Сыктывкарын нёль лун петкӧдчисны Воркутаысь Б.А.Мордвинов нима драмтеатрысь артистъяс. Войвыв кытшсайса карысь драмтеатрӧн да республикаын театръяслӧн союзӧн веськӧдлысь Елена Пекарьлӧн кывъяс серти, найӧ кык во дасьтысьӧмаӧсь тайӧ гастроль кежлас, бӧрйӧмаӧсь репертуарысь медся яръюгыд постановкаяссӧ, но тӧкӧтьӧ абу ставыс дзугсьӧма. Артистка, коді ворсӧма бӧрйӧм постановкаясас, доймӧма. Мӧвпалӧмаӧсь вуджӧдны урчитӧм гастроль лунъяссӧ либӧ гортас кольччыны. Но сэсся век жӧ шуӧмаӧсь волыны Сыктывкарӧ, но мӧд постановкаясӧн.
Кыдзи висьталіс Б.А. Мордвинов нима драмтеатрса режиссёр Юрий Нестеров, юркарын искусство радейтысьяслы найӧ бӧрйӧмаӧсь разнӧй жанра нёль спектакль. На пиысь кыксӧ – челядьлы «Буратино» мюзикл да Б.Шергинлӧн висьтъяс серти «Со всею нежностию» сказ – сыктывкарсаяс пиысь кодсюрӧ видзӧдлісны нин. А мӧд кыксӧ – Д.Нигролысь «Зверушкины истории» да У.Шекспирлысь «Виндзорские насмешницы» – Виктор Савин нима драмтеатрлӧн сцена вылын воркутаса ворсӧны первойысь на.
И сідз, гастрольлӧн медводдза лунӧ, январь 30 лунӧ, видзӧдысьяслы вӧзйисны кык постановка: лун шӧр кадӧ – Шергин серти сказ, а рытнас – Д.Нигролысь zoo-фентези.
Кыдзи пасйылі нин, Сыктывкарын «Со всею нежностию» сказсӧ Воркутаысь артистъяс петкӧдлісны кык во сайын. Но спектакльсӧ дасьтӧма ичӧт сцена вылын ворсӧм вылӧ да, эз став окотитысьыс вермы видзӧдны.
–Борис Шергин – тайӧ зэв аслыспӧлӧс автор, сылӧн гижӧдъясын – поморъяслӧн сёрнитанног, коді кольӧма на Войвылын. Спектакльыс артмӧма нёль висьтысь: тайӧ Александр Пушкинлы сиӧм мойдъяс да гижӧдъяс, – висьталіс Юрий Нестеров.
Вермас лоны, Шергин серти постановкаыслӧн кывйыс абу быдӧнлы гӧгӧрвоана, но артистъяс сэтшӧм бура «олісны» Войвывса персонажъяссӧ. «Как внук ходил умных искать» юкӧнын кӧ серамыд петіс, Пушкин йылысь висьталӧмысь – синваыд. Марина Юлдашева сэтшӧм бура пырӧдчис прӧстӧй мортлӧн ку пиас да висьталіс нималана роч поэтлӧн олӧм йывсьыс. Веськыда шуа, Пушкин йылысь татшӧм висьтасьӧмсӧ эг на кывлы.
Америкаса классик Дон Нигролӧн «Зверушкины истории» пьесасӧ шуӧма 2019 воын медся нималанаӧн. Юрий Нестеровлӧн кывъяс серти, кольӧм во тайӧ пьесасӧ дасьтӧмаӧсь Россияса 36 театрын, на лыдын и Воркутаын.
–Пасъя, Дон Нигро видзӧдіс миянлысь ворсӧмсӧ видео пыр, и сылы ёна кажитчис, – ошйысис Юрий Нестеров.
«Зверушкины истории» – зэв аслыспӧлӧс постановка. Петкӧдлӧма олӧмсӧ пемӧсъяс пыр. Тані дас история. Персонажъясыс: визяорда, попугай, кань, хомяк, лемминг да мукӧд. Тайӧ и серамбана, и философскӧй постановка: миян вылӧ ӧнія видзӧдлас, миян сідз шусяна фобияяс да мытшӧд-гӧрӧд.
Бур козинӧн лои и У.Шекспир серти «Виндзорские насмешницы» теш. Шекспирлӧн персонаж – сэр Джон Фальстаф – мыччысьлӧ гижысьлӧн некымын пьесаын. Сійӧ азым сёйны-юны да аньяс вылӧ тшӧтш горш. Но «Виндзорские насмешницыын» Фальстаф шедӧ куим писькӧс аньлӧн лэчкӧ: миссис Форд, миссис Пейдж да миссис Квикли, кыдз шуласны, велӧдӧны сійӧс дорын узьлыны.
Кыдзи пасйис режиссёрыс, Воркутаса театрын, а сылы 75 во, Шекспирӧс татшӧм тшупӧдын дасьтӧмаӧсь медводдзаысь на.
–Театръясын тайӧ пьесасӧ зэв гежӧда пуктӧны, – висьталіс Юрий Нестеров. – И кор ми, кыдз шуласны, ырыштчим Шекспир вылӧ, майшаси. Миян театрын труппаыс ичӧт – сӧмын дас ӧкмыс ворсысь. А классиклӧн уна персонаж. Ковмис кодсюрӧӧс «киритны», и ми мунім мӧд туйӧд. Кор петкӧдлім тешсӧ Москваса критик Павел Подкладовлы, шуис: «Ме полі тіян Шекспирысь, чайті, оз артмы. Зэв бур удж!». И збыльысь тадзи.
Дерт, и челядьӧс гажӧдісны. Войвылысь артистъяс петкӧдлісны ныв-зонлы «Буратино» мюзикл. Режиссёралӧма В.Савин нима драмтеатрысь артист Захар Комлев. Вильыш да писькӧс Буратиноӧс ворсіс Гульнар Хаматнурова.
–Кор юӧртісны театрын, мый кутам дасьтыны тайӧ мойдсӧ, ме чуйми: мися, коді и ворсас Буратиносӧ?! Тайӧ рольыслы лӧсяланаыс мужичӧйяс пиын быттьӧ и абу. А сэсся режиссёрыс индіс – ворсан пӧ тэ. Кыдзи ме? Весиг шогӧ уси. Думайті ӧд, мый меным вермас вичмыны Алиса – наян руч, но абу жӧ ме Буратино! – казьтыліс Гульнар Хаматнурова.
Но ӧні Гульнарлӧн тайӧ рольыс – радейтанаясысь ӧти.
«Буратино» мюзикл – челядьлы яръюгыд постановка. Аслыспӧлӧслуныс нӧшта сыын, мый Воркутаса артистъяс петкӧдчӧны «ловъя оркестр» улӧ. Музыкантъясыс – республикаса искусствояс колледжлӧн Воркутаса филиалын велӧдчысьяс.
Екатерина МАКАРОВА.
Снимокъясыс ӧтуввезйын Воркутаса драмтеатрлӧн лист бокысь.