А, гашкӧ, пӧимӧн?

Борщевиклы паныд тышкасьӧм йылысь сёрни муніс Госсӧветын республикаса сӧветъясӧн веськӧдлысьяслӧн сӧветлӧн семинар дырйи.

Коми парламентӧн веськӧдлысьӧс вежысь Василий Смалий казьтыштіс, мый 2019 вося апрельын вынсьӧдлісны «О некоторых вопросах благоустройства территорий отдельных муниципальных образований в Республике Коми» оланпас, код серти муниципалитетъяслы аслыныс колӧ бырӧдны борщевиксӧ.

–И Госдумаысь депутатъяс, и Россия Федерацияса торъя регионъяс эз нин ӧтчыдысь шыӧдчывны РФ-са правительствоӧ корӧмӧн дасьтыны борщевиккӧд тышкасян торъя федеральнӧй программа. Но ӧнӧдз та кузя шы ни тӧв. Та вӧсна Россияса регионъясын босьтчисны аснаукӧн бергӧдны тайӧ уджсӧ. Ассьыныс оланпасъяс вынсьӧдӧмаӧсь Москва, Ленинград, Кострома, Новгород да Сахалин обласьтъясын, – пасйис Василий Смалий.

Борщевиклы паныд тышкасьӧм йылысь гаравсьӧ Сыктывкар, Сыктывдін, Кӧрткерӧс да Мылдін районъясысь сикт-посёлок дӧзьӧритан-пелькӧдан правилӧясын. Сыктывкарса сӧветӧн веськӧдлысь Анна Дюлӧн висьталӧм серти, кольӧм во гожӧмнас юркарса администрацияысь специалистъяс кӧкъямыслаын казялӧмаӧсь адгум паськалӧмсӧ да та вылӧ индӧмаӧсь муяснас вӧдитчысьяслы, кодъяс пыр жӧ кывкутӧмӧн бергӧдӧмаӧсь лёк быдмӧгсӧ бырӧдӧм могысь став уджсӧ.

Муниципалитетлӧн муяс вылын борщевиккӧд тышкасьӧм вылӧ юркарын таво вичмӧдӧмаӧсь 2,5 миллион шайт. 500 сюрс квадрата метр киськаласны химикатӧн. Госсӧветысь социальнӧй политика комитетӧн веськӧдлысь Сергей Артеев вӧзйис медводз бырӧдны пеж быдмӧгсӧ школаяс, больничаяс да детсадъяс гӧгӧрысь, а сідзжӧ автобус сувтланінъяс дорысь да подӧн ветланінъяс пӧлӧн.

Кыдз висьталіс республикаысь видз-му овмӧсса министрлысь удж вӧчысь Денис Паспеков, борщевикыс вужъясьӧма регионса дас муниципалитетын 4.700 гектар вылын, и быд во тайӧ лыдпасыс содӧ дас прӧчент. Медся уна лёк быдмӧгыс Сыктывдін, Луздор да Кулӧмдін районъясын. Борщевикнас ёнджыкасӧ тырӧны вӧвлӧм совхозъяслӧн эндӧм муяс. И корсьны, код киын ӧні тайӧ муясыс, мед тшӧктыны бырӧдны сэтысь адгумсӧ, зэв сьӧкыд. Госсӧветӧн веськӧдлысьӧс вежысь Валентина Жиделева вӧзйис татшӧм муяс вылас садитны пуяс либӧ кӧдзны сідз шусяна культурнӧй быдмӧгъяс.

Ӧнӧдз борщевиксӧ ытшкӧны да сотӧны химикатӧн. Но коса-триммерсьыд сійӧ оз пов, а химияыд тшыкӧдӧ тшӧтш вӧр-васӧ. Сыктывдін районса сӧветӧн да республикаса видз-му овмӧс техникумӧн веськӧдлысь Светлана Савинова серти, лёк быдмӧгсӧ позьӧ вины… пӧимӧн. Та кузя туясьӧмаӧсь да татшӧм кывкӧртӧд вӧчӧмаӧсь техникумса студентъяс.

–Но век жӧ медся тӧдчанаыс – быд во гӧрны-кӧдзны муяссӧ. Татӧг борщевиклы паныд тышын вермам ворссьыны, – воисны ӧти кывйӧ чинаяс.

Кыдз пасйис Денис Паспеков, налӧн ведомствоыс дасьтӧ адгумлы паныд тышкасян республикаса программа. Ӧні донъялӧны-арталӧны, мыйта ковмас та могысь сьӧмыс.

А, гашкӧ, пӧимӧн?

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх