Коми Республикаса филармонияысь солистка Екатерина Курочкинаӧс меломанъяс важӧн нин лыддьӧны «кодзулӧн». Сылӧн мича да ён гӧлӧс. Петкӧдчӧмыс пыр зэв яръюгыд.
Искусствояс колледж да Гнесинъяс нима Россияса музыка академия помалысь филармонияса «Асъя кыа» ансамбльын сьылӧ 2011 восянь. Енбиа сьылысь лои Валентина Есева нима премияа медся том лауреатӧн. А неважӧн Екатерина лои финалисткаӧн «Звезда» телеканалын сьыланкывъяса витӧд конкурсын. Кӧть сійӧ и эз ло вермысьӧн, жюри «зарнисӧ» сетіс Краснодарысь София Легранлы, век жӧ татшӧм конкурсын петкӧдчӧмыс зэв тӧдчана.
Енбиа сьылыськӧд сёрниті творчество да олӧм йылысь.
И бӧрдігтыр, и кабырӧн пызанӧ
–Екатерина, тайӧ медводдза телепроект, кӧні петкӧдчинныд?
–Дерт, ме уна конкурсӧ пырӧдчылі, но страна пасьтала медся ыджыдас медводдзаысь. «Новая звезда» – шылада ордйысьӧм, кытчӧ пырӧдчӧ Россияысь став 85 регионыс. Тӧда, мый миян республикаысь шыӧдчылі эг сӧмын ме. Эг чайт, мый буретш менӧ бӧръясны. Меным дыр эз звӧнитны да и конкурслӧн сайт вылысь аддзылі Ухтаса аньлысь нимсӧ. Думайті, мый сійӧ и кутас нимӧдны Коми Республикаӧс.
И со меным звӧнитісны – виччысям пӧ. Ме пӧсявлі и кӧдзавлі, и нимкодяси, и майшаси, мися, кыдзи кута петкӧдчыны. Колӧ вӧлі ыстыны видеошыӧдчӧм (ас йывсьыд юӧртны), петкӧдчӧмсьыд видео да аудиогижӧд. Ыстылі ассьым дас вит коми да роч сьыланкыв. На пиын вӧлі и Алёна Свиридовалӧн «Травушка» сьыланкыв, коді и ӧнія кадлы лӧсялӧ, и йӧзкостса ног юргӧ. Весиг чуйми, мыйла жюри бӧрйис буретш тайӧс. Сьыланкывъяс оз воссьы менам гӧлӧсӧй. Тайӧ сьыланкывнас ме, кыдз шуласны, распевайтча. Но кыдзи меным висьталіс Максим Дунаевский (жюриӧн веськӧдлысь, нималана композитор, Россияса народнӧй артист), медшӧрыс пӧ – петкӧдчӧм, мед ловтӧ вӧрзьӧдіс. И менам артмис.
Максим Дунаевский шуис, мый ме мирас Россияса попфолк петкӧдлысь. А Зара ошкыштіс менӧ, мый вель нин дыр абу кывлӧма татшӧм бур йӧзкостса гӧлӧс. Тэ пӧ верман Пелагеякӧд орччӧн сулавны. Татшӧм донъялӧмысь меным, дерт, вывті нимкодь.
А финалӧ «Твоя земля» сьыланкывсӧ гижӧма Полина Запольская. Конкурслӧн корӧм серти, сэки коліс сьывны ассьыд либӧ тэныд корсисны гижысьӧс. Со меным и индісны котыртысьясыс тайӧ сьыланкывсӧ. Ёна кажитчис. Но авторыс дыркодь абу кӧсйысьӧма сетны сьыланкывсӧ. Сійӧ гӧгӧрвоис, мый ме бӧрын сэсся мӧдлаӧ вӧзйыны оз вермы. Но век жӧ сетіс. Сідз шусяна минусовкасӧ меным ыстісны петкӧдчытӧдз вежонӧн водз. Кадыс дасьтысьны вӧлі этша.
–И кыдзи сійӧ донъяліс сьылӧмнытӧ?
–Зэв нимкодь лоӧма. Кажитчӧма, кыдзи сьылі. Ӧні сыкӧд инстаграмын гижасям. «Твоя земля» пырас и менам репертуарӧ.
–Екатерина, ті сӧгласӧсь жюрилӧн донъялӧмӧн?
