Федерация да республика тшупӧдын вынсьӧдӧма уна сикас программа, кодъяс серти шуӧма вичмӧдны грантъяс, мед мичмӧдны сикт-посёлоклысь чужӧмбан, мед сэні олӧмыс вӧлі кыпыдджык да бурджык. Сӧмын колӧ кыдз меставывса асвеськӧдлан тэчасын зільысьяслы, сідз и сэтчӧс войтырыслы водзмӧстчыны.
Уна во нин та могысь зільӧ «Кулӧмдін» овмӧдчӧминса администрация, кӧні дасьтӧны сикт-грездын олӧм бурмӧдӧм могысь уджтасъяс да зільӧны шедӧдны на серти грантъяс да субсидияяс. Бурланьӧ вежсьӧмъяссӧ аддзӧны и юрсиктсаяс, и Кулӧмдінӧ асланыс тӧжд-могӧн волысьяс. Та боксянь мый лӧсьӧдчӧны вӧчны таво? Тайӧ юалӧм вылас вочавидзис администрацияӧн веськӧдлысь Виктор Петрович Игнатов.
–Пырӧдчим уна сикас программаӧ, вичмисны нин грантъяс да субсидияяс, кодъяс весьтӧ кутам пӧртны олӧмӧ водзмӧстчысь йӧзлысь вӧзйӧмъяссӧ. Кольӧм во республикаса юралысь Сергей Гапликов Кулӧмдін районлӧн тшупӧда паса лунӧ козьналіс миянлы 20 миллион шайта грант. 15 миллионсӧ шуим видзны улича-туйяс дзоньталӧм-бурмӧдӧм вылӧ. Вит миллион вылас югзьӧдам госстандартъяс артыштӧмӧн сиктса уличаяс. Став лампасӧ сэні вежам светодиодаӧн.
«Формирование комфортной городской среды» программа серти районса культура керка водзӧ вольсалам асфальт да югзьӧдам ӧшинь увсӧ. Та могысь республикаса кудйысь вичмас 4.300 сюрс шайт да таысь ӧтдор овмӧдчӧминса администрациясянь – 500 сюрс шайт.
«Народный бюджет» программа весьтӧ дзоньталам Ручейнӧй уличалысь юкӧн, Весенньӧй улича вылын вӧчам пӧжарысь видзчысьӧм могысь ва видзанін.
Республикаса видз-му овмӧс министерстволӧн эмӧсь программаяс, кытчӧ асланыс уджтасъясӧн пырӧдчӧны да грантъяс шедӧдӧны водзмӧстчысь йӧз. Сідз, Паспомысь томъяслӧн «Паспомчане» котырӧн юрнуӧдысь Ирина Зезегова дасьтіс ывлаын ёнмӧдчанін вӧчӧм могысь уджтас, код вылӧ минсельхозсянь вичмис 302 сюрс шайта грант.
Тайӧ жӧ министерствоыслӧн программа серти шедӧдӧм грант весьтӧ лӧсьӧдам юрсиктын Айму вӧсна Ыджыд тышын усьӧмаясӧс казьтылан пас дорын шойччанін. Сьӧма грант отсӧгӧн жӧ мӧвпалам югзьӧдны Пятигорскын уличаяс.
Сэк жӧ, кыдз водзӧ тӧдчӧдіс Виктор Петрович, эм на мый вылын уджавны сиктса администрациялы йӧзыскӧд ӧтув зільӧмӧн.
Сідз, Аэропортын челядя том семьяыс уна. Позьӧ оз сэні лӧсьӧдны зонпоснилы ворсанін, томъяслы ёнмӧдчанін? Виктор Петровичлӧн висьталӧм серти, та могысь колӧ водзмӧстчыны сэні олысьяслы, торйӧн кӧ, дасьтыны уджтас да пырӧдчыны видз-му овмӧс министерстволӧн программаӧ.
Элясьӧны йӧзыс, мый юрсиктын овны шогмытӧм, киссьӧм-пӧлыньтчӧм керкаыс уна, кӧні некод нин оз ов.
–Жаль, но матӧ став татшӧм керкаыс – торъя йӧзлӧн эмбур, – висьталіс Кулӧмдінса администрацияӧн веськӧдлысь. – И ми найӧс разьны ог вермӧй.
А водзӧ вылӧ кыті да мый мӧвпалӧны вӧчны Кулӧмдінын йӧзлысь олӧмсӧ налӧн тшӧтш водзмӧстчӧмӧн бурмӧдӧм могысь?
–Видз-му овмӧс министерстволӧн 2021 во вылӧ артыштӧм программа серти йӧзлӧн водзмӧстчӧмӧн жӧ мӧвпалам вӧчны челядьлы нёль ворсанін. Кыкыс лоас катыдын, а мӧд кыкыс – кывтыдын. Сиктын олысьяс вӧзйисны «Формирование комфортной городской среды» уджтас вылӧ подуласьӧмӧн вӧвлӧм ӧтувъя пывсян местаӧ вӧчны машинаяслы сулаланін да тшӧтш потшны гӧгӧрыс. Корисны лӧсьӧдны и автобус виччысянін.
Тайӧ программасӧ вынсьӧдӧма 2024 воӧдз, да унатор на вермам сы серти вӧчны, – кывкӧрталіс сёрнинымӧс Виктор Петрович.
Марина Дадашова.
Кулӧмдін р.