Таво ноябрь помын шуӧма помавны Сыктыв районса Визин сиктын выль школа кыпӧдӧм кузя став уджсӧ.
Юрсиктын челядьлы выль велӧдчан стрӧйбасӧ лэптӧ Киров обласьтысь пӧдрада компания. Уджӧ босьтчӧмаӧсь 2018 вося июньын. И, кыдз тӧдчӧдіс Сыктыв районӧ аслас уджмогъясӧн неважӧн волігӧн республикаса юралысь Сергей Гапликов, тайӧ котырыс ас кадӧ да бура вӧчӧ ставсӧ, мый урчитӧма сёрнитчӧм серти. И кольӧм каднас ни ӧтчыдысь да некод на абу элясьлӧма на вылӧ.
Кыдз тыдовтчис, бергӧдӧмаӧсь нин договорас индӧм став уджсьыс 92 прӧчентсӧ. Ӧні лӧсьӧдӧны сантехника, нюжӧдӧны пытшкӧсса электропроводъяс, ладмӧдӧны биысь видзчысян сигнализация, вентиляция, сувтӧдӧны лифтъяс да с.в. Та могысь став коланаыс эм.
Кыпӧдӧмаӧсь нин блок-модульысь котельнӧй. И ломтассӧ дасьтӧмаӧсь запасӧн.
Апрельын лӧсьӧдчӧны стрӧитны котельнӧйлы чаг улӧ склад, июньын – вольсавны школа гӧгӧрын асфальт да вӧчны тротуар.
Казьтыштам, Визинын 501 ныв-зон вылӧ артыштӧм выль школасӧ шуӧма кыпӧдны, мед велӧдчанінас мӧд сменасӧ бырӧдны. Тайӧ могсӧ пуктылісны кыдз Россияса президент Владимир Путин, сідз и аслас «апрелься индӧдъясын» регионса юралысь Сергей Гапликов. Выль корпусас кутасны велӧдчыны 5-11 классъясысь ныв-зон. Проект сертиыс школаас лоас куим спортзал, актӧвӧй зал, медиатека, комын квайт кабинет.
Пӧдрада котырӧн веськӧдлысьяскӧд аддзысьлігӧн Сергей Гапликов аттьӧаліс найӧс бур уджысь да тӧдчӧдіс, мый эм нин дум-кӧсйӧм и водзӧ вылӧ ёртасьны налӧн водзмӧстчысь да зіль компаниякӧд.