Россия Федерацияса президент Владимир Путин кырымаліс Айму вӧсна Ыджыд тышын Вермӧмсянь 75 во тырӧмкӧд йитӧдын войнаса ветеранъяслы ӧтчыдысь сетан сьӧма отсӧг вичмӧдӧм йылысь индӧд, – юӧртӧ Коми Республикаын РФ-са Пенсия фондлӧн юкӧнысь пресс-служба.
75 сюрс шайт шуӧма сетны Великӧй Отечественнӧй войнаса ветеранъяслы да инвалидъяслы, концлагеръясысь вӧвлӧм тыр арлыдтӧм узникъяслы, Айму вӧсна
Ыджыд тышын, Финляндиякӧд да Япониякӧд войнаяс вылын пӧгибнитӧм военнослужащӧйяслӧн дӧваяслы да дӧвечьяслы, Великӧй Отечественнӧй войнаса кувсьӧм инвалидъяслӧн да участникъяслӧн дӧваяслы да дӧвечьяслы, блокадаӧ веськалӧм Ленинградын олысьяслы.
Президентлӧн тайӧ жӧ индӧд сертиыс 50 сюрс шайт мынтасны война кадӧ тылын зільысьяслы да нацистъяслӧн концлагеръясысь, тюрмаясысь да геттоясысь вӧвлӧм тыр арлыда узникъяслы.
Коми Республикаын олысьяслы тайӧ сьӧмсӧ сетасны таво апрель-майын. Сійӧ воас пенсияныскӧд да мукӧд социальнӧй сьӧма кокньӧдныскӧд тшӧтш. Россия Федерацияса Пенсия фондӧ шыӧдчыны оз ков, та могысь став колана документ-кабалаыс сэні эм.
Ыджыд Вермӧмсянь 75 во тырӧмкӧд йитӧдын тайӧ сьӧма отсӧгыс вичмас Комиын 3.773 олысьлы, на лыдын 116-ыс – Великӧй Отечественнӧй войнаса участникъяс да инвалидъяс, 774-ыс – войнаса участникъяслӧн да инвалидъяслӧн дӧваяс да дӧвечьяс, 42-ыс – блокадаӧ веськалӧм Ленинградын олысьяс, 223-ыс – концлагеръясысь узникъяс, 2.618-ыс – тылын уджалысьяс.