Март 31 лунö Изьва районса администрацияын кыпыда чолöмалісны Зинаида Липинаöс, коді лоис лызьöн котралöм кузя Россияысь спортса мастерöн. Районса юралысьлысь удж вöчысь, администрацияöн веськöдлысь Роман Селиверстов сетіс сылы почёт ним йылысь удостоверение да морöсвывса пас, сиис спортын гырысь вермöмъяс.
—Районлы тайö зэв тöдчана лоöмтор. Öд нелямын гöгöр во нин лызьöн котралöм кузя спортса мастеръяс пиын эз вöвны Изьва вожысь петöм нывъяс. Бöръяысьсö тайö почёт нимсö сетлісны Мокчойысь Альбина Беляевалы кольöм нэмся 80-öд воясын на, — том лыжницаöс чолöмалігöн пасйис районса администрацияысь физкультура да спорт юкöнöн веськöдлысь Валерий Рочев. — Öні лызьöн котралöм кузя спортса нелямын мастер пиысь кöкъямысыс — Изьва районысь.
Зина гижсьöма лызьöн котралан секцияö, кор велöдчöма Бакур сиктса школа- ын коймöд классын на. Енбиа нывкаöс казялöма спортшколаса тренер Леонид Терентьев. Витöд классын нин Зина лоöма медтэрыбöн районса тшупöдын ордйысигöн. 2009-öд воын сійöс босьтöмаöсь районса сборнöйö, а нöшта во мысти шедöдöма медвылыс, верстьö нин разряд. 2011-öдын öкмысöд класса велöдчысь вöлöма нин Коми Республикаса том лыжникъяслöн сборнöйын. 2013 восянь — спортса мастерö кандидат.
Быдлунъя тренировкаяс, районса, республикаса ордйысьöмъяс вылö видзöдтöг Зина бура помаліс школа, а 2018 воын сылы сетісны физкультура, спорт да туризм кузя Смоленскса госакадемия помалöм йылысь гöрд диплом. Öні Зина Липина велöдчö Челябинскын Лунвыв-Изса госуниверситетлöн магистратураын.
—Казьтышта, Зиналöн эм нин лямпаöн котралöм кузя национальнöй спорт сикасса мастер ним, — висьталіс Валерий Рочев. — Сійö и школа помалöм бöрас пыр котраліс миян район вöсна, и таöн ёна содтывліс сиктса районъяс костын спартакиадаясын очкояс. Зина пыр «висьö» изьватас спортсменъяс вöсна.
Райадминистрацияын тайö жö лунас спортсменъясöс бура дасьтöмысь аттьöалана письмö сетісны Зина Липиналöн медводдза тренер Леонид Терентьевлы. Изьваса ДЮСШ-ысь енбиа велöдысь да бур наставник тренералö 40 сайö во нин. Сійö пыр видзöдö, кыдзи «бордъясьöны» быдтасъясыс, нимкодясьö налöн вермöмъясöн.
—Талун лызьöн котравны велöда 30 ныв-зонмöс. На лыдын эмöсь и аскиа бур спортсменъяс. Водзті Зина кодь быдтасъяслöн олöмас вöлі кутшöмкö мог, и ковмывліс неуна öлöдны найöс, кутны вывті зільöмсьыс, а талун, мöдарö, кодсюрööс бöрсяньыс вöтлöмöн öддзöдам, — юксис аслас мöвпъясöн Леонид Александрович.
Чолöмалана кывъяс бöрын удайтчис сёрнитыштны Зинаида Липинакöд.
—Зинаида, а мый тэнад олöмын спортыс да лызьöн котралöмыс?
—Тайö и эм менам олöмыс. Öти морт быд лун мунö удж вылö, мöд —велöдчö, а ме тöв и гожöм, тулыс и ар — тренировка вылö. Ме и думыштны ог вермы, кöні да кутшöм специальносьт серти сямми эськö уджавны. И кöть кутшöм тшупöдöдз ог во, водзö олöмöс йита сöмын спорткöд.
—А лызьöн котралöмысь öтдор, мыйкö кужан вöчны? Прöст кадад он öд кыккирудз пукав?
—Радейта лыддьыны фантастика, фэнтези. Сямма кыны носки-кепысь, вышивайтчыны. А кор волывла чужанінö, отсала бергöдны гортгöгöр удж. Гожöмнас турун пуктам, арнас — картупель идралам, тшак-вотöс заптам. Нöшта радейта кыйны чери. Кольöм во лэпті вит килоа сир!
—Сборнöйын ті ёртасянныд öта-мöдныдкöд?
—Кор вермасям республика тшупöдын, ми, кыдз шуласны, конкурентъяс. Но кор ордйысям регионсянь, ми нин — öти команда. Сэки збыльысь «висям» ёрта-ёрт вöсна.
—Кутшöм вермöм лыддян медся ыджыдöн? И мый медся тöдчанаыс спортын?
—Чайта, мый став вермöмыс зэв тöдчана. Мыйкö торйöдны эг эськö мöд. Быд ордйысигöн майшасян, пуктан став вынтö, медым котöртны медöдйö.
И спортын сьöкыд торйöдны медся колана да тöдчанасö. Кыдз шуласны, серпасыс артмö уна лестукысь. Мыйöнкö öтиторйöн шедöдöмыд оз ло.
Сöмын кöсйöмыд этша на, абу кö дзоньвидзалуныд. Сэк жö сöмын вын-эбöсöн гырысь вермöмыд оз шед, колö велöдчыны.
Зэв ёна колöны бать-мамлöн, тöдсаяслöн ышöдöмыс да, дерт жö, тренерлöн индöдъяс. Та вöсна ассьым тренеръясöс да торйöн нин Леонид Александровичöс аттьöала тöлка индöдъясысь да восьса сьöлöмысь.
* * *
Тавося март 30 лунö Россияысь спортса министр Олег Матыцин кырымаліс приказ, код серти войтыркост спортса мастер ним сетісны тшöтш Коми Республикаысь лызьöн котралысьяс Ирина Губерлы да Иван Мартюшевлы.
Спортса мастеръясöн лоисны и Комиысь пауэрлифтер Александра Быстрова, бертчысь Владислав Замараев, а сідзжö Роман Королев да Алексей Перетягин, кодъяс пырöдчöны спорта туризмö.