Со и помасис нӧшта ӧти во… Уна интереснӧйыс, сьӧлӧмтӧ вӧрзьӧданаыс петіс тайӧ кадӧ «Войвыв кодзув» журналын. И со, сигӧртысь номер.
Восьтӧ сійӧс Василий Лодыгинлӧн «Омӧльяс» висьт:
«Квайтымын бӧрас Илья Иванович кутіс чеччыны водз: витнас судзӧдӧ нин кок чуньяснас тшайподсӧ да веськӧдчӧ веранда бӧжӧ вӧчыштӧм ывлавывса асмогасянінӧ. Со и талун чеччис сідз кымын жӧ. Ывлаӧ петан ӧдзӧс восьтӧм бӧрын видзӧдліс асыввылӧ. Кыа кӧть эз на ошйысь алӧйгӧрд дӧрӧмнас, но рудӧн рудзалысь югыдсьыс вӧр пу йыв тыдаліс бура нин. Тӧрыт рытъя шондіыс рытыввылас пырис кымӧръяс улӧ сайласьтӧг да, став сертиыс, луныс лоӧ мича, зэв лӧсялас ветлыны да вотыштны Мича керка дінысь пувсӧ. Збыльысь и мичаӧн вӧлӧма Кӧзӧда ёльбокса кыдзьяс сора пожӧма яглӧн дорышын Семӧ Кӧсьталӧн кыпыдіник вӧр керкаыс. Илья дырйи сійӧ эз нин вӧв, а батьыс томдырйиыс аддзылӧма да висьтавліс:
— Финнъяслысь тай ёсь йыла керкаяснысӧ телевизор пырыд петкӧдлӧны, вӧр керкаыс вӧлі сэтшӧм жӧ ёсь йыла, ӧтарас и мӧдарас коз лап моз лэччысь вевтъяса. Бура ыджыд ӧшиня да гӧгӧрсӧ серлӧдлӧма. Татшӧмыс мукӧдыслӧн весиг сиктын абу, непӧштӧ вӧрын.»
Выль кывбур чукӧр петӧ Нина Обрезковалӧн:
Енмыс бара козьналіс мен асыв,
Мед и зэра, мед и тӧла, мед…
Пыр на вежӧдӧ со кыддза раскыс,
Оз на вижӧд, оз на арлы шед.
Оз на вижӧд видзьяс вылын турун,
Шоныд муӧ лэбач оз на лэб,
Сідзкӧ, талун колӧ овны бура.
Аски? Аски Енмыс сетас мед.
Медводдза строкаыс и сетіс подборкаыслы нимсӧ.
Выль гижӧдӧн — «Галялӧн тайна» неыджыд повестьӧн петкӧдчис Альбина Бушенёва. Эпиграфнас авторыс бӧрйӧма Татьяна Кирпиченколысь кывбурысь юкӧн.
А тӧдан, ме ӧд нинӧм на эг вунӧд,
Но казьтылӧмыс овлӧ сэтшӧм сьӧкыд.
Сы здукӧ весиг чӧскыдторйыс курыд,
Кыдз эз нин ӧтчыд вӧвлы, войт оз пӧткӧд.
«Гожӧм. Югыд вой. Школалӧн интернат. Ставӧн узьӧны. Сӧмын кыкӧн пукалӧны ӧшиньяс дорын да ньӧжйӧник, медым оз садьмыны ёртъясныс, мый йылысь кӧ сьӧлӧмсянь сёрнитӧны. Быттьӧкӧ зэв нин важӧн абу аддзысьлӧмаӧсь.
Тайӧ Галя да Женя. Вит во ӧти классын велӧдчисны, а ӧні, шӧр школа помалӧм бӧрын, гашкӧ, медбӧръя лунъяс ӧтлаынӧсь…»
«Вунлытӧм нимъяс. Ёртъясӧс казьтыліг» рубрикаын Александр Лужиковлӧн творчестволы сиӧм «Шуӧм кывным муӧ усьӧ…» интереснӧй статья петіс Елена Ельцовалӧн.
«Вояс да йӧз» рубрикаын «Улыс Вочса Гриша Иван Павел пиян…» статьяын Мария Плоскова восьтыштӧ Коми мулӧн историяысь зэв колана лист бокъяс.
И ставнымлы, дерт, зэв колана «Йӧзӧдӧма «Войвыв кодзув» журналын 2019 воын».
Та кындзи эм унатор быдӧнлы лов серти. А ми виччысям локтан воын выль аддзысьлӧмъяс!