӧмаӧсь уджавны Россия пасьтала.
Кулӧмдiнысь «Сельхозтехника» ӧтувъя котырлы колӧны вӧлӧм том специалистъяс. И тайӧ котырас мӧдӧдӧмаӧсь Анатолий Медведевӧс. Сiйӧс индӧмаӧсь медшӧр инженерӧн, а некымын во мысти – веськӧдлысьӧн нин. Зiльӧма сэсся 13 во.
Сэки вӧлi кытчӧ инасьны йӧзыслы удж вылӧ. Воысь-во пыр зумыдджыка сулалiсны кок йылас совхозъяс, леспромхозъяс, госпромхозъяс, «Сельхозхимия», ПМК… Видз-му овмӧс котыръясын видзисны уна скӧт, вӧдитiсны видз-му.
Вӧлӧга вӧчан гырысь овмӧсъяслы отсалӧм могысь лӧсьӧдлiсны техника дзоньталан станцияяс, сэсся на пыдди лоис «Сельхозтехника» котыр, кӧнi Анатолий Павловичлӧн веськӧдлӧм улын пӧвъясысь вӧчлӧм сарай пыдди кыпӧдiсны ыджыд шоныд гараж. Сэнi и дзоньтасисны, и видзисны запчасьтъяс. Бӧрынджык запчасьт да оборудование улӧ лӧсьӧдiсны механизируйтӧм торъя склад. Оборудованиесӧ сэнi новлӧдлiсны электрокарӧн.
Лэптiсны и оланiн, уджалысьяслы сетiсны 56 патера. Автобусӧн новлӧдлiсны найӧс удж вылӧ, а челядьӧс – детсадйӧ да школаӧ. Кыпӧдiсны 50 дзолюклы сад, ва башня, а ва босьтанiнсӧ кыкӧс. Олӧма йӧз ӧнi на казьтылӧны, кыдзи Анатолий Павловичлӧн водзмӧстчӧм-зiльӧмӧн вӧчисны дзонь улича.
1986 воын КПСС райкомса первой секретар вӧзйис кывкутысь мортлы юрнуӧдны Кулӧмдiнса совхозӧн, кӧнi видзисны 1.500 юр скӧт, сы лыдын 800 мӧс, вӧдитiсны 11.000 гектар видз-му угӧддьӧ да 1.900 гектар гӧрӧм му. Заптылiсны 4.500 тонна турун да дасьтылiсны 9.000 сюрс тонна силос. Картупельсӧ ӧти гектарсьыс босьтлiсны 230 центнер, вӧдитлiсны и капуста. Уджалiс совхозас 550 морт.
Видз-му овмӧс юкӧнын тайӧ котырыс вӧлi медводзын, но сэк жӧ ёна важӧсь нин вӧлiны ляпкыд йирка скӧт картаяс.
Анатолий Павловичлӧн веськӧдлiгӧн совхозлӧн Кужса юкӧнын кыпӧдiсны 240 куканьлы гид, разисны мӧсъяслы важ фермасӧ да лэптiсны выльӧс. Кулӧмдiнса фермаын, кытчӧ лым сылiгӧн пыравлiс ва, лэптiсны джодж. Таысь ӧтдор дзоньталiсны кукань гид, кыпӧдiсны 240 юрлы скӧт карта, вӧчисны пыран туй, бетоналiсны силос гу. Донын вужвыйӧн дзоньталiсны мӧсъяслы ферма, кыпӧдiсны кукань видзанiн, а картупель бӧръянiнсӧ вӧчисны кык судтааӧс. Донын жӧ вӧчалiсны ӧшинь-ӧдзӧс курич. Овмӧсын уджалысьяслы кыпӧдiсны ас стройматериалысь керкаяс.
Зумыда сулалiс да бура уджалiс сэки совхоз. Анатолий Павловичӧс йӧзыс вылӧ донъялiсны кыдзи тӧлка, кывкутысь, зiль да водзмӧстчысь, йӧз вӧсна ыджыд тӧжда веськӧдлысьӧс. И ӧнi Кулӧмдiн районын олысьяс пыдди пуктӧны сiйӧс.
Светлана Вяткина,
Кулӧмдiн районса видз-му овмӧс юкӧнын юрнуӧдысь специалист.