Сиктса йӧзлы – став коланасӧ да тӧдчанасӧ

 Эжва йывса парма-ягын медся уна угоддьӧ кӧртымалӧ да медся уна жӧ вӧр заптӧ «Монди Сыктывкарса ЛПК» акционер котыр.Февральын Кулӧмдін районса администрацияын чукӧртчылӧм дырйи сёрниыс муніс вӧр овмӧсын буретш тайӧ нималана предприятиеыслӧн да сылӧн котыръяслӧн уджалӧм йылысь.

Аддзысьлӧм вылас вӧліны «Монди Сыктывкарса ЛПК»-ын службаясӧн веськӧдлысьяс, райадминистрацияӧн веськӧдлысь С.В.Рубан, сійӧс первой вежысь Е.А.Стяжкина, овмӧдчӧминъясса юралысьяс, лесничествоясӧн юрнуӧдысьяс, общественнӧй котыръясын зільысьяс да асшӧр уджалысьяс. «Монди СЛПК» акционер котырысь вӧрӧн вӧдитчан службаса начальник А.В.Зайцев висьталіс, кыдзи налӧн предприятиеыс уджаліс Кулӧмдін районын кольӧм во.

Быд во лесничествояскӧд кырымалӧны сёрнитчӧм, кӧні урчитӧны, кутшӧм кадӧн уна-ӧ заптасны вӧрсӧ. Став пӧрӧдчӧминас выльысь садитӧны пуяс. Ыджыд тӧдчанлун сетӧны парма-ягын биысь видзчысьӧмлы. Тадзи жӧ уджалӧны вӧр промышленносьтса тайӧ комплексас уджавны медасьӧм котыръяс.

Вӧчӧны и туйяс. Кольӧм во сёрнитчӧм серти збыльмӧдісны ставсӧ, мый вӧлі урчитӧма. Делянкаясын пӧрӧдчӧм кузя юӧръяссӧ ыстӧны районса да овмӧдчӧминса администрацияясӧ. Тӧд вылӧ босьтӧны вотчанінъяс, вӧраланінъяс, мед вӧр пӧрӧдан-заптан уджыс эзджык мӧрччы татшӧм угоддьӧяс вылас.

«Монди СЛПК» котырлӧн Асыввыв юкӧнысь Вылыс Эжва участокӧн веськӧдлысь М.В.Игнатов висьталіс тавося да локтан тӧлын асланыс удж йылысь.

С.В.Рубан пасйис, мый «Монди СЛПК»-кӧд ёртасьӧм йылысь сёрнитчӧмыс зэв тӧдчана районлы. Сы вылӧ подуласьӧмӧн унатор вӧчсьӧ экономика, видз-му овмӧс да социальнӧй юкӧн сӧвмӧдӧм могысь.

Сідз, «Помӧсдін» кооператив СЛПК отсӧгӧн кыпӧдіс выль скӧт карта.

«Оптима Лес» котыр да асшӧр уджалысь Р.В.Третьяков ньӧбисны сӧвтчан агрегата тракторъяс. Мӧдӧд во дорвыв сьӧма отсӧг вичмис Ягкӧджысь крестьянин овмӧс кутысь В.А.Черкасовлы. Воддза воын сійӧ босьтіс трактор, кольӧм во – тайӧ техника дорас улича-туйяс идравны-весавны содтӧд оборудование. Техникасӧ уджӧдӧ оз сӧмын ас вылас, но и овмӧдчӧминса администрациялы отсалӧ дӧзьӧритны туйяс.

Районын медся водзмӧстчысь крестьянин овмӧс кутысьяс лыдын – Тымсерысь Н.В.Паршуков, кодлы вичмис видз-му овмӧс техника ньӧбӧм вылӧ сьӧм. Зимстанысь асшӧр уджалысь А.А.Хабузов аслас пилорамаӧ босьтіс содтӧд оборудование. Тайӧ посёлоксьыс жӧ «Зырянин» котыр кӧсйӧ восьтыны арбалитысь блок вӧчанін. Сьӧма отсӧг вылас шуис дзоньтавны оборудованиесӧ сувтӧдан ангар.

2018 воын районса администрация «Монди Сыктывкарса ЛПК»-лысь босьтіс понтон. Сёрнитчӧм серти сыысь колӧ вештысьны вит воӧн. Таво кежлӧ шуисны мынтыны 300 сюрс шайт.

Ёртасьӧм йылысь сёрнитчӧм серти жӧ тӧдчана отсӧг вичмӧ социальнӧй юкӧнлы. Ыджыд удж бергӧдісны Кулӧмдінса шӧр школаын. Сэні вежлалісны-выльмӧдісны сантехника, вужвыйӧныс дзоньталісны актӧвӧй зал, кӧні вежисны джоджсӧ, сценасӧ, пуктісны пластик ӧшиньяс, сувтӧдісны кӧрт ӧдзӧсъяс, ньӧбисны да вурисны выль занавесъяс.

