«Чужан мулӧн мойдъяс» пызанвывса ворсӧмӧн тӧдмӧдісны KomiExpoTravel войтыркостса форум—выставка вылӧ волысьясӧс Коми Республикаса йӧзкостса творчество шӧринын зільысьяс.
Семьяӧн прӧст коллялан ворсӧмсӧ дасьтӧма коми фольклор вылӧ подуласьӧмӧн. Шӧр геройясыс сэні — Йиркап, Кӧрт Айка, Яг Морт, Ёма-баба, Пера да Зарань.
Быдӧн дорӧ содтӧма мыйкӧ сылы лӧсяланаӧс, сы йылысь висьталанаӧс, шуам, Кӧрт Айка дорӧ — накӧвальня, Йиркап дорӧ — кӧр.
Ворсанторсӧ дасьтӧма Павел Лимеровлӧн «Войдӧр. Когда-то. Мифы, легенды, предания коми народа» небӧг вылӧ мыджсьӧмӧн. Мичмӧдӧма сійӧс Вылыс Эжваса серъясӧн.
Проектсӧ мӧвпыштысь да збыльмӧдысь, йӧзкостса творчество шӧринысь методист Кристина Полякова серти, мойдса геройяс отсӧгӧн ворсысьяс тӧдмаласны коми фольклор да кипом творчество йылысь уна выльтор.
«Чужан мулӧн мойдъяс» пызанвывса ворсӧмӧн могмӧдасны республикаса став шойччан да прӧст кад коллялан учреждениесӧ.
Сыктывкарын олысьяс да гӧсьтъяс вермасны тӧдмасьны сыӧн йӧзкостса творчество шӧринын (Сӧветскӧй уличаса 28-ӧд номера керка).
