Миян Одыб сиктын Ыджыд война кадö тылын Победа дорысьыс коли 23 морт. Неважöн мунiс таладоръюгыдсьыс Анна Васильевна Габова.
Тылын зiльысь-мырсьысьяс пöвстын талун медся ыджыд арлыдаыс Лидия Петровна Эргардт, кодi чужлöма 1926 воын.
Лидия Петровна йылысь ме гижлi Кöрткерöс районса «Звезда» газетын «Шудныс вöлöма Одыбын» да «Биа изъя кодь топыдöсь да ёнöсь» статьяясын.
А медтомыс, шуам тадзи, — 86 арöса Евдокия Ивановна Михайлова.
Неважöн ми, Одыбса ветеранъяслöн сöветö пырысьяс, олöма йöзлöн тайö котырнас юрнуöдысь Галина Валентиновна Ногтевакöд да сиктса администрацияöн веськöдлысь Нина Степановна Изъюровакöд волiм война кадö тылын мырсьысь-уджалысьяс дорö гортаныс да бы-дöнöс кыпыда чолöмалiм матыстчысь Победа лунöн, пысалiм морöсаныс Ыджыд Вермöмсянь 75 во тырöм-кöд йитöдын юбилейнöй медальяс, сетiм юмов козинъяс да ловъя дзоридзьяс.
Кутшöм нимкодь вöлi олöма войтырлы, мый найöс талун оз вунöдны, аттьöалöны да медальöн пасйöны вир кисьтана война кадö сьöкыдысь-сьöкыд уджöн Победа матыстöмö ыджыд пай пуктöмысь.
Тылын Победа дорысьяс ордö волiгöн нöшта на и сьöрысь гудöк босьтлiм, накöд тшöтш ливкйöдлiм война кадся коми да роч сьыланкывъяс. Олöма аньяслöн синваыс доршасис, кор казьтылiсны сэкся сьöкыд кадсö. Оз тай вушйы паметьысь, оз вун ни помасьлытöм уджыс, ни тшыг нисьö пöт олöмыс, кач да идзас сорöн пöжалöм нянь сёйöмыс…
На пиысь быдöн йылысь кöть торъя висьт гиж. И колö эськö быть тайöс вöчны, мед том войтыр тöдiсны да некор эз вунöдны, кутшöм сьöкыда шедiс миян бать-мамлы да пöль-пöчлы Айму вöсна Ыджыд тышын Вермöмыс.
Геннадий Попов.
Кöрткерöс р.