Вöр-валöн тайö гулыд кадыс овлö тулыс пансигöн – март помын кымын. Юр весьтын кымöртортöм пыдöстöм лöз енэжас бальгöдчöма яр шонді. Кок улын чорыд лым. Ывлавывса градусник шöрын сибдöма гöрд визьыс. Абу шоныд, но и кöдзыдсö сöстöмсьыс-сöстöм сынöдсö апалігöн он кыв.
Некымын лун шондöдышталöм бöрын, колöкö, и кöдзыд зэрöн на пызьнитас, лымйыс вевттьысяс вель кыз коркаöн – чарöмöн. А ёнлуннас да пукалан кузьтанас сійö быд во торъялö. Овлывліс, сы вывті сиктса войтыр тракторöн хлыста керъяс петкöдлісны веськыда вöрсянь горт дорöдзныс дась туйöд.
Но медуна радлун сійö вайö сиктса челядьлы. Мун, кытчö кöсъян: вöрö, видз вылö, вадорö – быдлаын кок улад еджыд веркöса камнитöмин. Кодöс кватитöма вуграсян висьöм – нöбалöны ю-ты бокö палялыштöм кельчимык, ёкыш-йöрш лэпталыштны. Мойвиас кö, и гырысьджыкöс пысалан.
Но медунаöн чукöрмывлöны сикт гöгöрын кöвдумöн шлапкысьöм мыльк-чуркъяс вылö. Весиг верстьö ышмывлöны тайö кадас да сюртчывлöны челядь дорö коді доддьöн, коді кöрт ворйöн. Вывтасінъяс йöлöгаалöны челядьлöн ёсь чилзöмöн, гулыд серамöн да горзöмöн. Коді мыйöн вермö, сійöн и тöвзьö горув лым буссö кыпöдіг: пöв да фанера тор вылын, даддьöн-ворйöн-ватрушкаöн, а нинöм кö нин абу – водан да куртка мыш вылад гурöдан, коктö вылö чергöдöмöн.
Помнита, велöдчысьяскöд некымынысь тайö кадас ворслім «Зарницаысь». Öти пöрйö пажын бöрас чорыд веркöсыд небзис. А ворсім школаса став уджалысьыскöд. Вот вöлі тешыд! Кöч кодь кокни табъя челядьтö чарöмыд кыдзкö-мыйкö кутыштö на, а тупльöсджык тушаа верстьöыд бузгысьліс гöгйöдзыс. Санитаравны ковмис ставнымлы, медым кыскыны найöс фанераысь вöчöм мишеньясöн да танкъясöн туй вылöдз. Кодсюрöлы вежöрас дзик пыр и воис «Они сражались за Родину» киноысь серпасыс: чорыда доймалöм салдатöс – Сергей Бондарчукöс – тыш мунанінысь кыскö пыста кодь ичöт, гöн кодь кокни санитарка да кыз синваöн бöрдö: «Кодлы сöмын юрас воöма öш кодь тушаа мужичöйяссö война вылас босьтны?!». Миян татшöмнас вöлі школаса нималана велöдысь да гижысь Михаил Ильич Лудыков.
Öти кывйöн, чарöмыд ылöг: он кö куж видзчысьны – налькйö шедан.
Владимир Шомысов.