Кыдзкарын олӧ шань пӧч
Миян Кыдзкар сиктын олӧ шань пӧч Павла Петровна Филиппова. Сы йылысь ме и кӧсъя тiянлы висьтавны.
Павла Петровна челядьдырсяньыс уджавлӧма верстьӧ моз, абу повлӧма сьӧкыдлунъясысь. Ветлӧдлӧма видз вылӧ турун пуктыны, лысьтӧма мӧс, вердлӧма кукъясӧс. А тӧвнас кыскасьӧма вӧлӧн. Дас кӧкъямыс арӧсӧн петӧма верӧс сайӧ. Том гозъялӧн чужӧма нёль челядь. Но ань кольӧма дӧваӧн, и сылы мужичӧй моз жӧ ковмӧма уджавны, медым челядьыс вӧліны пӧтӧсь да бур кӧм-пасяӧсь.
Павла Петровна радейтӧ казьтывны Футбол нима вӧв йылысь:
–Зэв вына да ён вӧлі тайӧ вӧлыс. И менӧ сыкӧд пыр ыстыліcны медся сьӧкыд уджсӧ вӧчны, сы вӧсна мый тӧдіcны – кӧть кутшӧм лоас доддьыс, Футбол вермас сійӧс кыскыны.
Но сиктса йӧз ӧд эз ӧтторъя век уджавны. И гажӧдчыштны кадыс вӧвлi. Павла Петровна казьтылӧ:
–Ветлывлім клубӧ сёрнитны ӧта-мӧдкӧд, йӧктыны да гажӧдчыны. Вӧвлiны и концертъяс, кӧні сиктсаяс петкӧдлісны ассьыныс сямсӧ, ворсіcны гудӧкӧн да сьылiсны.
Павла Петровна висьталіс, кыдзи пасьтасьлӧмаӧсь гаж вылас:
–Ме гортысь бабаюртӧг петавны эг вермы, ӧд сійӧ петкӧдлӧ, мый ме верӧс сайын. А бабаюр вылас пасьтавлiм зэв мича кашемир либӧ сыръя чышъян. Вылысам кышавлi cос-сарапан: водзас передник, а бӧжсӧ мичмӧдӧма серъясӧн. Со тадзикӧн ми пасьтасьлiм.
Павла Петровналӧн эм зэв тӧдчана кужанлун: сiйӧ бӧрдӧдчӧ. Сы моз миян сиктын ӧні некод нин оз вермы бӧрдӧдчыны-сьывнысӧ. Йӧзыс шуӧны:
–Кылан Павла Петровналысь бӧрдӧдчӧмсӧ да он вермы кутны синватӧ.
Анастасия Филиппова.
Изьва р.