«Монди Сыктывкарса ЛПК»-ӧс пасйӧма Россияса экономикалы медся тӧдчана предприятиеяс лыдын. Вӧр овмӧсса компанияясысь сӧмын кӧкъямысӧс пыртӧма тайӧ лыддьӧгас.
Россияса правительстволӧн торъя комиссия вынсьӧдӧма странаса экономикалы медся тӧдчана (системообразующӧй) предприятие-организацияяслысь лыддьӧг, кодъяслы мусир донтӧмман да коронавирус пандемия кадӧ государствосянь отсӧгыс вичмас медводз. Тайӧ списокас пыртӧма 646 компания, «Монди Сыктывкарса ЛПК» – вӧр овмӧсса предприятиеяс пӧвстын Комиысь дзик ӧти.
Тайӧ предприятиеясыслӧн удж бӧрся кутас видзӧдны торъя котыр. Серпасыс кӧ кутас омӧльтчыны, мӧдасны корсьны позянлун вичмӧдны налы государствосянь сьӧма отсӧг.
Талун «Монди Сыктывкарса ЛПК»-ын вӧчӧны став позянасӧ коронавирус паськалӧмлы паныд водзсасьӧм могысь. Комбинатын котыртӧма антикризиснӧй штаб, кӧні быд лун сюся донъялӧны бергӧдан уджсӧ. Предприятиеын уджалысьяслысь быд лун видлалӧны температура. Казяласны кӧ кызӧдӧм-несъялӧмӧн, уджсьыс ӧтдортӧны, висьӧмсӧ туявтӧдз пропусксӧ киритӧны.
Уджаланінын стрӧга видзӧдӧны цех-вежӧслӧн сӧстӧмлун бӧрся, весалӧны жыръяссӧ инфекция бырӧдан сорасӧн. Медым предприятиеын бергӧдчис этшаджык йӧз, «Монди Сыктывкарса ЛПК»-ын ӧні унаӧн зільӧны гортсяньыс. Мукӧдсӧ комбинатӧ нуӧны-вайӧны торъя автобус-машинаӧн.
Предприятиеын нёль здравпункт уджалӧны сутки чӧж. Таысь кындзи, лӧсьӧдӧма ӧти татшӧм пункт ТЭЦ-ын. Комбинатын зільысьяс быд здукӧ вермасны шыӧдчыны медикъяс дорӧ отсӧгла либӧ звӧнитны «Монди Сыктывкарса ЛПК»-ын котыртӧм «пӧсь линияӧ».
Предприятие сідзжӧ отсалӧ и регионса власьтлы водзсасьны висьӧм паськалӧмлы паныд: правительстволы кад кежлӧ сетӧма Эжва районын санаторий-профилакторий, вичмӧдӧма лолавны отсалан оборудование да паськӧм-маска ньӧбӧм могысь 130-ысь унджык миллион шайт.