Кызвын уджсӧ вӧчӧмаӧсь-бергӧдӧмаӧсь

Комиысь стрӧитчӧм да туй овмӧс министерствоысь пресс-службалӧн юӧр серти, экспертъяс видзӧдлӧмаӧсь, кыдзи кыпалӧны Эжваын Емваль микрорайонын 270 зонпосни вылӧ артыштӧм детсад да Сыктывкар бердса Гӧрд Затон посёлокын 600 велӧдчысьлы школа.

Юркарса администрацияӧн веськӧдлысь Наталья Хозяиновакӧд тшӧтш стройплощадкаясас волӧмаӧсь регионысь стрӧитчӧм да туй овмӧс кузя министрӧс вежысь Антон Анисимов, велӧдӧм, наука да том йӧзлӧн политика кузя министрӧс вежысь Руслан Ибрагимов, архитектура, карын стрӧитчӧм да муӧн вӧдитчӧм кузя управлениеӧн юрнуӧдысь Владимир Осипов, юркарын капитальнӧя стрӧитчан управлениеса директор Александр Садовский да «Альфа-Строй» пӧдрадчик-компанияса директор Роман Зыкин.

Казьтыштам, Гӧрд Затонын выль велӧдчанінсӧ стрӧитны заводитӧмаӧсь кольӧм во февральын. Ортсыса кызвын уджсӧ вӧчӧмаӧсь нин да босьтчӧмаӧсь пытшкӧссаас: нюжӧдӧны электропроводка, ладмӧдӧны вентиляция, сантехоборудование да с.в.

Контракт серти стрӧитчан уджсӧ шуӧма помавны тавося июль 31 лунӧдз.

Эжваса Емваль микрорайонын выль детсадсӧ панӧмаӧсь мӧйму жӧ ноябрын. Проект сертиыс сійӧ лоас куим судтаа. Сэні шуӧма вӧчны и спортзал да неыджыд бассейн, кӧні зонпосни кутасны уялӧмӧн тшӧтш ёнмӧдны дзоньвидзалунсӧ. Став стрӧитчан уджсӧ да сідз шусяна монтажсӧ помавны урчитӧма октябрӧдз.

Пӧдрадчиккӧд аддзысьлігӧн юркарса администрацияӧн веськӧдлысь пасйис, мый татшӧм социальнӧй проектъяссӧ збыльмӧдігӧн зэв тӧдчана, медым министерство-ведомствояссянь ас кадӧ вичмис кыдз сьӧма, сідз и выль стрӧйбаяс кыпӧдігӧн мытшӧд-падмӧгсӧ венӧм могысь отсӧг.

Кызвын уджсӧ вӧчӧмаӧсь-бергӧдӧмаӧсь

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх