Апрель 20 лунӧ чукӧртчыліс Россияысь биатлон кузя союзлӧн правление, кӧні вынсьӧдісны 2020-2021 вояс кежлӧ странаса командаясӧн веськӧдлысьяслысь штаб.
Россияса сборнӧйысь мужичӧйяслы старшӧй тренерӧн индӧмаӧсь Роберт Кабуковӧс, коді чужлӧма-быдмӧма Сыктывкарын.
1999-2009 воясын сійӧ олӧма Германияын, кӧні сетӧмаӧсь сэтчӧс гражданство. Буретш сэки и заводитӧма тренеравны тайӧ странаса сборнӧйын.
Кабуков, позьӧ шуны, велӧдӧма да лэдзӧма ыджыд спортӧ юниоръяс пиын мирса кыкысь чемпион Каролин Хеннекеӧс да мирса кубокын призёр Надин Хохлерӧс.
2011 воын сійӧ бӧр локтӧма Россияӧ. Биатлон кузя главнӧй тренерӧн сэки зільӧма Валерий Польховский. Кабуковӧс сійӧ индӧма тренеравны томъяслӧн Россияса сборнӧйын, а та бӧрын Роберт уджалӧма старшӧй тренерӧн биатлон кузя Коми сборнӧйын.
Сэсся Комиысь петӧм морт велӧдӧма котравны лызьӧн да лыйсьыны Украинаса да Казахстанса спортсменъясӧс.
–Роберт Кабуковкӧд ми тӧдсаӧсь важысянь нин, кор сійӧ тренераліс на томъяслӧн Россияса сборнӧйын. Сылӧн ставыс артмыліс бура, томъяслӧн команда шедӧдліс вермӧмъяс, зонъяскӧд сійӧ пыр воӧдчыліс ӧти кывйӧ. Ставӧн пасйылісны, мый тренер сяммӧ сёрнитны, тшӧктыны, висьтавны, гӧгӧрвоӧдны. И Казахстанса сборнӧйын сійӧ зілис лючки, командаыскӧд некутшӧм вен эз вӧвлы, – юксис аслас мӧвпъясӧн Валерий Польховский.
–Бура гӧгӧрвоа, мый нюжмасьны некор. 2022 воын нин – Олимпиада. Таво нин колӧ дасьтыны команда да бура тренируйтчыны, видзӧдлыны, мый артмӧ, а мый – оз. Олимпиада кежлӧ тыр-бура дасьтысьны кольӧ сӧмын во. И сэки некутшӧм мытшӧд нин оз вермы лоны. А Олимпиада бӧрын лоас ясыд, мӧдам-ӧ водзӧ зільны, – висьталіс Роберт Кабуков.
Кабуковысь кындзи сборнӧйса мужичӧйясӧс мӧдасны дасьтыны Максим Максимов да Артём Истомин, нывбабаясӧс – Владимир Королькевич да Николай Загурский.
Мужичӧйяслы сідз шусяна резервса тренеръясӧн индӧмаӧсь Николай Князевӧс, Алексей Волковӧс да Дмитрий Шукаловичӧс, нывбабаяслы – Сергей Коноваловӧс да Евгений Куваевӧс.
Матысса кадӧ биатлонистъяслӧн союзӧн бӧрйӧм кандидатураяссӧ Валерий Польховскийлы колӧ вӧзйыны Россияса спорт министерстволы, медым сэтчӧс чинаяс вынсьӧдасны тренеръяссӧ. Апрель 27 лунӧдз союзлӧн правлениеын вӧчасны кывкӧртӧд и спортсменъяс кузя, кодъясӧс мӧдасны дасьтыны 2020-2021 вося сезонын.