–Дерт! Миян пиысь ӧкмыснан финалистыслы эськӧ позис сетны медводдза местасӧ. Быдӧнлӧн вӧлі аслас стиль, сьыланног, ми эг вӧлӧй ӧткодьӧсь.
Но жюрилы збыльвылас вӧлі сьӧкыд вӧчны кывкӧртӧдсӧ. Ме аддзылі, кыдзи найӧ вензисны, кыдзи Юля Савичева бӧрддзыліс, кыдзи кодсюрӧ кулакнас камӧдісны пызанас, кор ассьыныс мӧвпсӧ висьталісны. Татшӧм «восьса» конкурссӧ ме эг на аддзыв. Жюри век пырӧ торъя жырйӧ да сэні вӧчӧ кывкӧртӧдсӧ. А тані ставыс вӧлі миян син водзын – и бӧрдӧм, и кабырӧн пызанӧ камгыштӧм…
–Кывлі, финалын петкӧдчӧмныд тӧкӧтьӧ эз торксьы. Тайӧ збыль?
–Съёмка водзын миянӧс пажынӧн вердісны, и, тыдалӧ, сійӧ тшыкӧма вӧлі. Меным лои сэтшӧм лёк: юрӧй бергалӧ, температура… Ме и сідзи абу азым. Чайті, ставыс помасис, ог нин пет сцена вылӧ. Бур, мый эг медводдзаӧн петкӧдчы, да и бурдӧдысьяслы аттьӧ. Но найӧ помӧдзыс дежуритісны. А бӧрыннас пӧшти «тэрыб отсӧг» машинаӧн нуисны.
–Татшӧм уджтасыс бӧрын артистлӧн туйыс паськалӧ. Дерт, тіянӧс унаӧн казялісны, вермас лоны, татысь регыд нуӧдасны. Кытчӧкӧ коралісны нин, мыйкӧ вӧзйисны?
–Вермасны и нуӧдны! Жюриӧ пырысьяс жӧ пасйисны, мый ыджыд сцена вылын оз тырмы ме кодь сьылысьыс. Дерт, вӧзйисны, но некытчӧ на татысь мунны ог лӧсьӧдчы. Ырыштча кӧ, ёна думайтӧм бӧрын.
Бузова – тайӧ пародия
–Ті сьыланныд йӧзкостсаӧс, а кыдзи донъяланныд ӧніясӧ, мый улӧ том йӧз йӧктӧны?
–Некыдз ог. Сы вӧсна мый ме татшӧм шыладсӧ ог кӧсйы гӧгӧрвоны. Морт, коді велӧдчыліс классика вылын, мӧвпаліс, видлаліс сійӧс, оз вермы кывзыны нинӧм абусӧ: «Танцуй под Бузову, тряси своими арбузами». Тайӧ деградация. И Оля Бузова – тайӧ абу эстрада, а пародия.
–А продюсеръяс кӧ уна сьӧм вӧзъясны…
–Сійӧ янӧдчӧм лоӧ. Ме ог кӧсйы весиг та йылысь думайтны! Быд сьылысьлӧн эм аслас чужӧм, шылада тшупӧд, кытчӧдз кыпӧдчан. Муслим Магомаев, нималана джазистка Лариса Долина – налысь позьӧ велӧдчыны. Колӧ сьывны сэтшӧм сьыланкывъяс, кӧні эм и шылад, и кӧні позьӧ гӧлӧсыдлы воссьыны.
«Теремокысь» петі…
–Ті шуинныд, мый висьталісны кӧ квайт арӧсын, мый кутанныд сьывны йӧзкостса сьыланкывъяс, эн эскӧй. А мый йылысь мӧвпалінныд челядьдырйиныд?
–Затонын вӧлі челядьлы йӧзкостса творчество «Теремок» шӧрин, и ме сэтчӧ гижӧдчи став кружокас. Велӧдчи и кысьыны, и вышивайтчыны, и сёйысь лепитчыны, и кучикысь вӧчасьны, и рисуйтчыны, и макраме кыны, и конькиӧн иславны, и волейболӧн ворсны. Дерт, и сьывны. Вокалысь медводдза педагогӧн вӧлі Светлана Владимировна Светлова, ӧні Уваркина, кодлӧн тай «Друг» приют.
