Коми Республикаса Госсӧветын чукӧртчылӧм дырйи сёрниыс вӧлі вермытӧм йӧзлы уджаланінъяс торйӧдӧм-квотируйтӧм йылысь. Социальнӧй политика комитетӧн веськӧдлысь Сергей Артеевлӧн кывъяс серти, республикаса оланпасӧ такӧд йитчӧм вежсьӧмъяс пыртны вӧзйис инвалидъяслӧн ставроссияса котырлӧн регионса юкӧнӧн юрнуӧдысь Маргарита Колпащикова.
Регионын 2013 воын вынсьӧдӧм оланпас серти предприятие-организацияын, кӧні зільӧ 35 мортысь унджык, быть колӧ лӧсьӧдны и вермытӧм йӧзлы уджаланін. Общественнӧй котырын водзмӧстчысьяс вӧзйӧны индыны оланпасас, мый уджаланінсӧ позьӧ лыддьыны лӧсьӧдӧмаӧн сӧмын сэк, кор инвалидсӧ медаласны удж вылӧ. Кыдзи висьталіс Маргарита Колпащикова, бизнес кутысьяс пӧ торйӧдӧны инвалидъяслы сэтшӧм удж, кутшӧмӧс найӧ омӧль дзоньвидзалун вӧснаыс оз вермыны вӧчны.
—Тшӧктӧны бурильщикавны, плӧтничайтны либӧ мукӧд регионӧ ыстӧны. А вермытӧм йӧзлы тайӧ оз лӧсяв. Ӧтар боксянь кӧ, предприятие збыльмӧдӧ оланпаслысь индӧдсӧ, но инвалид кольӧ уджтӧг. Та вӧсна ми и кӧсъям, медым законас урчитӧма лоӧ абу уджаланін лӧсьӧдны, а инвалидӧс удж вылӧ босьтны, — висьталіс Маргарита Колпащикова.
Чукӧртчылӧм дырйи пасйисны, мый вежсьӧмсӧ вынсьӧдны падмӧгыс абу.
Мукӧд регионын ӧд оланпасъясас тадзи и урчитӧма. Но колӧ пӧ мӧвпыштны, кыдзи законсӧ кутасны олӧмӧ пӧртны. Уджӧн могмӧдан республикаса службалӧн юӧр серти, инвалидъяслы вичмӧдӧм уджаланінысь кык коймӧд пайыс прӧст на. И бизнесменъяс пӧ полӧны, мый налысь кутасны штрап перйыны.
Петан туйӧн пӧ вермас лоны, ӧти предприятие кӧ вермытӧмлы уджаланін лӧсьӧдан сьӧмсӧ сетас мӧдлы, кӧні омӧль дзоньвидзалуна мортлы зільны мытшӧдыс абу.
Инвалидъяслӧн котырсалы тайӧ кивыв жӧ, ӧд татшӧм ногӧн унджык вермытӧм морт аддзас аслыс уджсӧ.
Чукӧртчылӧм дырйи сёрнилы кывкӧртӧд вӧчигӧн Сергей Артеев висьталіс, мый инвалидъясӧс уджӧн могмӧдӧм йылысь индӧдъяссӧ колӧ пасйыны и республика да гырысь предприятие-яс костын ёртасьӧм йылысь сёрнитчӧмъясӧ. Тайӧ вӧзйӧмсӧ ыстасны регионса правительствоӧ.
—Оланпассӧ збыльмӧдӧм могысь колӧ, медым бизнесын да инвалидъяслӧн котырын зільысьяс уджалісны ӧтув, — пасйис Сергей Артеев.