Апрель 17 лунӧ Коми Республикаса юралысьлысь удж вӧчысь Владимир Уйба аддзысьлiс «Газпром трансгаз Ухта» компанияӧн веськӧдлысь Александр Гайворонскийкӧд.
Александр Гайворонский висьталiс, кыдзи пӧртӧны олӧмӧ «Газпром» акционер котыр да Коми Республикаса правительство костын ёртасьӧм йылысь сёрнитчӧмын индӧм инвестицияа уджтасъяс. Торйӧн кӧ, сiйӧ юӧртiс, кыдзи збыльмӧдӧны «Ухта–Торжок-2» газопровод нюжӧдан проект.
2018 восянь, кор вӧлi кырымалӧма сёрнитчӧмсӧ, унатор вӧчӧмаӧсь регионын олысь войтырлысь олӧмсӧ бурмӧдӧм могысь. Сiдз, дзоньталӧмаӧсь Ухтаын аэродром да аэровокзал, а ӧнi тайӧ карсьыс бурдӧдчанiнъяс выльмӧдӧны. Помалӧмаӧсь нин вуджан висьӧмъяс бурдӧдан стрӧйбаын, а сiдзжӧ Ухтаса больничаысь ЛОР, онкология, функциональнӧй диагностика, неврология, терапия да травматология юкӧнъясын удж. Вочасӧн эштӧдӧны дзоньтавны кага чужтанiнса жыръяс да челядьлы бурдӧдчанiн. Уджыс мунӧ и Г.А.Карчевский нима ныв-зонлӧн творчество шӧринын да челядьлӧн паркын.
–Весиг ӧнiя сьӧкыд кадӧ ми вӧчам сёрнитчӧмын индӧм уджсӧ, ӧд гӧгӧрвоам, мый ставыс тайӧ зэв тӧдчана Ухталы. Эм кӧ позянлун, содтам на ӧдсӧ, – пасйис Александр Гайворонский. – Таво босьтчам дзоньтавны физиотерапевтическӧй поликлиника. Ми век дасьӧсь отсавны республикалы. Ӧтувъя уджлысь коланлунсӧ тӧд вылын кутӧмӧн регионса правительстволы колӧ могмӧдны Ухтаса социальнӧй учреждениеяс колана оборудованиеӧн.
Владимир Уйба да Александр Гайворонский сiдзжӧ видлалiсны 2020 во кежлӧ содтӧд сёрнитчӧм кырымалӧм йылысь юалӧм.
Аддзысьлiгӧн республикаса юралысьлысь удж вӧчысь да «Газпром трансгаз Ухтаӧн» веськӧдлысь сёрнитiсны и сы йылысь, медым компанияын уджалысьясӧс, торйӧн кӧ, медикъясӧс да вахтаӧн зiльысьясӧс, видлалiсны, кӧвъясьӧма-ӧ налы коронавируса вуджан висьӧмыс. Сiдзжӧ шуисны видзӧдлыны, эм-ӧ позянлуныс восьтыны Ухтаын коронавирус эрдӧдан тестъяс вӧчан лаборатория.
Владимир Уйба аттьӧалiс Александр Гайворонскийӧс «Газпром трансгаз Ухта» компанияӧн Ухта сӧвмӧдӧмӧ пуктӧм пайысь да республикалы отсӧг сетӧмысь.