Ок, и гажа Опонасей!

Февраль 2 лунӧ Кӧрткерӧс районса Нёбдінын шыаліс-гыаліс быдвося кыпыд гаж – Опонасей ярманга.

Кыдзи и пыр, ярманга вылын ассьыныс вӧчӧмторъяс петкӧдлісны киподтуя войтыр. Одыбысь, Зулӧбысь, Пӧдтыбокысь, Шойнатыысь, Вомынысь, Адзорӧмысь 12 мастер вӧзйисны ньӧбасьысьлы сюмӧдысь дозмук, акань-видзӧг, бадь ньӧрйысь да пу ув-вужйысь эмбур, ас кыӧм джодж-дӧра да уна мукӧдтор. Та пӧрйӧ Шойнатыса пуысь вӧчасьысь Михаил Мишаринӧс шуисны «Вося мастерӧн».

Тані жӧ паськӧдчисны видз-му вӧдитан овмӧсъяс да фермеръяс: позис ньӧбны йӧв, рысь-нӧк, чӧскыд пӧжас.

Виктор Савин нима литература музейын тшӧтш вӧлі уна йӧза – сиктса олысьяс да гӧсьтъяс экскурсия дырйи тӧдмасисны коми гижысьлӧн олан туйӧн да творчествоӧн, Опонасей ярмангалы сиӧм выставкаӧн.

«Талантъяслӧн ярманга» дырйи ассьыныс енбиалун-сямсӧ петкӧдлісны сьылысь-йӧктысь-ворсысьяс да быдса котыръяс. Печласисны кокнаныс Кӧрткерӧсысь «Позитив 50+», Ыджыдвиддзысь «Девчата», Нёбдінысь «Солнышко» да «Изумруд», Мордінысь «Стиль», Важкуръяысь «Малинки» да «Пӧлӧзнича». Мича гӧлӧсъяснас нимкодьӧдісны видзӧдысьӧс Висерысь Ксения Ивашева, Ыджыдвиддзысь Александр Мишарин, Пӧдтыбокысь Екатерина Семяшкина, Важкуръяысь Ксения Мишарина да Кӧрткерӧсысь Алексей Ген.

Одыбысь Геннадий Поповлӧн да Кӧрткерӧсысь Владимир Трошевлӧн киясын гажаа ворсісны гудӧкъяс, сідз и чуксалісны петавны йӧктыны.

Кывзысь-видзӧдысьяс пӧся вочаалісны и районын бура нин тӧдса котыръясӧс: Типӧсиктысь «Оз тусьясӧс», Кӧрткерӧсысь «Зыряночкаӧс», Нёбдінысь «Сьӧлӧм сьылӧм», Пӧдтыбокысь «Любаваӧс», Висерысь «Зараньӧс» да Кӧрткерӧс районса коми культура шӧринысь «Мича гудӧкӧс».

Гажа вӧлі и ывлаын: гӧсьтъяслысь юасисны-донъялісны Опонасей ярманга йылысь тӧдӧмлунсӧ, а челядьӧс ышӧдісны пырӧдчыны быдсикас гажа ворсӧм-ордйысьӧмӧ.

Пасъям: таво Опонасей ярмангасӧ котыртлісны дас квайтӧдысь. Но Нёбдінын сійӧс медводдзаысь нуӧдӧмаӧсь 180 во сайын нин – 1840 воын. Войдӧр ярмангаыс горавлӧма 5-10 лун. Ассьыныс вузӧс инавны волывлӧмаӧсь уна уездысь купечьяс. Найӧ могмӧдлӧмаӧсь няньӧн Печора пӧлӧн олысьясӧс да чериӧн – ыджыд каръясса войтырӧс.

Ок, и гажа Опонасей!

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх