Мирын Россиялӧн тӧдчанлуныс содӧма

Ӧтуввезйын Россияса Шӧр бӧрйысян комиссиялӧн сайтын йӧзӧдӧмаӧсь «Поправки к Конституции: почему это важно» буклет.

Водзкывъяс пасйӧма, мый миян странаным подуласьӧ традицияяс, асшӧрлун да ӧтувъялун вылӧ, и Россияса Оланподулӧ вежсьӧмъясыс зумыдмӧдӧны тайӧ подувсӧ. А сiдзжӧ петкӧдлӧны, мый мирын Россия Федерациялӧн тӧдчанлуныс ӧнi содӧма.

Кызь лист бока буклетын вӧзйӧм вежсьӧмъяссӧ юкӧма дас кык пельӧ: семья, социальнӧй юкӧн, медицина, страналӧн асшӧрлун, Россиянымӧс сӧвмӧдӧм, уджалысь мортӧс дорйӧм, му-васа озырлун видзӧм, пемӧсъяс вӧсна кывкутӧм, волонтёръяслы отсӧг, культура видзӧм, наукалы отсалӧм, власьт бердӧ сӧмын патриотъясӧс сибӧдӧм. И быд вежсьӧм йылысь пасйӧма, кутшӧм вежӧртас пыртӧма сэтчӧ.

Россияса Госдума март 11 лунӧ вынсьӧдiс РФ-са Конституцияӧ вежсьӧмъяс пыртӧм йылысь президентлысь оланпас бала. Сiйӧ жӧ лунӧ Федерацияса Сӧвет, а бӧрынджык и регионъясса парламентъяс ошкисны тайӧ документсӧ.

 Март 14 лунӧ Совфед вынсьӧдiс та кузя ассьыс шуӧм да ыстiс сiйӧс президентлы. Вежсьӧмъяссӧ лоӧ пыртӧма странаса Оланподулӧ, на вӧсна кӧ сетасны ассьыныс гӧлӧссӧ Россияын олысьяс.

Март 25 лунӧ Россияса президент Владимир Путин юӧртiс, мый коронавируса вуджан висьӧм паськалӧм вӧсна Конституцияӧ вежсьӧмъяс пыртӧм вӧсна гӧлӧсуйтан лунсӧ лоӧ индӧма врачьяскӧд да мукӧд специалисткӧд сёрнитӧм бӧрын.

*  *  *

Россияса Общественнӧй палатаысь гӧлӧсуйтӧм бӧрся видзӧдан котырӧн веськӧдлысь Максим Григорьевлӧн кывъяс серти, Конституцияӧ вежсьӧмъяс пыртӧм йылысь оланпас вӧсна гӧлӧсуйтiгӧн наблюдательӧн лоны кӧсйысьяссянь воӧма нин 80 сюрс гӧгӧр шыӧдчӧм.

–Нелямын сюрс кымын шыӧдчӧм ыстiсны торъя йӧз, нӧшта нелямын сюрсысь унджык воис общественнӧй котыръяссянь да ютыръяссянь,– висьталiс сiйӧ.

Максим Григорьев пасйис, мый гӧлӧсуйтӧм бӧрся видзӧдны кӧсйысьыс ёна унджык, но коронавирус вӧсна эз на ставӧн вермыны шыӧдчынысӧ. Общественнӧй палата пӧ оз урчит налысь лыдсӧ, но ӧдвакӧ пӧ быд участокын лоас 50-60 наблюдатель.

Кольӧм четвергӧ Общественнӧй палата котыртлiс наблюдательяслы велӧдан вебинар. Гӧлӧсуйттӧдз татшӧмсӧ некымынысь на нуӧдасны, вочавидзасны юалӧмъяс вылӧ.

Оланпас серти, наблюдательяссӧ индӧны Россияса да регионъясса Общественнӧй палатаяс.

Водзтiджык Россия Федерацияса Шӧр бӧрйысян комиссияӧн веськӧдлысь Элла Памфилова шыӧдчылiс нин ютыръяс да ӧтмунӧмъяс дорӧ, медым найӧ вӧзъясны гӧлӧсуйтӧм бӧрся ассьыныс видзӧдысьясӧс.

Мирын Россиялӧн тӧдчанлуныс содӧма

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх