Йӧзӧдӧма Коми Республикаын да Ненеч автономия кытшын «ЛУКОЙЛ» компаниялӧн социальнӧй да культурнӧй проектъяслы сиӧм дас квайтӧд конкурс, кытчӧ пырӧдчысьяслы асланыс уджтасъясӧн колӧ шыӧдчыны апрель 15 лунӧдз.
Таво тайӧ конкурсыслы кывкӧртӧдсӧ шуӧма вӧчны водзджык. Вермысьяссӧ лоӧ нимӧдӧма май помын. А сідзкӧ и, налӧн лоас позянлун збыльмӧдны ассьыныс проектъяссӧ во помӧдзыс нин.
Нӧшта ӧти выльтор: воддза воясся нимпасъясысь ӧтдор – тайӧ «Духовносьт да культура», «Спорт», «Экология» – вынсьӧдӧма нӧшта ӧтиӧс – «Ыджыдысь-ыджыд подвиг» нимаӧс, кодӧс сиӧма Айму вӧсна Ыджыд тышын Вермӧмсянь 75 во тырӧмлы. Сы серти конкурс вылӧ позьӧ вӧзйыны уджтасъяс, кодъяс отсаласны водзӧ нэммӧдны война кадся историялысь лист бокъяссӧ, ышӧдны быдмысь войтырӧс радейтны Чужан му, туйдны томуловӧс пыдісяньджык тӧдмасьны Великӧй Отечественнӧй войнадырся лоӧмторъясӧн.
Конкурсӧ пырӧдчыны вермасны Коми Республикаын да Ненеч автономия кытшын уджалысь некоммерческӧй негосударственнӧй да государственнӧй, муниципальнӧй бюджетнӧй да автономнӧй, а сідзжӧ коммерческӧй организацияяс, общественнӧй котыръяс, меставывса асвеськӧдлан тэчасъяс, профсоюзъяс да торъя йӧз.
Конкурсӧ пырӧдчӧм йылысь став колана юӧрсӧ позьӧ тӧдмавны ӧтуввезйын «ЛУКОЙЛ-Коми» ООО-лӧн сайтын «Кывкутӧм» юкӧнын.
–Воысь-во тайӧ конкурсыс сӧвмӧ-паськалӧ, пыр унджык йӧзлы отсалӧ бурмӧдны налӧн карын, сиктын да грездын олӧмсӧ. И такӧд тшӧтш ӧтарӧ ёнмӧ сэтчӧ пырӧдчысьяс костын ёртасян йитӧдыс: водзмӧстчысь войтыр юксьӧны ӧта-мӧдныскӧд асланыс дум-кӧсйӧмъясӧн да бур опытӧн. Конкурс вылӧ пыр тшӧкыдджыка вӧзйӧны донъявны сідз шусяна синергическӧй проектъяс, кор ӧтпырйӧ некымын котыр кӧсйӧны ӧтув збыльмӧдны йӧзлы зэв тӧдчана ӧти
ыджыд уджтас, кодӧс ӧткӧн олӧмӧ пӧртнысӧ абу вын сертиныс. Та дырйи найӧ водзвыв ставсӧ донъялӧмӧн-артыштӧмӧн урчитӧны ас костаныс, коді мый вӧсна
мӧдас кывкутны. И колӧ пасйыны, мый социальнӧй да культурнӧй проектъяслы сиӧм тайӧ конкурсыс воысь-во лоӧ йӧзыслы пыр коланаджык да тӧдчанаджык, – висьталӧ «ЛУКОЙЛ-Коми» ООО-ысь генеральнӧй директорӧс йӧзкӧд йитӧд кутӧм кузя вежысь Евгения Лясковская.
Коми Республикаын да Ненеч автономия кытшын социальнӧй да культурнӧй проектъяслӧн конкурсыс нуӧдсьӧ дас квайтӧд во дорвыв. Сійӧс котыртысьясыс – «ЛУКОЙЛ-Коми» ООО да «ЛУКОЙЛ» благотворительнӧй фонд. Кольӧм каднас тайӧ конкурс вылас вӧлі вӧзйӧма 1.300 сайӧ уджтас, и 300-ысь унджыксӧ збыльмӧдӧм могысь вичмӧдӧма сьӧма грантъяс.
Конкурсас пырӧдчысьыс воысь-во содӧ. 2019 воын та могысь шыӧдчӧмыс вӧлі торйӧн нин уна – 309, и на лыдысь 70-сӧ пасйӧма грантъясӧн. Тайӧ сьӧм вылас уна бурсӧ да йӧзлы коланасӧ лоӧ вӧчӧма, шуам, Ухтаын ньӧбасны карса планетарийӧ выль оборудование, Печораын да Сосногорск районса Улыс Одесын восьтасны компьютернӧй классъяс, Коми Республикаса детсадъясын да школаясын водзӧ збыльмӧдасны челядьӧс робототехникаӧ велӧдӧм кузя проектъяс, Ненеч автономия кытшын лӧсьӧдасны творческӧй мастерскӧй.
Снимокъясыс
«ЛУКОЙЛ-Коми» ООО-лӧн пресс-службаысь.