Кагаыд шуда, кор бать-мамыс орччӧнӧсь

Комиын МВД бердын общественнӧй сӧветӧн веськӧдлысь Галина Кисел ёвалӧн видзӧдлас серти, бать-мамлӧн дӧзьӧртӧг кольӧм челядь некутшӧм, весиг медся бур интернатын да детдомын, оз вермыны лоны гортаныс, семьяын быдмысьяс кодь шудаӧсь.

Казьтыштам, семьяӧс да челядьӧс социальнӧя дорйӧм йылысь зэв тӧдчана сёрни вӧлі Россияса Госдумаын РФ-са Оланподулӧ пыртӧм могысь вӧзйӧм вежсьӧмъяс видлаліг-донъялігӧн.

–Менам общественнӧй уджӧй кызвыннас йитчӧма семья да челядь вӧсна тӧжд-могкӧд, – висьталіс Галина Киселёва. – Тайӧ юалӧмъяс кузяыс ми топыд йитӧд кутам республикаса МВДкӧд, тыр арлыдтӧмъяслысь делӧяс туялан комиссиякӧд. И тшӧкыда ковмывлӧ миянлы майшасьны, кор сёрниыс мунӧ омӧль оласнога бать-мамлысь быдтасъяссӧ мырддьӧм да интернат-детдомӧ иналӧм йылысь. Тадзи жӧ вӧлі, кор тӧдмалім, мый Оланподулӧ вӧзйӧм вежсьӧмъясысь ӧтиын челядьӧс шуӧмаӧсь «важнейшим достоянием государства». Но «достояние» кывсӧ ӧд ми гӧгӧрвоам ёнджыкасӧ кыдзи «эмбур». А челядь оз вермыны лоны государстволӧн эмбурӧн, и государство оз вермы вежны налы бать-мамсӧ. Бур, мый талун Россияын олысьяслы абу веськодь, кыдзи миян странаын донъялӧны семьяӧс да челядьӧс. И йӧзлысь видзӧдлассӧ быть колӧ кутны тӧд вылын, торйӧн нин сёрниыс кӧ мунӧ Оланподулӧ такӧд йитӧдын вежсьӧмъяс пыртӧм йылысь. Та понда депутатъяс шуӧмаӧсь вежны «достояние» кывсӧ, да Конституцияӧ пыртӧм могысь вӧзйӧм вежсьӧмъяс серти государство

лоӧ «кагалысь правояс дорйысьӧн». А кагалӧн медшӧр инӧдыс – овны-быдмыны семьяын.

Галина Киселёва казьтыштіс и «отцовство» кыв да пасйис, мый государстволы колӧ дорйыны семьяӧс, кӧні челядьлӧн эм и бать, и мам, кодъяс лоӧны ичӧт мортлы медся матысса да дона йӧзӧн. Буретш бать да мам кывкутӧны ныв-пинысӧ бура быдтӧм-воспитайтӧм вӧсна, тӧждысьӧны на вӧсна, туйдӧны-велӧдӧны челядьнысӧ радейтны да пыдди пуктыны ӧта-мӧднысӧ, бать-мамсӧ, пӧль-пӧчсӧ, сяммыны вӧчны быдсикас удж.

Выльмӧдӧм Оланподув серти, Россия Федерация да РФ-са субъектъяс ӧтув кутасны видлавны мамӧс, батьӧс да челядьӧс дорйӧм кузя юалӧмъяссӧ. И, видзӧдӧм серти, такӧд йитӧдын ковмас ыджыд удж вӧчны и Семья кодекс да мукӧд оланпас бурмӧдӧм могысь.

–Медся тӧдчана, медым тайӧ оланпасъясыс сетісны позянлун помӧдз дорйыны семьяӧс, медым кагакӧд орччӧнӧсь пыр вӧліны бать-мамыс. А лоис кӧ нин сідз, мый дзолюк коли

бать-мамыслӧн дӧзьӧртӧг, сійӧс быдтынысӧ колӧ сетны позянлун ыджыд мам-ыджыд батьыслы, пӧль-пӧчыслы, мукӧд медся матысса рӧдвужыслы. А интернатӧ да детдомӧ ичӧт мортӧс иналӧм йылысь сёрнисӧ панны сӧмын сэк, кор сылӧн абуӧсь татшӧм матыссаясыс

да рӧдвужыс, – кывкӧрталіс ассьыс видзӧдлассӧ Галина Киселёва.

* * *

Семьяӧс да челядьӧс дорйӧм йылысь Оланподулӧ пыртӧм могысь вӧзйӧм вежсьӧмъяссӧ ошкӧ и Сыктывкарса 42-ӧд номера детсадйӧн веськӧдлысь Галина Сажина, – юӧртӧ «БНКоми» агентство.

Оланподулын шуӧма вынсьӧдны, мый челядь зэв тӧдчанаӧсь страналы, и государстволы колӧ вӧчны ставсӧ сы могысь, медым быдмысь войтыр сӧвмисны духовнӧя, нравственнӧя, босьтісны зумыд да бур тӧдӧмлун, вӧліны дзоньвидзаӧсь, радейтісны Чужан мусӧ, пыдди пуктісны верстьӧ да ыджыд арлыда йӧзӧс.

Федерациялы субъектъяскӧд ӧтувколӧ дорйыны семьяӧс, мам-батьӧс да челядьӧс.

–Государстволӧн могыс – вӧчны став коланасӧ, медым бать-мам вермисны лючки быдтыны-дӧзьӧритны челядьсӧ, а верстяммӧм бӧрас налӧн нин вӧлі позянлун тӧждысьны ыджыд арлыда матыссаяс вӧснаыс, – вайӧдӧ «БНК» Галина Сажиналысь кывъяссӧ. – Ӧнія

Оланподулас абу казьтыштӧма та йылысь, гижӧма сӧмын, мый челядь вӧсна колӧ тӧждысьны бать-мамыслы, а уджавны вермытӧм бать-мам вӧсна – челядьыслы. Зэв тӧдчана, мый Конституцияӧ вӧзйӧм вежсьӧмъяс серти государстволӧн могыс абу сӧмын дорйыны

зонпосниӧс, но и отсавны бать-мамыслы бура быдтыны найӧс.

Кагаыд шуда, кор бать-мамыс орччӧнӧсь

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх