Утка-дзодзöгыд морт олöм дон оз сулав

Кывсьö, мый коронавирус паськалöм вöсна Комиын, кыдзи и Россияса мукöд регионын, тувсовъя кыйсьöмсö оз восьтыны.

Тайöс вöзйöма Россияса вöр-ва да гöгöртас видзöм кузя министр Дмитрий Кобылкин.

Дерт, тайö юöрыс шызьöдіс вöралысьясöс. Тувсовъя кыйсигкежлö (Комиын лунвыв районъясын утка-дзодзöг кыян сезонсö вöлі урчитöма восьтыны май 1 лунсянь) дасьтысьысьяс öні чукöртöны кырымпасъяс, мед найöс оз дзескöдны радейтана шойччöмсьыс.

Шыöдчöмын вöралысьяс пасйöмаöсь, мый утка-дзодзöгыс оз пась-кöд вируссö. А кыйсьысь оз кут торкавны самоизоляция режимсö, сы вöсна мый сійö лоö öтнас, а гортас либö вöрын – ыджыд торъялöм абу.

Коми Республикаса вöралысьяслöн котырö пырысьяс бура гöгöрвоöны чина войтырлысь коронавирус паськалöм вöсна майшасьöмсö.

Найö вöзйöны, мед лоасны стрöгджык-чорыдджык правилöяс: мед оз кут позьны районысь районö ветлыны, а сiдзжö миянкöд орчча регионъясысь татчö мед некодöс оз мöдны лэдзны. Но дзикöдз дзескöдны кыйсьысь-вöралысьясöс оз позь.

Ассьыныс шыöдчöмсö вöралысьяс йöзöдöмаöсь öтуввезйын апрель 10 лунö. Петициясö кырымалöма вель уна морт нин.

Ми шыöдчылім Коми Республикаса вöр-ва да гöгöртас видзан министерстволöн вöралан юкöнö, збыльысь-ö таво тулыс оз воссьы кыйсьöмыс?

Сэні зільысьяс вочавидзисны, мый Комиын та кузя öлöдöмыс абу на. Индöдсö вермас йöзöдны регионöн веськöдлысь. Вермас пö лоны, республикаса юралысьлысь удж вöчысь матысса кадö йöзöдас кыйсьöм-вöралöмысь öлöдана шуöмсö.

Минприродыысь чина мортлöн кывъяс серти, Россияса кызвын регионас оз кöсйыны восьтыны тувсовъя кыйсян сезонсö.

Миян суседъяс – Киров да Архангельск обласьтъясын олысьяс – тшöтш виччысьöны асланыс юралысьлысь татшöм индöдсö. А сэні, кыдзи тöдса, коронавирусöн официальнöя эрдöдöм висьысь-нёрпалысьыс Коми республикаын серти вит пöв этшаджык.

Öні пö миян медшöр могыс – сувтöдны коронавирус разалöм-паськалöмсö. А кыйсьыны-вöравны кадыс лоас на.

Регионса вöр-ва да гöгöртас видзан министерстволöн вöралан юкöнын сідзжö пасйисны, мый кыйсьысьяс вермасны висьмыны вöрö мунтöдзыс на – кыйсьöм могысь торъя кабала босьтігöн.

Сідз шусяна путёвкасö пö быдöнлы быть волöмöн колö босьтны вöралысьяслöн котырысь.

А Сыктывкарын пö воддза воясö татшöм кабалаысла луннас воліс 300 гöгöр морт, районъясын – 100.

А могмöдны ковмас 25 сюрс гöгöр вöралысьöс. Сідзкö, сэні пö и вермас кöвъясьны вирусыс. Öд некод водзвыв оз тöд, мый сыкöд вермас лоны, а сідзжö некод оз вермы ошйысьны, мый оз висьмы.

Асныравны оз ков, – öлöдісны минприродылöн вöралан юкöнын зільысьяс. Шуам, кодкö кö мöвпыштас торъя разрешениетöг лыйны дзодзöг-утка, пöтка яйнас номса-сьыштны окота лоас да, сiйöс кыскасны административнöй либö уголовнöй кывкутöмö. Нöшта на мыждасны и аснаукöн сiдз шусяна самоизоляция режим торкалöмысь.

Оз пö ков думайтны, мый государство дзескöдö вöралысьясöс. Мöдарö, сійö тöждысьö йöзлöн дзоньвидзалун вöсна. И пöткаыд пö морт олöм дон оз сулав.

                                                                                                         Екатерина МАКАРОВА.

Утка-дзодзöгыд морт олöм дон оз сулав

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх