Кӧрткерӧс районса Одыбын олысьяс войдӧр карӧ да мукӧдлаӧ ветлiгӧн мунлісны важся туйӧд – Типӧсикт пыр. Грездыс ичӧтик, сулалӧ ю бокын. Со и Одыбса ныв-зон унаӧн йитiсны олӧмсӧ Типӧсиктса войтыркӧд.
Олӧмыс визувтӧ водзӧ, ми верстяммим, воис пенсия кад, дугдiм уджавны. Прӧст кадыс уна да, окота паныдасьлыны ёртъяскӧд, тӧдмасьны выль йӧзкӧд, кыскӧ ветлыны кытчӧкӧ.
Одыб сиктса аньяс пӧвстын эм варов да киподтуя ань – «Берестяное лукошко» кружокӧн веськӧдлысь Лидия Михайловна Михайлова. Томдырйиыс сiйӧ уджавлiс госпромхозын «Беларусь» тракторӧн да, ӧні повтӧг ветлӧдлӧ ас машинаӧн. «Лӧсялӧ» ӧтуввезкӧд, ёртасьӧ ас кодьыс киподтуя аньяскӧд интернет пыр. Лидия Михайловналӧн эм важся бур тӧдса – Типӧсикт грездса «Оз тусьяс» мусаник котыр. Со и мӧвпыштiм ветлыны на ордӧ, нывъясыс важӧн нин пӧ корӧны миянӧс да. Сӧлiм машинаӧ да ӧдйӧ и воим. Журкнитіс-нуис миянӧс Лидия Михайловналӧн Иван Васильевич верӧсыс, быдтор кужысь морт.
Типӧсиктын клубыс абу нин выль. Сы дорын ывлаас вӧчалӧмаӧсь шыръясӧс – 2020 вося пас, кӧра-доддяӧс, мичаа мавтӧмаӧсь. А пырим клубас да: шоныд, югыд, залсӧ гажӧдӧмаӧсь, гӧгӧр тыдалӧ нывъяслӧн киподтуй-сямыс.
Ёна жӧ шоныда вочаалiсны! Дасьтӧмаӧсь пӧжас, уна сикас салат. Ӧти «оз тусь» Надя вайис ыджыд да чӧскыд торт, пӧсь лазанья. Москваӧ петкӧдчыны ветлiгас ресторанын сёйӧмаӧсь лазаньятӧ да и рецептсӧ корӧмаӧсь. Со и миянӧс чӧсмӧдлісны.
Варовитiгмоз да Ангелина Панюковалӧн гудӧкӧн ворсӧм улӧ котырӧ пырысьяс ливкйӧдлісны зэв уна коми да роч сьылан. А гӧлӧсныс! «Оз тусьяс» ветлӧмаӧсь нин Москваӧ, Питерӧ, петкӧдчӧмаӧсь уна площадкаын. Мича да вына гӧлӧснаныс сьылӧны акапельнӧ, некутшӧм гудӧк ни баян оз ков.
Миян Лидия Михайловна нуӧдіс кӧзяевалы юркытш вӧчӧм кузя мастер-класс. Тайӧ мичаторнас артистъясыд лоӧны нӧшта на лӧсьыдӧсь да мичаӧсь.
Аддзысьлӧм вылӧ волicны тшӧтш Ангелина Андреевна да Николай Гелиевич Ливсон гозъя. Кык Ангелина важысянь нин тӧдсаӧсь, дзажгӧны-ворсӧны гудӧкӧн, ӧтлаын весиг ветлӧмаӧсь «Играй, гармонь!» гаж вылӧ.
Миянлы, ок, ёна воис сьӧлӧм вылӧ тайӧ шоныд аддзысьлӧмыс. Ыджыд аттьӧ Типӧсиктса варов да муса аньяслы. Ыджыд вермӧмъяс тiянлы, нывъяс, сьылан-ворсан конкурсъясын!
А менам вежӧрӧ колис сӧмын ӧти юалӧм: мыйла татшӧм ён да мича гӧлӧсаясыслы веськӧдлысьяс оз убӧлитны сетны некутшӧм ыджыд ним? Найӧс колӧ паськыда нимӧдны, ӧд «Оз тусьяс» сьылӧны нин комын воысь дырджык.
Галина Ногтева.
Одыб сикт, Кӧрткерӧс р.