Усинскын кыпыда нимӧ-дісны Коми Республикаын да Ненеч автономия кытшын «ЛУКОЙЛ» компаниялӧн социальнӧй да культурнӧй проектъяслы сиӧм дас витӧд конкурсын вермысьясӧс. Таво дипломъяссӧ вӧлі сетӧма медся бур дум-кӧсйӧмӧн шыӧдчысь 70 мортлы.
Медбуръяссьыс медбуръяс
Кыдзи и быд во, конкурсын вӧлі куим нимпас: «Духовносьт да культура», «Спорт», «Экология». Сьӧма грант отсӧгӧн кӧн-кӧ восьтасны парк, музей, планетарий либӧ котыртасны школаын, детсадйын кружок, ӧнія кадся выль техника-оборудованиеӧн могмӧдасны секцияяс да классъяс, а сідзкӧ и, войвывса кык регионын олӧмыс лоас кыпыдджык да бурджык.
Конкурсын вермысьясӧс чо-лӧмаліс «ЛУКОЙЛ-Коми» ООО-ысь генеральнӧй директорӧс йӧзкӧд йитӧд кузя вежысь Евгения Лясковская:
–Предприятиеса генераль-нӧй директор Александр Голованев нимсянь аттьӧала тайӧ конкурсас став вермысьсӧ, кодъяслы абу веськодь, мый вӧчсьӧ чужан муас. Таво миянлы эз вӧв кокни кывкӧртӧдсӧ вӧчны. Конкурсас петкӧдчӧм могысь шыӧдчӧмыс воис воддза воясӧ дорысь тӧдчымӧн унджык, содтӧд на и проектъяссӧ дасьтӧмаӧсь ёна бурджыка. Ті медбуръяссьыс медбуръяс, сямминныд панйыны тайӧ чорыд вермасьӧмас мукӧдсӧ да. Сьӧлӧмсянь чолӧмала тіянӧс да эска, мый ті асланыд уджтасъясӧн збыльысь бурмӧданныд йӧзлысь олӧмсӧ.
Таво тайӧ конкурсас медся уна проект вӧзйӧмаӧсь Чилимдін районсянь. И муници-палитетсӧ таысь аттьӧалӧм-ошкыштӧм могысь «ЛУКОЙЛ-Комиын» шуӧма вӧлі содтӧд грант вичмӧдны сэтчӧс ветеранъяслӧн районса котырлысь «Вечная слава героям» уджтас збыльмӧдӧм вылӧ.
–Ми зілям могмӧдны культура керкаясӧс став коланаторнас, выльмӧдім нин творческӧй самодеятельнӧй котыръяслысь сценавывса паськӧм, ньӧбим выль музыкальнӧй инструментъяс да оргтехника, и тайӧ ставыс – сӧмын культура учреждениеясын, – пасйис Чилимдін районса сӧветӧн юрнуӧдысь Надежда Воробьёва. – Миян сикт-посёлокъясын олысьяс дасьтӧны проектъяссӧ став нимпас сертиыс. Районлы тайӧ конкурсыс зэв колана да тӧдчана, ыджыд сысянь йӧзлы во-дзӧсыс да.
Чилимдін сиктын прӧст кад коллялан да кино видзӧдан районса шӧринӧн веськӧдлысь
Илья Попов висьталіс, мый уна сикас гаж, чукӧртчылӧм да аддзысьлӧм нуӧдӧм могысь ньӧ-бӧмаӧсь светодиода 6*4 метр ыджда экран, кодӧс вайӧмаӧсь да ладмӧдӧмаӧсь «ЛУКОЙЛ-Коми» ООО отсӧгӧн. Тавося конкурсын шедӧдӧм грант вылӧ лӧсьӧдчӧны ньӧбны техническӧй станция – ыджыд вын-йӧра компьютер, медым дасьтыны видеофайлъяс, кольӧм кад йывсьыс да кыпыд гажъяслы сиӧм роликъяс, кодъясӧс сэсся кутасны петкӧдлыны светодиода экран вылас.
Мый босьтны тӧд вылӧ?
Вермысьясӧс нимӧдан кыпыд чукӧртчылӧм дырйи сер-тификат сеталӧмысь ӧтдор вӧлі котыртӧма конкурссӧ нуӧдӧм кузя мӧвп-видзӧдласӧн юксьӧм могысь семинар.
Евгения Лясковская висьталіс, социальнӧй да культурнӧй проектъяссӧ донъялігӧн медвойдӧр мый босьтӧны тӧд вылас жюриӧ пырысьяс. Сідз, тӧдчымӧн вылӧджык донъявсьӧны сэтшӧм уджтасъяс, кодъясӧс олӧ-мӧ пӧртӧм могысь ӧтув зільӧ некымын котыр.
–Ӧти грант вылас шуӧма вич-мӧдны медунасӧ 400 сюрс шайт. Но эмӧсь шензьӧдана бур проектъяс, кодъясӧс збыльмӧдӧм вылӧ сьӧмыс колӧ ёна унджык. Та пӧрйӧ позьӧ корсьны содтӧд йӧзӧс да уджтассӧ юкӧнъяс вылӧ торйӧдӧмӧн дасьтыны кык-куим ичӧтджык проект, сэсся найӧс и вӧзйыны донъявны, – висьталіс Евгения Лясковская.
Овлӧ, конкурсас вермӧм могысь тӧдчана и, кутшӧм нимпас серти дасьтӧмаӧсь уджтассӧ. Сідз, таво медся этша вӧлі «Экология» кузя шыӧдчӧмыс, кӧть эськӧ, кыдз пасйис Евгения Лясковская, «ЛУКОЙЛ-Коми» ООО-лы вӧр-ва видзӧм йылысь юалӧмъясыс век вӧліны и лоасны медся тӧдчанаяс лыдын.
Тайӧ нимпасас дас вермысь пӧвстын – «Нефтегазстройпроф-союзлӧн» Коми Республикаса организация. Дипломсӧ босьтіс «ЛУКОЙЛ-Ухтанефтепереработка» ООО-лӧн ӧтувъя первичнӧй профсоюз котырӧн юрнуӧдысь Галина Тарасова. Сьӧм вылас лӧсьӧдчӧны мичмӧдны-бурмӧдны Ухтаын Фёдор Прядунов нима сквер. Россияын медводдза нефтепромышленниклы памятниксӧ сувтӧдӧмаӧсь таво октябрын заводлӧн да «ЛУКОЙЛ-Комилӧн» отсӧгӧн.
–Ми кутім ыджыд лача, мый веськалам медбуръяс лыдӧ, ӧд проектнымӧс збыльмӧдӧмысь водзӧсыс лоас карын быд олысьлы, – пасйис Галина Тарасова. – Тайӧ скверас шуӧма вӧчны йӧзлы шойччанінъяс, челядьлы ворсан площадкаяс, а грант весьтӧ – ньӧбны аслыссикас мича лабичьяс.
Конкурсын вермысьяс лыдӧ кокниджык веськавны и налы, кодъяслӧн проектъяс вылӧ подуласьӧмӧн позяс дасьтыны выль уджтасъяс. «ЛУКОЙЛ-Коми» ООО-ысь генеральнӧй директорӧс йӧзкӧд йитӧд кузя вежысь та дырйи пример вылӧ вайӧдіс Сыктывкарын 2019-2020 воясӧ шорт-трекын да роликӧн котралан спортын ордйысьӧмъяс нуӧдӧм кузя проект, кодӧс дасьтӧма Коми Республикаын конькиӧн котралан спорт кузя федерацияса исполнительнӧй директор Станислав Пономарёв.
–Аслас грант весьтӧ сьӧмсӧ сійӧ абу на видзӧма, но сылӧн эм нин дум-кӧсйӧм тайӧ проект вылас подуласьӧмӧн дасьтыны выль уджтас. Лоӧ нимкодь, тайӧ кӧ отсалас водзӧ сӧвмӧдны миян республикаын шорт-трексӧ, – пасйис Евгения Лясковская.