Светлана Владимировна веськӧдліс хорӧн. Сійӧ и казяліс менсьым сямӧс, сцена вылӧ петкӧдіс. А сэтчӧдз вӧлі Коля дядькӧд сьыла гортын. Шуас вӧлі: «Катюша, сьыв!», а ачыс гудӧкасьӧ.
Сэсся веськалі «Сигудӧкӧ», искусствояс колледжӧ, Гнесинкаӧ. Бӧръя хобби, коді менам лои – шопералӧм. Ёртъяс пиысь кодкӧ юаліс, мый пӧ эськӧ кутан вӧчны, гӧлӧсыд кӧ бырӧ. Мися, дальнобойщикӧ медася. Верма дас кык час руль сайын мунны, ог и мудз.
Кӧть и ичӧтсянь сьылі, эг жӧ чайт, мый профессиональнӧя босьтча. Кор ӧд искусствояс колледжас пыри, менӧ кык тӧлысь мысти вӧтлісны.
–Мыйла?
–Ог вӧлі ветлӧдлы. Ме жӧ «Сигудӧкын» сьылі и думайті, мый меным нинӧмла велӧдчынысӧ. Сэсся мӧд вонас выльысь пыри, вежӧрсялі да. И колледж бӧрас кӧсйи эновтны сценасӧ. Пыри Сыктывкарса госуниверситетӧ журфакӧ. Мися, лоа журналистӧн, став мирсӧ кытшовта, интервью кута босьтны. Но ӧти лун сэні эг велӧдчы. «Сигудӧккӧд» гастрольӧ муні, а сэсся «Асъя кыаӧ» медаси.
«Кывйӧй зэв мӧрччана»
–Тіянӧс ёна радейтӧны, гашкӧ, кымынӧн верӧс сайӧ коралӧны, а вӧльнӧй пӧтка на…
–Вӧзйылісны, дерт, мунам пӧ мӧд карӧ, кутан пӧ овны зэв бура, мый колӧ лолыдлы, сійӧс и вӧча. Но ме ог вермы сідзи. Да и ог вермы йитны ассьым олӧмӧс сыкӧд, коді абу творческӧй морт. Сы вӧсна, вермас лоны и, ӧтка на. Вӧвлі сэтшӧм вежӧгтысь поклонник, дзик киноын моз вӧлі зыксьӧ. Коркӧ концерт бӧрын вувзьысис, мыйла тэ пӧ сы вылӧ видзӧдін да мыйла сылы нюмъялін. А сійӧ медводдза радын пукаліс да, кӧсйӧма, мед сӧмын сылы сьылі, нюмъялі да сідз шусяна воздушнӧй поцелуйяс ысталі. Ӧні, ен сыкӧд, ставыс лӧнис…
–Став артистыс суевернӧй, тэ, гашкӧ, тшӧтш?
–Приметаӧ да сьӧд каньӧ ме ог эскы. Но ме эска Енсянь кутшӧмкӧ пасъясӧ. Ыджыд мам вӧлі эскысьӧн да менӧ сідзи жӧ велӧдіс овны. Верма казьтыштны челядьдырӧс, кор меным Енмыс отсаліс. Мунім ыджыд мамкӧд вотчыны. И ме воши. Некутшӧм машина шы, мый велӧдӧны кывзыны, эз кыв. Ыджыд мамлы горзі – чӧв-лӧнь. Заводиті кевмысьны. И друг мыччысис мужичӧй. Пищаль ни кӧрзина сылӧн эз вӧв. Юаліс: «Нывка, мый тэ тані вӧчан?». Мися, воши. Индіс, со пӧ коз пуыс, сэсянь мунан нелямын метр да прӧсека вылӧ петан. Кори, мед колльӧдас. Но шуис, менам пӧ и аслам тырыс мог. Сэсся кыдзи виччысьтӧг мыччысис, сідзи и саймовтчис кытчӧкӧ. Сы ног муні да, туйыс сюри. Ыджыд мамлысь гӧлӧссӧ кылі и.
Ме унатор водзвыв тӧда, йӧзсӧ казяла, коді кутшӧм. Кывйӧй зэв мӧрччана. Код тӧдас, гашкӧ, 40 арӧсӧн муна «Битва экстрасенсовӧ» да сэні лоа вермысьӧн, – шмонитіс Екатерина Курочкина.
Сёрнитіс Екатерина МАКАРОВА.