Республикаса юралысь Сергей Гапликов чолӧмаліс Комиын служитысь офицеръясӧс Айму дорйысьлӧн лунӧн. Такӧд йитӧдын сійӧ аддзысьліс регионын меститчӧм воинскӧй часьтъясысь командиръяскӧд да военнӧй управлениелӧн тэчасъясӧн юрнуӧдысьяскӧд.
Сергей Гапликов тӧдмӧдіс найӧс войскӧвӧй часьтъясын выль веськӧдлысьяскӧд. Воркута карын 84197-ӧд войскӧвӧй часьтса командирӧн индӧма полковник Виталий Кабоскинӧс, тайӧ жӧ карас 36097-А войскӧвӧй часьтӧн кутас командуйтны майор Эдуард Рой, Печораын 96876-ӧд войскӧвӧй часьтӧн – полковник Василий Сёмин.
–2020 воыс миян страналӧн историяын зэв тӧдчана. Таво ми кутам пасйыны Айму вӧсна Ыджыд тышын Вермӧмсянь 75 во тырӧм. Страна пасьталаын лоӧ котыртӧма-нуӧдӧма Победалы сиӧм кыпыд гаж-аддзысьлӧмъяс, – офицеръяс дорӧ шыӧдчигӧн висьталіс регионса юралысь. – Эска, Комиын военнослужащӧйяс пуктасны тайӧ тшупӧда пассӧ нимӧдӧмӧ да Россиялӧн историяын сійӧс нэммӧдӧмӧ тӧдчана пай.
Сергей Гапликов сідзжӧ пасйис, мый республикаса правительство пыр дась быд боксянь отсавны республикаын служитысь военнӧй комиссариатлы да воинскӧй часьтъяслы, тшӧтш и армияӧ призыв нуӧдігӧн.
–Кольӧм во призыв кузя плансӧ вӧлі тыртӧма 100 прӧчент вылӧ. Ме аттьӧала ӧтув зільӧмысь ставнысӧ, кодъяс котыртісны да нуӧдісны миян республикаын том йӧзкӧд тайӧ уджсӧ, – кывкӧрталіс офицеръяскӧд аддзысьлӧм дырйи сёрнисӧ регионса юралысь.