Асьнысӧ оз бара-й мудзтӧдны

Сыктывкарын олысьяс норасьӧмаӧсь Комиын ставроссияса Народнӧй фронтлӧн юкӧнын зільысь-водзмӧстчысьяслы, коммунальщикъяс пӧ уна керка вевт вылысь лымсӧ оз весавны ни йинёньсӧ оз гылӧдны. Юр вылад кӧ пӧ туктаыс усяс, доймыны да весиг кувны верман.

Та бӧрын Народнӧй фронтса общественникъяс кытшовтісны карса микрорайонъясті да казялісны, мый уна патераа олан керкаясӧн веськӧдлан компанияяс оз мудзтӧдны асьнысӧ: вевт весалӧм пыдди керка стенъясӧ ӧшлӧны «Видзчысь! Лым тукта усяс!» гижӧд. Весиг гожӧмнас оз волы юраныс, мый гижӧдсӧ колӧ эськӧ нетшыштлыны… Усяс кӧ код вылӧ кӧ туктаыс, соссясны: ми пӧ ӧлӧдлім вевт увтіыс ветлӧмсьыс, мед гижӧднымӧс лыддисны дай.

Общественникъяслӧн шыӧдчӧм бӧрын Сыктывкарса администрацияысь жилищно-коммунальнӧй овмӧс управление кыскӧма кывкутӧмӧ Катаев, Оплеснин, 28-ӧд Невельскӧй дивизия, Карл Маркс да Юхнин уличаясса керкаясӧн веськӧдлан компанияясысь чина йӧзӧс. Тшӧтш и казьтыштӧмаӧсь налы, вевтъяс вылысь лымйисӧ пӧ ас кадӧ колӧ весавны.

–Комиын Народнӧй фронтлӧн юкӧн бур боксянь пасйӧ, мый общественникъяслӧн шыӧдчӧм бӧрын Сыктывкарса администрация нюжмасьтӧг ӧлӧдіс коммунальщикъясӧс, – висьталіс ОНФ-лӧн регионса штабӧ пырысь Валентина Анфилатова. – Но ми и водзӧ кутам синйыны, весалӧны-ӧ керка вевтъяссӧ. Ӧні шоныдалӧ да, лымйыс ӧдйӧ йизьӧ. Гоз-мӧд лун сайын на Сыктывкарса университетлӧн вевт вылысь лымйыс усьӧма студент вылӧ. Ми кӧсъям кытшовтны карса став велӧдчанінсӧ да, казялам кӧ тырмытӧмторъяс, пыр жӧ юӧртам администрацияӧ.

Асьнысӧ оз бара-й мудзтӧдны

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх