Бур асыв-лун-рыт-вой, важ ёртъяс и миян дорӧ выльӧн сибӧдчысьяс! Артавны кӧ, журналлӧн тайӧ выльвося петасыс лоис буретш дасӧдӧн, кыдзи сійӧ вуджис мужичӧйяс «ён кабырысь» нывъяслӧн «небыдик киӧ».
Кодкӧ, гашкӧ, и дзик пыр казяліс тайӧс, а, кодкӧ, колӧк, муртса на та йылысь кылӧ…
Дерт, выль видзӧдласнад, сямнад, гӧгӧрвоӧм-гӧгӧрвотӧмнад мыйкӧ да вежсис «Чушканзіын», но, надейтчам, мый ӧтитор сылӧн колис сэтшӧм, кутшӧм вӧлі нэмсӧ (журналлы таво тырас оз этша ни уна – 63 ар!): сійӧ сідзжӧ кулитӧ-эрдӧдӧ олӧмнымлысь тырмытӧмторъяссӧ да сідзжӧ серамнас нюжӧдӧ коми мортлысь олӧмсӧ.
Окота висьтавны зэв ыджыд аттьӧ журналнымлӧн гижысь-серпасасьысь ёртъяслы, кодъястӧг эськӧ и «чушкӧмыс», и «гильӧдӧмыс» вӧлі вывті нин быгалӧм, кос да, гашкӧ, весиг и ковтӧм.
Сё пасибӧ, дона гижысь-письмӧ ыстысьяс да серпасасьысьяс: Николай Игнатов (Помӧсдін), Александр Уляшев (Скӧрӧдум), Ольга Баженова (Сыктывкар), Алёна Ельцова (Сыктывкар), Галина Ивкучева (Удора район), Митрофан Курочкин (Сыктывкар), Иван Баженов (Оквад), Цыпанов Йӧлгинь (Сыктывкар), Владимир Цивунин (Сыктывкар), Аркадий Размыслов (Сыктывкар), Николай Парфентьев (Ухта), Мария Размыслова (Сыктывкар).
Надейтчам, воысь-во тіянкӧд ёртасьӧмным лоас сӧмын топыдджык, и воас кад, коркӧ сӧльнитчам ставӧн ӧти ыджыд семьяӧ.
Аттьӧ тіянлы, кодъяс пырӧдчӧны миян «Вот тай на!» снимокъяса выль конкурсӧ. Сэні миян лои нин кык вермысь: Николай Лютоев (Кулӧмдін сикт) да Эмилия Пантелеева (Удора район). Выль вермысьяслы лӧсьӧдӧма нин гӧра козин!
Аттьӧ и тіянлы, кодъяс эз на гижӧд-серпастӧ миянлы вайлыны, но асланыс чуйдӧм-вӧзйӧм-велӧдыштӧмӧн тшӧтш жӧ вӧчӧны журналсӧ гажаӧн да коланаӧн.
Но и медыджыд аттьӧ, дерт, тэныд, миян лыддьысьысь-листалысь. Тэ ради, и сӧмын тэ ради, миян пуркйӧ-пуӧ юрным, ниртсьӧ гырддзаным да гаддялӧ небыд местаным, кор ми, кыдзи кужам, лӧсьӧдам-баситам тэныд журналлысь петассӧ.
Кыв сетам, мый и водзӧ ньӧти элясьтӧг (кыдз шуласны: шыр кӧ голя оз вунды) кутам гажӧдны тэнӧ, миян дона лыддьысьысь.
Но и тэ миянӧс тшӧтш радейт, мед и водзӧ вылӧ лоам нӧшта на мичаӧсь, повтӧмӧсь да кужысьӧсь!
Шыӧдчы миян дорӧ паныдасигӧн, звӧнит, гиж! Вай ӧттшӧтш вӧчам асьнымӧс шудаӧн!
Пыдди пуктӧмӧн да радейтӧмӧн, «Чушканзі» журнал вӧчысьяс:
Анжелика Елфимова, Eкатерина Макарова да Кристина Кривошеева.