Миян республикаын олöны уна сикас войтыр: роч, украинеч, азербайджана, армяна, татара, немеч… Талун сёрниным болгара йылысь. 2019 воын Сыктывкарын болгаралöн национально-культурнöй автономияöн веськöдлыны босьтчис Галина Костова. П.Сорокин нима Сыктывкарса университетын болгара кыв велöдысь дзик пыр лоис уна сикас гаж-аддзысьлöмö пырöдчысьöн да выль проектъяс дасьтысьöн. Сыöдз автономияöн веськöдліс Илия Данчев, коді лоис том аньлы туйдысь-отсасьысьöн.
Кыдзи болгара веськалiсны Коми муö?
Кыдзи тöдса, тайö войтырыс волісны Комиö кольöм нэмся 70-öд воясö уджавны Удора районын, кыпöдалісны уна судтаа керкаяс, челядьлы школа-садъяс, мичмöдісны йöръяс. Öдвакö кутшöмкö район сійö кадö вермис ошйысьны карса кодь кинотеатрöн да фонтанöн. Но 1990-öд воясö ставыс торксис-вежсис. Уналы ковмис бергöдчыны чужанінас.
А öд кызь сайö во олігад болгара гöтрасисны, налöн чужисны челядь. Кодкö эз мун, кольччис овны Комиын.
Öні нин налöн челядь-внукыс водзö паськöдöны ассьыныс вужъяссö.
Мыйта болгара олö республикаын талун, стöча некод оз тöд.
Бöръя, 2010 вося, перепись серти Комиын татшöмыс вöлöма матö витсё морт. Медунаöн олöны Сыктывкарын, Удора районын да Воркутаын.
Автономиялöн могъяс
Ассьыныс вужъяссö, кывкультура-традициясö видзöм могысь 2005 воын Усогорскын котыртчöма болгаралöн общество. Тавося февраль помын найö нимöдісны нин 15 вося тшупöда пас. Сыктывкарын болгара öтувтчисны национально-культурнöй автономияö (НКА) сöмын 2010 воын. Тайö вöлі медводдза автономия, кодöс регистрируйтісны Россияын.
Котырлöн медшöр могыс – видзны болгаралысь меддонаторсö: кывсö да культура-традициясö. Таысь кындзи нöшта на и сöвмöдны да вуджöдны тайö озырлунсö быдмысь войтырлы, велöдны найöс овны мукöд войтыркöд öтвылысь шаня да зыксьытöг.
Котыр нуöдö уна сикас аддзысьлöм-гаж. Тайö и республикаса челядьлы С.Я.Маршак нима библиотекаын том лыддьысьысьяскöд аддзысьлöмъяс; Коми Республикаын болгаралöн лунъяс, кытчö пырöдчылöны и Удораын олысь болгара; республикаын олысь болгаралöн челядькöд фотосессияяс.
Быд во П.Сорокин нима Сыктывкарса канму университетсакöд öтув котыртлöны научнöй конференцияяс, кытчö волöны и суйöр сайын олысь болгара. 2018 вося сентябрын автономия озырмис «Дивна роза» творчествоа котырöн, коді азыма пырöдчö юркарса культура олöмö. Топыда уджалöны и Москваын болгаралöн культура институткöд.
Музей
Таво автономия бердын воссис музей. Сэні нёль тематическöй стенд. Öти тöдмöдö историяöн сійö кадсянь, кор медводдза фракиец волöма болгаралöн муö, да талунъя лунöдз. Культуралы сиöмын паськыда висьтавсьö кыв, шылад, хоро, сёян-юан, сёйысь вöчасьöм, кысьöм да вышивайтчöм йылысь. Коймöд стендсьыс позьö аддзыны важ снимокъяс да архивса документъяс, висьтавсьö и Коми да Болгария костын ёртасьöм йылысь. Нёльöдсö сиöма Сыктывкарлöн вок карлы – Ловечлы. Тайö юкöныс ёна на паськалас, öд Ловечса общинакöд йитöд-ёртасьöмыс сöвмö. Чукöртöма нин альбом дасьтöм могысь снимокъяс.
А музейын петкöдланторйыс восьтö Болгариялысь мичлунсö да аслыспöлöслунсö. Тані и болгара гаж дырйи вöдитчанаторъяс: кукер, сурвачки, писанка, мартеница, роза. Чукöртöмаöсь найöс автономияын водзмöстчысьяс. Найö жö вермасны дугдывтöг висьтавны-тöдмöдны национальнöй паськöмлöн аслыспöлöслунöн, сёйысь тасьті-паньöн, кодöс зэв аслысногöн мичмöдöма-серпасалöма, торъялана вышивкаа салфеткаясöн да уна мукöдторйöн.
Водзмöстчöны-зiльöны и томулов
Верстьöджык активистъяскöд öтув зільöны и томулов: студентъяс, школаын велöдчысьяс, челядь.
Унакöд лои сёрнитöма-юасьöма. Но менö шензьöдіс посниджыкъяслöн висьталöмторйыс – Комиын пö ми абу гöсьтъяс.
Ныв-зон нимкодьпырысь вöччöны болгаралöн национальнöй паськöмö, велöдчöны йöктыны хоро – öтувъя танец, кöні йöктысьяс кутчысьöны кинас либö ёрта-ёртыслы коскас, ворсöны йöзкостса инструментъясöн.
Болгаралöн нималана волынка – гайды – юргö зэв мичаа да быдöнлысь вöрзьöдö сьöлöм-ловсö. Сытöг оз коль ни öти гаж да кыпыд аддзыслöм.
Болгаралöн сёян-юантор йылысь позьö нöшта на унджык гижны. Сэні уна град выв пуктас, йöла вöлöга, яй, чери да, дерт жö, быдсикас специя.
Надежда ПУНЕГОВА.