Кольӧм во помын Сыктывкарса Эжва районын босьтчисны кыпӧдны 270 зонпосни вылӧ артыштӧм выль детсад. Та могысь колана матӧ 240 миллион шайт вичмӧдӧма республикаса бюджетысь да муниципалитетлӧн сьӧмкудйысь.Став стрӧитчан да пелькӧдчан уджсӧ шуӧма эштӧдны таво помӧдз.
Неважӧн такӧд йитӧдын уджсӧ донъявны Эжваӧ ветліс юркарса администрацияӧн веськӧдлысь Наталья Хозяинова.
«АльфаСтрой» ООО-ысь пӧдрада котырын зільысьяс петкӧдлісны сылы, мый вӧчӧмаӧсь нин. Торйӧн кӧ, став панас уджыс дась нин, да заводитӧмаӧсь тэчны кирпичысь стенсӧ.
–Эжваын выль детсадсӧ кыпӧдӧны стрӧга графикас кутчысьӧмӧн. «АльфаСтрой» компаниялӧн эм нин татшӧм жӧ проект серти стрӧитчан опытыс, та вӧсна ми надейтчам, мый став коланасӧ и водзӧ вӧчасны ас кадӧ, – тӧдчӧдіс Наталья Хозяинова.
Сылӧн висьталӧм серти, Эжваын выль детсадсӧ абу стрӧитлӧмаӧсь во кызь вит нин. Ӧніясӧ эштӧдӧм бӧрын лоас позянлун дзикӧдз бырӧдны районас зонпоснилысь детсадйӧ ӧчередсӧ, став дзолюкыслы вичмас сэні местаыс.
* * *
Талун миян республикаын дас квайт муниципалитетын тырмымӧн нин дзолюкъяслы детсадйыс, и бать-мам ас кӧсйӧм сертиныс ставныс нин вермасны инавны куим арӧсысь ичӧтджык каганысӧ ясли-садйӧ.
Сэк жӧ Сыктывкарын, Сыктывдін, Кӧрткерӧс да Кулӧмдін районъясын та могысь позянлуныс абу на. Но, кыдз ад-дзам, вочасӧн та боксянь серпасыс бурмӧ.