Уна-ӧ школа вермас ошйысьны мужичӧй-велӧдысьясӧн? Мед нин, шуам, сюрас физкультура, ОБЖ, технология да сорас вылас мукӧд предметысь тӧдӧмлун душ-мӧд сетысь. Да и тайӧ велӧданторъяссӧ сийӧсалісны нин нывбаба пельпом вылӧ. Мыйысь медъёна полӧ да зільӧ мынтӧдчыны мужичӧй-педагог?
Кабалаясын помтӧг лукйысьӧмысь да сэтчӧ ӧтторъя мыйкӧ парсалӧмысь. Ӧти кывйӧн кӧ, нинӧм абу вылас сідз нин тырмытӧм кадсӧ лотӧмысь. Некымын во сайын республикаысь велӧдысь котыр ветлім Йошкар-Олаӧ тӧдмасьны сэтчӧс школа-садйын, вылыс тшупӧда велӧдчанінъясын да велӧдан министерствоын уджӧн. Новлӧдлісны Марий Эл пасьтала, и мый шыбитчис синмӧ, да и сэні уджалысьясыс та вылӧ индісны: «Ми ассьыным мужичӧйясӧс пыдди пуктам да ӧбидаӧ ог сетӧй. Найӧ сідз нин этшаӧнӧсь да, корсям петан туйяс, медым мужичӧйяс уджалісны да бура нажӧвитісны. Ӧд найӧ семья кутысь-вердысьяс, да и велӧданінад челядьыд натӧг батьтӧм кодьӧсь, а тайӧ зэв ёна мӧрччӧ торйӧн нин зонпоснилӧн быдмӧм-сӧвмӧм вылӧ». Василий Михайлович Сенькинӧс позьӧ шуны Кулӧмдін районысь Пожӧгса школалӧн электроннӧй юр вемӧн. Став программаыс, электроннӧя велӧдӧмыс, челядьӧс донъялӧмыс, школаӧ вайӧм выль гаджетыс мунӧ сылӧн ки пыр. И педагогъяслӧн сійӧ туйдысь-индысьыс, быд лун кодлыкӧ да кодлыкӧ мыччӧ электроннӧй гыясӧ вӧйӧмысь спасжилет.
Владимир Шомысов.