Киӧн гижӧм важся небӧгъясын медводдза шыпассӧ век мичмӧдлӧмаӧсь. Вужвойтырлӧн кывъяслы сиӧм воӧ Россияса финн-йӧгра культура шӧрин збыльмӧдӧма «Парад букв» удж-тас, корӧма киподтуя йӧзӧс серпасавны, мыйыськӧ вӧчны роч анбурысь шыпасъяс.
Вель уналы кажитчӧма тайӧ мӧвпыс: Россияса дас квайт регионысь сёысь ун-джык удж ыстӧмаӧсь Сыктывкарӧ. Кодкӧ шыпассӧ 3D-графикаӧн вӧчӧма, кодкӧ – вышивайтӧма, кодкӧ – кӧртысь дорӧма, а кодъяскӧ – лыысь, пуысь, кабалаысь вӧчӧмаӧсь. Но медунаӧн, дерт жӧ, серпасалӧмаӧсь. Со «А» шыпасын меститчӧмаӧсь-тӧрӧмаӧсь керка да чери кыйысь детинка, «З» буква ас вылас Вӧлӧгдаса прӧшви плавкнитӧма, а «Ш» артмӧма Вылыс Эжваса ног серпасалӧм куим печканысь. Сибырысь ыстӧмаӧсь серпас: сулалӧны куим ань, дозмукысь кисьтӧны ва. Куим визув шор усьӧны тыӧ, и чужӧ лӧз рӧма «Ш» шыпас.
Роч анбурын комын куим шыпас. И вермысьнас комын куим мортӧс жӧ шуӧмаӧсь. Комиысь мастеръясӧс нимӧдісны кольӧм воторникӧ финн-йӧгра культура шӧринын выставка восьтігӧн. Найӧс чолӧмалігӧн Федерация Сӧветӧ пырысь Валерий Марков пасйис, тані пӧ ясыда тыдовтчӧ, кутшӧмӧн аддзӧны роч анбурысь букваяссӧ том войтыр.
–Россияса школаясын велӧдӧны 81 кыв, и мукӧд войтырлӧн алфавитын эмӧсь рочысь торъялана шыпасъяс, – висьталіс сійӧ. – Гашкӧ, мӧдысь выставка вылас петкӧдлыны и найӧс.
Тайӧ вӧзйӧмсӧ ошкис и йӧзкост творчество шӧринӧн веськӧдлысь Светлана Белорусова. Татшӧм уджтассӧ пӧ збыльысь колӧ нуӧдны водзӧ.
Карелияысь, Марий Элысь, Мордовияысь, Удмуртияысь, Перым-Коми кытшысь, Амур, Кардор, Брянск, Кемерово, Киров, Новгород, Оренбург, Орёл, Саратов да Ярославль обласьтъясысь киподтуя йӧзлы выставкаын петкӧдчӧмысь дипломъяссӧ ыстасны матысса кадӧ.
Налӧн уджъясӧн позьӧ тӧдмасьны ӧтуввезса finnougoria.tv лист бокын йӧзӧдӧм «Парад букв» видеогалереяын. А выставкаыс Сыктывкарын уджалас февраль 28 лунӧдз, сэсся сійӧс петкӧдласны Россияса мукӧд регионын.
Россияса финн-йӧгра культура шӧринӧн веськӧдлысь Татьяна Бараховалӧн кывъяс серти, «Парад букв» кындзи вужвойтыръяслӧн кывъяслы сиӧм воӧ найӧ збыльмӧдӧмаӧсь некымын уджтас. Торйӧн кӧ, снимайтӧмаӧсь «Иван Куратов: свой путь» фильм, finnougoria.ru сайтын йӧзӧдӧмаӧсь роч кывйысь да литератураысь онлайн-тест, а ӧні дасьтӧны саам культура йылысь фильм.
Павел Симпелев.