«Коми му» газет пыр важӧн нин кӧсъя аттьӧавны коми газет-журнал лэдзысьясӧс – «Коми йӧзӧдчан керкаын» зільысьясӧс. Некымын во нин меным электроннӧя воӧны коми петасъяс, мыйысь зэв ыджыд аттьӧ.
Став воанторсӧ, веськыда шуа, ог вевъяв видзӧдлыны, но мыйсюрӧ лыддя да весиг вӧдитча аслам уджын. Сідз, «Коми му» газет лыддя аслым, сьӧлӧм бурмӧдӧм ради. А со «Йӧлӧга» да «Би кинь» окотапырысь лыддя ачым, тӧдмала сэтысь Коми Республикаын выльторъяс, а сэсся вӧдитча школаын 2-6 класса велӧдчысьяслы урок бӧрын занятиеяс дырйи. Медся аслыспӧлӧс гижӧд-серпассӧ печатайта да на отсӧгӧн тӧдмӧда Юграын олысь ныв-зонмӧс Коми муӧн.
Быдмысь войтырлы торйӧн нин воӧ сьӧлӧм выланыс быдсикас юржугланторйыс: ребус, кроссворд, шарада да с.в. 5-6 классын велӧдчысьяс видлӧны вуджӧдны коми гижӧдъяссӧ роч вылӧ да тадзи озырмӧдӧны ассьыныс кывворсӧ.
Юграса зонпосни талун комисӧ лыддьӧны чужан кывйӧн сӧмын сы вӧсна, мый бать-мамыс коми. Миян муын коми сёрниыс (изьватас сёрнисикасыс) юргӧ пыр гежӧдджыка, сійӧн варовитысьыс чинӧ да. А коми петасъяс отсалӧны чужтыны мам кыв дорӧ интерессӧ: газет-журнал зэв мича чужӧмбанаӧсь, тӧдчӧ, мый редакцияясын зільӧны ассьыныс уджсӧ бура тӧдысь профессионалъяс.
Ме чайта, коми пресса электроннӧя ыстӧм-судзӧдӧмыс – зэв бур позянлун ӧтувтны Россияса мукӧд регионын олысь коми йӧзӧс. Газет-журнал отсӧгӧн найӧ тӧдмалӧны республикаын олӧм йылысь да нимкодясьӧны мича, мыла коми кывйӧн. Аттьӧ тіянлы таысь!
Наталия Александровна Сорока,
роч да коми кыв да литература велӧдысь.
Саранпауль кар,
Югра-Ханты-Манси кытш.