«Монди СЛПК» отсӧгӧн жӧ нюжӧдісны ва трубаяс да лӧсьӧдісны канализация Улыс Вочса да Немдінса детсадъясын. Вылыс Вочса садйын вежисны и вевтсӧ. Выль вевта ӧні и Кужса культура керка.

Югыдъягын разисны кык судтаа важ школа. Сы пыдди кӧсйӧны вӧчны ёнмӧдчанін. Проектыс эм нин, но колӧ на донъявны. Тадзи жӧ Вӧльдінын выль клуб кыпӧдӧм кузя. Ставыс кӧ лоас бур, мӧд во босьтчасны сійӧс стрӧитны.

Сьӧм вичмис и Эжва йывса сикт-грездын тшупӧда паса гажъяс нуӧдӧм вылӧ. Таысь кындзи вӧр овмӧсын нелямын вӧвлӧм уджалысь шойччисны-ёнмӧдчисны «Монди СЛПК»-лӧн санаторий-профилакторийын.

Кулӧмдін районса администрацияӧн веськӧдлысьяс депутатъяскӧд, овмӧдчӧминъясса юралысьяскӧд да водзмӧстчысь йӧзкӧд аддзысьлігӧн донъялӧны вӧзйӧм проектъяслысь коланлунсӧ да тӧдчанлунсӧ да бӧрйӧны сійӧ либӧ мӧд сикт-посёлоклы медся лӧсяланасӧ, кодӧс позьӧ пӧртны олӧмӧ «Монди СЛПК» отсӧгӧн.

Таво шуисны сетны сьӧм зумыда нин кок йылас сулалысь крестьянин овмӧс кутысь С.А.Тимушевлы, коді Дон сиктын кыпӧдӧ 100 юр вылӧ скӧт карта. Урчитісны куим во отсавны йӧзӧс автобусӧн новлӧдлысьяслы.

Колӧ водзӧ отсавны и Зимстанысь «Зырянин» котырлы ньӧбны арбалитысь блок вӧчанінӧ оборудование. Артыштны сьӧм понтонысь вештысьӧм вылӧ.

Социальнӧй юкӧнын бӧрйисны Ручса да Дереваннӧйса школаяс, Югыдъягса культура керка, кӧні колӧ вежлавны-выльмӧдны вевт. Водзӧ отсаласны дзоньтавны Кулӧмдінса школа, кӧні тшӧкыда быдсикас аддзысьлӧм вылӧ чукӧртчылӧны Эжва йывса школаясысь велӧдчысьяс да велӧдысьяс.

Райадминистрация сёрнитчис «Монди СЛПК»-кӧд да, сійӧ вуджӧдас районлы Югыдъягысь да Помӧсдінысь ассьыс стрӧйбаяссӧ. Помӧсдінын вӧвлӧм контораыс лӧсялӧ школаын мукӧд сикт-грездысь велӧдчысьяслы интернат улӧ. Югыдъягын туй морт керкаын лоас посёлоксаӧс недыр кад кежлӧ овмӧданін. Татшӧмыс сэні зэв колана. Регыд на посёлокас сотчис уна патераа керка, да сэні олысьяс колисны юрсюянінтӧг да эмбуртӧг.

Кыдзи и кольӧм воясӧ, вӧр промышленносьтса предприятиелӧн санаторий-профилакторийын шойччас-ёнмӧдчас нелямын морт.

«Монди Сыктывкарса ЛПК» акционер котырын вӧрӧн вӧдитчан службаысь сертификация да экология юкӧнса начальник М.П.Королева юӧртіс, мый тавосянь кутасны сетавны сертификат, мед босьтны профилакторийӧ путёвка. Та могысь вӧр овмӧсса вӧвлӧм уджалысьяслы позяс шыӧдчыны районса ветеранъяслӧн котырӧ. Сэсянь став документ-кабаласӧ сетасны Сыктывкарса ЛПК-лӧн Асыввыв юкӧнысь Вылыс Эжва участокса профсоюз организация, кӧні и кывкӧрталасны, кодъяслы медвойдӧр колӧ ёнмӧдны санаторий-профилакторийын дзоньвидзалунсӧ.

Аддзысьлӧм вылас «Монди СЛПК»-ысь воӧмаяс вочавидзисны чукӧртчӧмаяслӧн юалӧмъяс вылӧ, босьтісны тӧд вылӧ налысь вӧзйӧмъяс да корӧмъяс.Марина Дадашова.Авторлӧн снимокъяс вылын (шуйгавывсянь): Марина Королева, Алексей Зайцев да Сергей Рубан; Кулӧмдінса шӧр школаын дзоньталӧм-выльмӧдӧм актӧвӧй зал; асшӧр уджалысь Р.В.Третьяков аслас выль техника дорын.

Сиктса йӧзлы – став коланасӧ да тӧдчанасӧ

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх