Январь 14 лунӧ Коми Республикаса юралысь Сергей Гапликов воліс Сыктывкарын регионса перинатальнӧй шӧринӧ, аддзысьліс сэні кага вайысьяскӧд, врачьяскӧд.
Сергей Гапликов сетіс медводдза кага чужтысьяслы 150 сюрс шайта сертификатъяс. Шуда мамъяс лыдын – Сыктывкарысь, Луздор, Удора, Кулӧмдін районъясысь аньяс.
–Сьӧлӧмсянь чолӧмала тіянӧс зэв тӧдчана да кыпыд лоӧмторйӧн, – шыӧдчис на дорӧ республикаса юралысь. – Сиа крепыд дзоньвидзалун, медым быдтасъясныд сӧмын нимкодьӧдісны тіянӧс, а матыссаясныд да рӧдвужныд отсасисны быдтысьны. Выль воӧн тіянӧс, олӧманыд став медбурсӧ да Енсянь бласлӧвитӧм!
Коми Республикаса юралысь кытшовтіс стационарсӧ, тӧдмасис шӧринлӧн уджӧн да тшӧктіс регионса минздравлы корсьны позянлун ньӧбны пузчужӧмаясӧс реанимируйтан юкӧнӧ кювез (инкубатор) да мукӧд колана ӧнія оборудование.
Республикаын медводдза кагаӧс вайӧмысь сьӧма сертификатыс выльтор на, сійӧс сӧмын тавосянь на кутісны сетавны. 150 сюрс шайтыс, дерт жӧ, лоас бать-мамлы тӧдчана отсӧгӧн. Челядя семьяяслы тайӧ да мукӧд сикас социальнӧй отсӧг йылысь унджык позяс тӧдмавны йӧзӧс социальнӧй доръян юкӧнын госуслугаӧн могмӧдан шӧринъясын да ӧтуввезса семья.ркоми.рф порталын.