Сыктывдін районса Выльгорт сиктын воссис «Ошпи» нима ӧнія выль спорткомплекс. Сійӧс кыпӧдны сьӧмсӧ вичмӧдӧма ас вылас уджалысь Юрий Широков.
Матысса кадӧ нин тані мӧдасны тренируйтчыны художественнӧй гимнастикаӧ да вольнӧя вермасьӧмӧ нырччысь томулов.
Тайӧ кыпыд лоӧмторнас сиктса войтырӧс чолӧмаліс республикаса юралысь Сергей Гапликов, коді февраль 1 лунӧ воліс Сыктывдінӧ аслас уджмогъясӧн.
Чина морт тӧдчӧдіс, мый колӧ пыдди пуктыны да гӧрдитчыны татшӧм йӧзнас, кыдзи Юрий Иванович, кодъяс зільӧны отсавны сӧвмыны чужан муыслы, бурмӧдны землякъясыслысь олӧмсӧ. Ас нимсяньыс, а сідзжӧ регионса правительство да Комиын олысьяс нимсянь сійӧ аттьӧаліс предпринимательӧс водзмӧстчӧмысь да сыктывдінсалы татшӧм ыджыдысь-ыджыд козин вӧчӧмысь.
Выльгортын спорткомплекс стрӧитӧм могысь тайӧ инвесторыс сетӧма 85 миллион шайт. Выль учреждениеас вӧчӧмаӧсь вермасьысьяслы зал, тренажёръяса ыджыд жыр, пӧрччысянін, кык сауна, медицина кабинет. Тані жӧ лоӧ восьтӧма кафе.
Стрӧйбаыслы проектсӧ дасьтігӧн ставсӧ артыштӧмаӧсь тшӧтш и вермытӧмъяслы татчӧ волывлӧм могысь.
Челядьлы занятиеяссӧ кутасны нуӧдны вежоннас квайт час. Матысса кадӧ нин Выльгортысь ныв-зонлы позяс гижӧдчыны секцияясӧ. 18 мортӧс шуӧма босьтны велӧдны художественнӧй гимнастикаӧ да 12-15-ӧс – вольнӧя вермасьӧмӧ.
–Зэв тӧдчана, кӧні том-улов вӧчӧны спортӧ ассьыныс медводдза воськовъяссӧ. Кор найӧ аддзӧны, кодъяс накӧд орччӧнӧсь, кодъяс зільӧны ышӧдны да отсавны налы, да нӧшта кӧ эм кодлысь спортын бур примерсӧ босьтны, ныв-зон мӧдасны зільны оз сӧмын тайӧ «кодзувъяс» кодьыс жӧ лоны, но и ордйысьӧмъяс дырйи нӧшта на гырысьджык вермӧмъяс шедӧдны. Ми вӧчам ставсӧ, медым миян челядь нималана спортсменъяс вылӧ видзӧдӧмӧн быдмисны-сӧвмисны да лоисны олимпийскӧй чемпионъясӧн. И кутам наӧн гӧрдитчыны, – эскӧдӧмӧн пасйис Сергей Гапликов.
Сиктын олысьясӧс да спортсменъясӧс выль шӧрин восьтӧмӧн чолӧмаліс и олимпийскӧй чемпион, мирса куимысь чемпион Анатолий Белоглазов.
–Кор ме босьтчи вольнӧя вермасьны, та могысь миян залыс вӧлі зэв дзескыд. А тайӧ спортшӧринас майбыр лоӧ челядьлы волывлынысӧ.
Юрий Широков сідзжӧ аттьӧаліс ставнысӧ, кодъяс пуктісны шӧринсӧ кыпӧдӧмӧ ассьыныс пай. Юрий Иванович жӧ козьналіс спортсменъяслы выль стрӧйбаыслысь символ-ключсӧ.