Вочакывйын Станислав Пономарёв юксис аслас мӧвпъ-ясӧн, мый грант отсӧгӧн восьтасны Усинскын шорт-треклысь отделение, и та могысь став коланасӧ вӧчӧма нин.
Кыпыд лолӧн
Асланыс дум-кӧсйӧмъясӧн да вӧзйӧмъясӧн юксисны и конкурсын вермысьяс. Грантсӧ унаысь нин босьтысьяс висьталісны, мый вӧчӧмаӧсь налы вичмӧдӧм сьӧм весьтас, а сідзжӧ водзӧ вылӧ кутшӧмӧсь могъясныс.
Торйӧн нин нимкодьпырысь Евгения Лясковская тӧдмӧдіс чукӧртчӧмаясӧс Усинск районса Нӧвикбӧж грездысь культура керкаӧн веськӧдлысь Татьяна Викторовакӧд, коді дасьтӧма дӧраысь вӧчӧм чачаяслысь «Акань» музей лӧсьӧдӧм кузя проект.
2013 восянь Татьяна абу нин ӧтчыд вермывлӧма «ЛУКОЙЛ-Комилӧн» конкурсын, и талун Усинск районса ылі грездысь аканьяс нималӧны суйӧр сайын нин.
Сосногорск районса Улыс Одесысь керка-интернатса директор Надежда Чистова кык пӧрйӧ вермылӧма аслас уджтасъясӧн. Сылӧн водзмӧстчӧмӧн 2017 воын мусир перйысьяслӧн грант вылӧ збыльмӧдӧмаӧсь тайӧ социальнӧй учреждениесьыс олӧма да вермытӧм йӧзӧс физкультура-спортӧ ышӧдӧм кузя проект. А таво шуӧмаӧсь водзӧ нуӧдны керка-интернатас олысьяслысь дзоньвидзалунсӧ ёнмӧдӧм могысь татшӧм уджсӧ.
–Ме уджала тшӧтш и Улыс Одес овмӧдчӧминса юралы-сьӧн. И верма шуны, мый став тайӧ воас «ЛУКОЙЛ-Коми» ООО зільӧ, медым миян неыджыд посёлокын йӧзлӧн олӧмыс водзӧ бурмис. Матӧ став школаыс, детсадйыс, культура керкаыс да шойччан шӧриныс пырӧдчылісны нин мусир перйысьяслӧн гранта конкурсӧ да вӧліны вермысьяс лыдын. Та вӧсна ме шуа талун тайӧ трибуна сайсяньыс «лукойлсалы» посёлокын став олысь нимсянь ыджыд аттьӧ! – сьӧлӧмсяньыс висьталіс Надежда Чистова.
Йӧз водзӧ микрофон дорӧ петаліс и конкурсын вермысьяс пӧвстын медся «мывкыдаыс». Ухтаса культура керкаысь режиссёр Людмила Дудина таво воськовтіс олӧмас тӧдчана тшупӧд – сылы тыри 80 арӧс. Но ыджыд арлыд вылӧ видзӧдтӧг сійӧ дасьтӧма зэв бур проект да сы серти вичмӧдӧм грант вылас лӧсьӧдчӧ лэдзны театрын уджалысьяс йылысь очеркъяса небӧг.
Сэк жӧ, позьӧ шуны, тайӧ кыпыд чукӧртчылӧм вылас медся нин вӧрзьӧдана вӧлі Печора районысь Кожва посёлокса школаысь челядьлӧн видео пыр аттьӧалӧмыс. Тайӧ велӧдчанінас «ЛУКОЙЛ-Комилӧн» гранта отсӧг вылӧ ньӧбӧмаӧсь лингафон кабинетӧ оборудование.
Светлана Быковская.
Снимокъясыс Александр ГрызловлӦн да Оксана ДобролюбовалӦн.