Мусаӧсь, шаньӧсь, мичаӧсь…
Муса, шань, мича, енбиа, уджач, унатор тӧдӧ да кужӧ, ас войтыр пӧвстын олӧ да ас кывйӧн сёрнитӧ, радейтӧ чужан му да водзӧ нуӧдӧ традицияяс – татшӧмӧн аддзӧны Райда нылӧс «Райда» конкурсын вермасьысьяс.
Во кост мысьт ордйысьӧмсӧ нуӧдлӧны кар-районса да регионса тшупӧдъясын. Кольӧм вежон помын республикаса конкурсын ассьыс вежӧр-сям петкӧдлісны квайт муниципалитетысь сизим ныв. Ас районъясын найӧ вермысьясӧн нин лоӧмаӧсь да шуӧны, ми пӧ ставным нин Райдаяс, и ог кутӧй ёна майшасьны, та пӧрйӧ кӧ ог шедӧдӧй тайӧ нимсӧ.
Но ставныс зілисны петкӧдчыны збыльысь муса, шань, сяма нывъясӧн.
Матысяньджык тӧдмасям накӧд.
Изьва районса Сизябысь Анастасия Каневалы 24 арӧс, уджалӧ йӧзӧс социальнӧя доръян тэчасын. Эжва йывса Полльӧысь Лариса Мартюшева велӧдчӧ Сыктывкарса педколледжын, юрнуӧдӧ студентъяслӧн Кулӧмдін районса землячествоӧн, радейтӧ спорт. Печораысь Алиса Филипповалӧн вужъясыс Изьваса Чаркабӧжысь, велӧдчӧ парикмахерӧ, спортысь оз жӧ ӧтдортчы, войвывса многоборьеын пӧ вермася. Сідзжӧ ветлӧдлӧ Печораса «Коми акань» клубӧ. Щельяюрысь Юлия Филипповалы 17 арӧс, школаын на велӧдчӧ. Сьыла пӧ и йӧкта, уна конкурсӧ пырӧдча. Тавося «Луд» гаж дырйи вермӧма «Невестаяслӧн хоровод» конкурсын да веськалӧма «Райда» вылӧ. Дас сизим арӧс жӧ и Пожӧгдінысь Кристина Третьяковалы, искусство колледжын велӧдчысьлы. Кристина Павлова чужлӧма Мозынбокса Пыисдін сиктын, помалӧма Сыктывкарса университет, уджалӧ география велӧдысьӧн. Ксения Мишарина велӧдчӧ Коми национальнӧй гимназияса 10-ӧд классын, и сэтысь «Горадзуль» ансамбльӧ ветлысьяс ёна отсасисны нывлы бурджыка петкӧдчыны конкурсын.
Ордйысьны ставӧн вӧччӧмаӧсь йӧзкостса паськӧмӧ. Алиса Филипповалы сарапан-соссӧ сетӧма «Коми акань» клубӧн юрнуӧдысь Галина Павловна Юркевич. Сылӧн татшӧм паськӧмыс, дас кӧкъямысӧддас ӧкмысӧд нэмъясын на вурлӧмыс, уна сикас, Няшаса рӧдвужсяньыс вичмывлӧмаӧсь. Анастасия Канева сарапан вурны дӧрасӧ корӧма бабыслысь, Зоя Яковлевна Каневалысь. Сылы пӧ кӧкъямысдас кык арӧс нин. Юлия Филипповалӧн вӧлі сэтшӧм паськӧм, кутшӧмӧн водзті Изьваса нывъяс верӧс сайӧ петавлӧмаӧсь. Сарапансӧ бабыс жӧ сетӧма. Юр вылас сылӧн вӧлі сыръя чышъян да бисера юр – тадзи изьватас шуӧны мичмӧдӧм юркытшсӧ. А Кристина Третьяковалы сюмӧдысь юркытшсӧ вӧчӧма Евгений Алексеевич Игнатов. Лариса Мартюшевалы паськӧмсӧ кольӧм во на вурӧмаӧсь – ӧні тай позьӧ вурӧдны коми паськӧмтӧ, кӧсъян кӧ сійӧс новлыны.
Висьтасисны нывъяс и, кутшӧмӧн аддзӧны ассьыныс аскиа лунсӧ. Лариса Мартюшева шуис, лоа пӧ ичӧт классъясын челядьӧс велӧдысьӧн. /ні нин пӧ ветлывла коррекционнӧй школаса посниулов дорӧ. Анастасия Канева пасйис, меным пӧ сьӧлӧм вылӧ воӧны творчество да политика. Таво босьтчылӧма бӧрйысьны районса сӧветӧ, да абу веськалӧма, но ог пӧ эновтчы политикаын водзмӧстчӧмсьыс. Кристина Павлова енбиа челядьлӧн лицейысь ныв-зонкӧд чужан му туялан удж нуӧдӧ. Юлия Филиппова шуӧ, велӧдча пӧ, лоа специалистӧн да бӧр чужан посёлокӧ бергӧдча. Колледж помалӧм бӧрас чужанінас жӧ кӧсйӧ локны и Кристина Третьякова, котырта пӧ сэні челядьлысь да верстьӧлысь сьылан ансамбльяс. Алиса Филиппова быттьӧ кывкӧрталіс став тайӧ шуӧмсӧ: быд морт пӧ колана сэн, кӧні сійӧ чужӧма, кӧні олӧны сылӧн рӧдвужыс, медся матыс йӧзыс.
Конкурсыс вит тшупӧда вӧлі, и быдын нывъяслы коліс асьсӧ медбур боксянь петкӧдлыны. Тшӧтш и карнанӧн ветлыны. Жюриын донъялысьяснас вӧліны сӧмын мужичӧйяс да, тӧдӧмысь, эз кокни вӧв налы бӧрйыны медся муса да мича нывсӧ. И век жӧ бӧрйисны. «Райда» ним да медводдза места сетісны Изьва районса Щельяюрысь Юлия Филипповалы, «Катшасин» ним да мӧд места – Кулӧмдін районса Пожӧгдінысь Кристина Третьяковалы, «Пӧлӧзнича» ним да коймӧд места – Сыктывкарысь Лариса Мартюшевалы. А видзӧдысьяс «Медся муса нылӧн» шуисны Кӧрткерӧс районысь Ксения Мишаринаӧс.
Павел Анохин.
Снимокъясыс ӧтуввезйысь.