Таво челядьлы тувсов каникулыс виччысьтöг водз быйкнитіс, и помыс сылöн весиг оз на тыдав.
Медым велöдчан программасö кыдзкö пöртны олöмö, школьникъяс тöдöмлунсö босьтöны öтуввез пыр, сэтысь жö перйöны велöдысьöн дасьтöм гортса уджсö.
Школаад лунтыр парта сайын пукалöмыс тöдлытöг вешйис бокö.
Дерт, тадзи велöдчигад джуджыд тöдöмлунтö он кöвъяв. Нöшта на и уналаын öтуввезъя йитöдыс абу, да и компьютер-ноутбук вылад уджтöмалысь бать-мамлöн сьöмыс оз жö чукты.
Челядь, кодъяс оз на вежöртны, мый велöдчöмыс ковмас водзö олöмас, чунь пырыс видзöдöны татшöм тöдöмлун босьтöм вылад. Сöмын водзмöстчысь, уджысь прöстджык да асланыс быдтасъяс вöсна тöждысьысь бать-мам мырдöн-сорöн да гöлöс лэптöмöн пуксьöдлöны ныв-писö пызан сайö кельыдлöз экран водзö югзьöдыштны вежöрнысö.
Но тані бара люкасян уна мытшöдö.
Кöть миян канмуын челядьöс велöдöмыс лыддьыссьö дон босьттöг, окота сертиыд он на и босьт öтуввезсьыд зумыд тöдöмлунтö – быдлаын корöны сьöм. Кодсюрö буриника нажöвитчö йöзлöн öнія шог вылас.
Зэв стöч комияслöн шусьöг: беддьыд кык пома. Öтар помыс тшöктö велöдчыны, а мöдарыс колскöбтö нырад.
Но медсьöкыдыс тадзи олігöн – челядьöс лунтыръясöн нёль пельöса жырйын шоммöдöм.
Найö кöкъямысдас арöсаяс моз бексö сиралöмöн оз пукавны, мед эськö пыр легöма да мыйкö пустуйтöма-вöчöма. Та серти сиктсалы кокньыдджык, лун сьöмöснас кöть йылöмыс петыштлöны горт дор йöрас пыркöдыштны ыззьöм ловсö.
А карса олысьяслы ме ньöти ог вежав, öд унджыкыс ки пыдöс пасьта оланiнын суткиясöн пукалöны-жмутвидзöны. Ме öні тöлысь нин гипса кока да, ок, кыдзи гöгöрвоа найöс. Дзик быттьö космосö шыбитöмаöсь корабльöн. Он бара-й некытчö ас окотасьыд быйкнит-чепöсйы – гöгöр стен, а петны он лысьт, верман мыйсюрöсö кöвъявны.
Коді удитіс десантöн шыбитны ассьыс быдтасъяссö бать-мам дорас ылі сикт-грездö, колöкö, сьöлöм вылас кокньыдджык. Но сэні тайö йылöмсö видзысьяслысь олöмсö кывйыд оз бергöдчы шуны ма панялöмöн: сымда терпенньö да хлыста кер кыскалан трос кызта вей-нерв колö!
* * *
Висьöм асыкаліс нин дзоньнас Му шарсö, но унаöн некыдз оз кöсйыны гöгöрвоны, мый колö йöршитчöмöн олыштны да видзчысьны сійöс разöдöмысь.
А кывйö сетчытöмъясыслы збыльысь, буди, плешкас буриника колскöбтыны, мед чипан ыджда юр вемныс пыркнитчыштас, да гöгöрвоыштасны, мый вöчсьö на гöгöр.
Владимир Шомысов.