«Василейлӧн» выль ловру

Во-мӧд сайын «Василей» гаж видзӧдны билетла йӧзыс нёль час асывсянь вӧлі ӧчередӧ сувтӧмаӧсь и ставсӧ сизим минутӧн ньӧбӧмаӧсь.

Ӧнія фестиваль вылӧ билетъяссӧ мӧдасны вузавны декабрь 25 лунсянь, и, кыдзи чайтӧны гажсӧ котыртысьяс, ӧдйӧ жӧ пӧ инасясны. Та йылысь найӧ висьталісны йӧзкост творчество шӧ-ринын пресс-конференция дырйи.

Журналистъяслы матыстчысь «Василей» йылысь висьтасисны шӧринӧн юрнуӧдысь Светлана Белорусова, Кулӧмдінса культура керкаӧн веськӧдлысь Кристина Апостолиди, фестивальса режиссёр Ирина Гулько да сылы отсасьысь Юрий Шибаев, жюриса секретарь Людмила Баева. Но став гусяторсӧ, мый сэні виччысьӧ йӧзсӧ, эз восьтыны: видзӧдысьтӧ пӧ ӧд шензьӧдны-чуймӧдны колӧ. Но и мый восьтісны, ышӧдӧ нин волыны фестиваль вылас. Гашкӧ, и билетыс на сюрас, концертсӧ ӧд кыкысь петкӧдласны — луннас и рытнас.

Людмила Баевалӧн кывъяс серти, ӧнія коми сьыланкывлӧн фестивальса конкурс вылӧ вӧзйӧмаӧсь 33 сьылан. На пиысь бӧрйӧмаӧсь дас кыкӧс — найӧ и юргасны Кулӧмдінын важ Выль во войӧ. Сцена вылӧ петалас  Койгорт, Удора, Кулӧмдін, Кӧрткерӧс районъясысь, Ухтаысь, Сыктывкарысь кыдзи паськыда нималана, сідзи и сӧмын на вынсялысь-бордсялысь котыръясысь сё сайӧ сьылысь.

Жюриӧ быд во выль йӧзӧс корӧны, медым пӧ выль синмӧн видзӧдласны-донъяласны сьыланкывъяссӧ. Та пӧрйӧ Людмила Баеваысь ӧтдор сэні лоасны «Асъя кыа» ансамбльысь главнӧй хормейстер Алексей Разбаков, гижысь Нина Обрезкова, шылад тэчысьяс Ирина Чувьюрова да Сергей Кузьмичев. Воддза «Василей» конкурсын Сергей Кузьмичев-лӧн сьыланкывйыс шедӧдӧма мед-ыджыд призсӧ. А жюринас веськӧдлысьӧн корӧмаӧсь Москваса культура институтысь профессор Игорь Склярӧс, коді абу нин  ӧтчыдысь режиссёравлӧма  фестиваль вылас.

А ӧнія праздниклӧн режиссёр Ирина Гулько пасйис, кӧсъям пӧ петкӧдлыны волӧн нёльнан кадыслысь яръюгыд рӧмъяссӧ, и сэк жӧ колям «Василейлысь» аслыспӧлӧслунсӧ, Выльвося гажлысь русӧ. Юрий Ши-баев содтіс, фестиваль йылысь юӧрсӧ пӧ кутам йӧзӧдны ӧтуввезйын #Василей хэштегӧн, медым и мукӧд регионын олысьяс вермисны тӧдмасьны сыӧн.

Пасйисны и, «Василей» сьыланкыв пӧ юргас выль ногӧн. Но кутшӧмӧн сійӧ петкӧдчас видзӧдысьлы, ог жӧ пӧ висьталӧй.

Кызь сизимӧд «Василейын» медводдзаысь на лоӧ бӧрйӧма том йӧзӧн гижӧм сьыланкывъяс нимпасын вермысьӧс. Концертас вичмӧдасны талы торъя юкӧн, кӧні шӧр персонажнас петкӧдчас Вась пӧль да кутас туйдыны-велӧдны томъясӧс творчествоӧ. Тайӧ номинацияас ордйысясны Кулӧмдін районысь Владимир Козловецлӧн, Удораысь Алексей Жилинлӧн да Михаил Кукинлӧн  сьыланкывъяс.

Фестиваль дырйи юбилейӧн чолӧ-маласны Лидия Логиноваӧс. Кыдзи шуис Светлана Белорусова, Лидия Петровна пӧ фестивальлӧн лолыс, гажсӧ мичмӧдысьыс.

Казьтыласны и Василий Николаевич Чувьюровӧс, коді таво мунӧма олӧмсьыс. Концертын сылы торъя юкӧн сиасны.

Фестивальлысь концертсӧ нуӧдасны Владимир Рочев да Татьяна Зизганова. Мӧйму моз жӧ Кулӧмдінса школаысь «YoJo» телестудияысь том йӧз кутасны юӧртны гаж йывсьыс. Сёрнитчӧны и телекомпанияяскӧд, медым концертсӧ позис видзӧдны «веськыд эфирын».

—Выль ловшы лоас фестивальыслӧн, но «Василейлӧн» традицияясыс колясны, — пасйис Светлана Белорусова. — Ӧд сійӧ нимӧдӧ оз сӧмын Кулӧмдін районӧс, но и ставнас Коми Республиканымӧс.

Павел Симпелев.

«Василейлӧн» выль ловру

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.

Пролистать наверх