Культура кывлӧн вежӧртасыс зэв паськыд. Сійӧ пыр сӧвмӧ, паськалӧ, дугдывтӧг вежласьӧ мортлӧн олігчӧжыс. Стӧчджыка кӧ, тайӧ вежавидзӧм, олан этш, бурӧ кутчысьӧм, мортлӧн ыджыд мывкыдлун, авъялун, тӧдӧмлун босьтӧм, коланаторъяс тырмӧм, эмбур вӧсна кывкутӧм, кужанлун-сям сӧвмӧдӧм да, дерт, обычай-традицияӧ кутчысьӧм.
Зэв стӧча та йылысь шуис Д.С.Лихачев: «Культура – тайӧ вежласьтӧм зэв ыджыд петкӧдчӧм, коді вӧчӧ кутшӧмкӧ инын олысьясӧс, прӧстӧй йӧзсӧ – войтырӧн. Культура кыв гӧгӧрвоӧмас пырсӧ вӧліны и эм: Енлы эскӧм, наука, велӧдӧм, йӧзлӧн да канмулӧн бурӧ кутчысян этш да мывкыдлун».
А сёрнитны кӧ, шуам, культура керка йылысь – тайӧ шойччанін, кӧні кыпалан ловнад, кӧні верман варовитыштны ёртъясыдкӧд, артисталыштны да аслад видзан-быдтанторъясыдлӧн сцена вылын петкӧдчӧмнас нимкодясьыштны. Либӧ пышйывны татчӧ мынтӧдчывны голяад шашаритчӧм помасьлытӧм гортса ноксьыс. И медшӧр могыс культураын мырсьысьяслӧн – вайны йӧзлы радлун, пыр бергавны на гӧгӧр, варовитны да воӧдчыны ӧти кывйӧ став арлыдаыскӧд, быдпӧлӧс видзӧдласаыскӧд да эскӧмаыскӧд.
Екатерина Алексеевна Шебырева (снимок вылын шуйгавылас) 2007 восянь веськӧдлӧ Кулӧмдін районысь Пожӧгса культура керкаын культура юкӧнӧн, Евдокия Алексеевна Килат (шӧрас) – 2015 восянь сэні юрнуӧдысь. Кыкнанныс В.Т.Чисталёв нима культура колледжса быдтасъяс. Налӧн зільӧмӧн чужисны-артмисны верстьӧлы «Задоринка» йӧктан, «Шудлун» да «Визув шор» сьылан да «Йӧлӧга» шмоньӧн петкӧдчысь котыръяс. Ичӧтджык арлыдаяс прӧст кадӧ котралӧны «Непоседа» да «Журавушка» йӧктан, «Капелька», «Веснянка» да «Беби-бум» сьылан котыръясӧ. Ставныслӧн налӧн юркарын, юрсиктын да районса сикт-посёлокъясын оръявлытӧг помасьлытӧм петкӧдчӧм, фестиваль, вермасьӧм да мастер-класс: «Коми кыв дінӧ муслунӧн», «Югыд чой», «Изкар», «Победалӧн тулыс», «Армияса микрофон», «Сьыла тэныд, менам Россия»…
Владимир Шомысов.